«Гырон быдтон» праздник матэктэ
Ципья черкогурт куноосты пумитаны дасяське.
28-тӥ инвожое Ципья черкогуртын ортчоз яратоно калык шулдыръяськонмы — «Гырон быдтон». Тодады вайытӥськом: туэ со Балтась ёросын элькун масштабен ортчоз. Праздник кутскоз 10.00 часэн.
«Гырон быдтон» — удмуртъёслэн тулыс бусы ужъёсты йылпумъянэн герӟаськем вашкала сям-йылолзы. Котьку сямен та нуналэ мылкыд карисьёс ческыт ӝук веръяны, усточиослэсь киужъёссэс басьтыны но пӧртэм калык шудонъёсы но тунсыко вожвылъяськонъёсы, мастер-классъёсы пыриськыны быгатозы. Горшок пыргытон, пу вандылон, курегпуз питыръян, чорыган, бодыен но канатэн кыстаськон, юэн тырмытэм пуйыосты нуллон, пуклёен ветлон, сапег куян, кутэн шудон, пуйыен жугиськон, ки кужымез мертан... — та но мукет шудонъёс-вожвылъяськонъёс «Гырон быдтон» праздникез шулдыртозы. Шаплы но чырткем луэмзэс эскерыны мылкыд карисьёс пуйы дӥсяса, пыдъёсты думылыса, куас кутчаса возьвылтӥ бызьылонэ, ведра карнанэн ву нуллыса бызьылонэ, атас кутонэ пыриськыны быгатозы. Нылпиос туж ярато синъёссэс думыса арбери вандыны. Со но шулдыръяськонын одно ик луоз.
Валтӥсь сцена но майдан сяна, ужалозы на удмурт калыклэсь вашкала улонзэ возьматӥсь подворье, вузкарон лавкаос но пичи сцена. Ӵапак со сценаын ик ортчозы «Чеберина» но «Батыр», «Шудо-буро удмурт семья» вожвылъяськонъёс. Со сяна, празднике лыктэмъёс «Арган кырӟа» конкурслэсь Гала-концертсэ адӟыны, устолыкъя вожвылъяськонын вормем мызганчиосын тодматскыны но быгатозы. Пусйыны кулэ: туэ та конкурс нырысетӥзэ радъяське. Оскомы, азьланяз со сяме пыроз но котькуд аре «Гырон быдтонмес» чебертоз шуыса.
Арган гуръёс сяна, калыклэсь мылкыдзэ та нуналэ шулдыртозы фольклор кырӟанъя но эктонъя «Айкай» удмурт кун театр, Татарстанысь, Удмуртиысь, Киров улосвылысь кунооос но асьме ёросысь самодеятельной коллективъёс. Праздник йылпумъяськоз шулдыр дискотекаен. Ӝытлэн куноосыз луозы Удмуртиысь артистъёс — Александр Порфирьев, Андрей Корнилов но Ури-Бери Орина.
Озьыен, пумиськиськомы Ципья черкогуртын 28-тӥ инвожое 10.00 часэн Татарстанысь удмуртъёслэн элькун шулдыръяськоназы — «Гырон быдтонын»! Эн вунэтэ чебер удмурт дэремъёстэс дӥсяны но капчи мылкыддэс басьтыны! Калык шулдыръяськон котькинлы мылысь-кыдысь шутэтскон, ар ӵожелы тырмымон шулдыр мылкыд но шуныт тодэ ваёнъёс мед кузьмалоз!
(Материал 2025-тӥ арын ортчоно «Гырон быдтон» праздниклэн программаез вылэ инъяськыса дасямын)
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев