Историын аслаз пытьыез: Ципья гурт поселение (+фоторепортаж)

1890-тӥ арын татын лэсьтӥське «фельдшерский приёмный покой». Выль даурлэн кутсконаз со земской больница статус басьтэ.

1920-1930-тӥ аръёсы гуртын шӧдӥськыны кутско культурно-просветительской ӧръёслэн выремъёссы. Та аръёсы клуб но ужаны ӧдъя.1938-2006-тӥ аръёсы со интыяське черклэн нырысетӥ этажаз, вӧсяськон залаз. 2007 арлэн февраль толэзяз Ципьяын ӧсъёссэ усьтэ выль культура юрт. Туала выль зданиез усьтон ужрадэ Президент М. Шаймиев но пыриське.

1930-тӥ арын гуртын кылдытӥське колхоз, солы «Горд Кизили» ним сёто. 1936-тӥ аре октябрь толэзе Ципьяын лэсьтӥське МТС, озьы ик вӧй комбинат но ветеринарной пункт.

1938-тӥ арын Татарстанысь АