Инмар пиосты кузьмаз, нош улон — кенъёсты

Та чебер, шаплы кышномурт шоры учкыса, оскыны но уг луы, солэн внукъёсыз но вань ини шуыса. Егит но пальпотӥсь. Кузё кышно, кудӥз вылын возиське корка, со ик семьялэн шорсюлмыз но луэ. 

Вордскиз героинямы Балтась ёросысь Кушкет гуртын 1976-тӥ арын 22-тӥ пӧсьтолэзе гурт удысын ужасьёслэн семьяязы. 

— Семьямы бадӟым вал, кык песяй но вал али мынам, анай, атай, куинь агае но мон, шумес пыдэс. Атае, Павлов Михаил Максимович, колхозын пӧртэм ужъёсын тыршиз. Тракторист но вал со. Берло аръёссэ дуриськись луыса ужаз. Гуртысь котькуд коркан лэсьтэм арбериез вань, дыр, солэн. Анае но, Павлова Ольга Владимировна, кема аръёс ӵоже тыршиз гурт удысын пӧртэм ужъёсын, берло аръёссэ фермаын парсьёсты сюдӥз. Жаль, анай-атае вазь кулӥзы. Коля агае но та улонысь вазь кошкиз. Огез сьӧры огез кулӥзы соос. Али дыре кык агае вань: Юрий но Сергей. Кыкназы ик семьяен, шудо уло, — матысь адямиосыз сярысь вера Елена Михайловна. 

Кин гуртын будэмын, тодэ, кызьы гурт удысэз нуоно. Со котькуд нунал ужам уж, тэк пукыны уз пӧрмы, нылпиослы но. Скал кыскон, пудоез утялтон, пу дасян, ву нуллон — таизлы Ленаез но солэсь агайёссэ анай-атаез пичиысен ик дышетӥзы. Со сяна, Лена апайлэн улоназ песянайёсызлэн визьнод сётэмзы но бадӟым люкет басьтэм.

— Мирной времяын улӥмы ми, пичи но пинал дырмы шулдыр дауре ортчиз, Инмарлы тау. Кык песяйёсын улэм бере, мыным секыт уж туж ӧз йӧты. Но озьы ке но юрттыны тыршисько вал. Песяйёсы кема улӥзы. Шумпотӥсько, черсыны но керттӥськыны дышетӥзы соос монэ. Туж трос керттӥськи мон быдэ вуэм бере но, — тодаз вае Лена апай. 

1983-тӥ арын нылаш Кушкет гуртысь покчиёзо школае дышетскыны пыре. 

— Нырысетӥ классэ пыреммылэсь азьло ик, пакетэ тетраден ручка поныса, эшеным дышетӥсь доры мынӥськом вал но, «ку басьтӥськоды ини милемыз дышетскыны» шуыса, школае куриськиськом вал ми. Куинь классэз Кушкетын дышетским. Куиньысен сразу витетӥ классэ Ӟаны школае потӥмы, — тодон-валан басьтон дуннее нырысетӥ вамышъёсыз сярысь маде Елена Михайловна. 

Шаплы пинал луыса будӥз нылаш. Школаын дышетскон дыръяз туж яратӥз трудъя урокъёсты. 

— Трудъя урокъёсты Ермакова Антонида Васильевна нуиз. Ми отын выкройкаос лэсьтыса вуриськиськом, пыжиськиськом вал. Мыным со туж кельшылӥз. Антонида Васильевна туж усто вал вуриськыны. Солэн дышетэмез улсын вуриськыны дышетски. Нялтас вераса, ваньмон дыръям али но вуриськисько. Азьло дыръя туж трос керттӥськи. Эшшо суредаськыны яратӥ. Концертъёсы но мыло-кыдо пыриськылӥм, кырӟаськом-эктӥськом вал. Школаын дышетскон дырмы туж шулдыр ортчиз милям. Зор-а, кот-а, гӧп-а — пыдын ветлӥськом вал, «ойдо школае эн мынэ ини» уг шуо вал бадӟымъёс, китӥ кутыса нуо вал школае. Берло гинэ прицепен трактор сётӥзы, будкаен. Жугиськон дыръёс но луыло вал. Сюрес дурысь писпу ньӧръёсты тӥяса, ваче жугиськыса но ветлӥськом вал (серекъя). Но озьы ке но туж шулдыр ветлӥмы, — азьланьтэ веранзэ Лена апай. 

1993-тӥ арын егит ныл Ӟаны школаез пырпотэ. 1994-тӥ арын Урняке дышетскыны пыре но одӥг арскын сое азинлыко йылпумъя, бухгалтерлэсь профессизэ басьтэ. Озьы пӧрмиз: нылаш одӥг нунал но ас профессиезъя ӧз ужа. 1994-тӥ арын со аслэсьтыз ужан сюрессэ мытэ Кушкетысь парсь вордон комплексын, парсьёсты утьыны кутске. 

— Егит дырме фермаын ортчытӥ, 13 ар ужай фермаын. Собере 15 ар, 2007-тӥ арысен 2022-тӥ арозь, Ӟаныын кебитьын ужай. Али Кушкет гуртысь фельдшерлэн юрттӥсез луыса ужасько, висисьёсты утёнъя младшой медицинской сестра луисько. Ужме туж яратӥсько, малы ке шуоно мынам егит дыръям туж медсестра луэме потэ вал. Можгае дышетскыны но мынӥ вал, но 100 манет уксё кулэ луиз но ми эшеным берытскыса бертӥмы. Бертэм бере анай-атай тышкаськизы, 100 манет уксё ум шедьтэ вал-а, мар-а ми шуыса. Тӥни со егит дырысь малпанэ али ке но быдэсмиз, медпунктэ ужаны пыри, — ужан удысэз сярысь вера кышномурт.

1994-тӥ ар Елена Филиппова понна мукет ласянь но тодэ кыльымон ар луэ: ӵапак соку нылкышнолэн семьяез кылдэ. Яратонзэ ас гуртысьтызы ик шедьтэ: Филиппов Иван Пантелеймоновичлы бызе. Тани 32 ар ӵоже ини соос ог-огзэс гажаса, яратыса, ог-огзылы пыкет луыса уло. Куинь визьмо пиосты будэто. Лена апай малпамъя, кузпалъёс ӵошен шуг-секытъёсты вормыны, нылпиосын вырыны, гурт хозяйствоез нуыны кулэ. Ог-огдэ валаса, ог-огдэ гажаса гинэ, юн но шудо семья кылдытыны луэ угось. Атай муртлэн но семьяын интыез бадӟым, шуэ кышномурт, нимаз ик семьяын пиос ке будо.

— Картэ мынам туж йӧно, семьяез но туж гажамон вал, монэ яратыса, шуныт пумитазы. Гуртын улэм бере, ӵошен пудо но вордӥськом. Али дыре вить скалмы, вань на ошъёс, кунянъёс — хозяйство бадӟым. Мон огнам нылкышно. Пудозэ но утьыса вуоно, корка пушкын чылкытлыкез но утёно, сиёнзэ но вуттоно. 92 аресъем анайзые, Филиппова Александра Кузьминична, но вань. Сое но утёно.

Куспамы тупаса, яратыса улӥськом. Визьмо, службае ярамон пиосты будэтӥм.

Нырысетӥ пимы, Дмитрий, вордскиз 1995-тӥ арын, кыкетӥез, Даниил, — 1999-тӥ арын. Собере дас арскын, 2009-тӥ арын, пичи пиме, Ярославме, вайи.

Нылпиосмес нокин начарен уз вера. Кык бадӟым пиосмы армиын служить карыса бертэмын, Инмарлы тау. Покчиез пимы али дыре Яныльын аграрной колледжын дышетске. Отын сое ярато, экзаменъёссэ но умой сдавать кариз, азьланяз но умой дышетскоз шуыса оскем потэ.

Кыкез ик бадӟым пиосмы кышнояськемын. Дима Биктеш гуртысь Ландыш нимо нылэз кышно басьтӥз, Даниил Ципья гуртысь Анастасияен семья кылдытӥз. Валче, ог-огзэс яратыса, тупаса уло. Бадӟым пиелэн кык нылыз вань ини. Аслым инмар ныл ӧз ке но сёты, кык внучкае вань. Кыкетӥ пиелэн пиез вань. Асьсэлэн улон интызы вань. Ми соос понна туж шумпотӥськом. Ӝӧксы тыр луиз ке, тазалыксы луиз ке — со шумпотон. 

Пиосы туж визьмоесь. Бадӟым пие ужа полициын, кыкетӥез Наказаниосты быдэстонъя федерал службалэн управленияз охранаын тырше. Арнялы быдэ берто. Пиос туж юртто атайзылы юртъер котырысь ужъёсты быдэсъяны. Кенъёсы мыным корка пушкысь ужъёсын юртто. Сиён пӧзьтыса, утялскыса но кельто. Туж умоесь кенъёсы, Инмарлы тау карисько, сыӵе кенъёс сюризы шуыса. Мон шудо: Инмар мыным пиосты кузьмаз, нош улон ӟеч кенъёсын шумпоттӥз.

Эшъёсы но уно мынам, шуг-секытъёс дыръя соос кылын но, ужен но юртто. 
Анае кулэм бере анай интые кылиз мыным бадӟым агаелэн кышноез, кенаке. Уно дыръя солы анай шуыса но вазиськеме вань, со но котьку поддержать каре, котькуд ласянь юрттыны дась. Кузпалэлэсь анайзэ но анай интыын адӟи. Инмарлы тау, со али но улэп, соин валче улӥськомы, ог-огмылы пыкет луыса. 

Котькуд праздникез, вордскем нуналъёсыз семьяен, ӵыжы-выжыосын ӵошен бадӟым ӝӧк дасяса пусйиськом. Праздникъёс дыръя нылпиос, внукъёс бертӥзы ке, корка шулдыр луэ. Анай мурт понна со ачиз бадӟым шуд луэ ук ини, — шуэ Елена Михайловна, веранзэ йылпумъяса.

Бен, анай луон — со шуд. Со нуналмысь уж — физической, эмоциональной. Со понна тон уждун уд басьтӥськы, нош басьтӥськод нылпиослэсь пальпотонъёссэс, соослэсь азинсконъёссэс но тау каремзэс. Нылпиосты будэтонлэн секретэз сярысь вераса, Лена апай оске, пиналъёсты будэтыку сюлэмдэ кылзыны кулэ шуыса. Анай муртлэн сюлмаськонэз трос но соослэсь нокытчы уд пегӟы: анай луытэк улыны уг луы ук. Анай — со улон! 

P. S.: Лена апайлы жингыртыкум, со паймиз: «малы бен мон сярысь газетэ поттыны, мон огшоры гурт нылкышно ук, нокыӵе бадӟым данъетъёсы но ӧвӧл мынам». Мон соин соглаш ӧй кариськы: дуно кузпал, яратоно анай, муспотон песянай но гажано анайзы луон — ачиз бадӟым данъет.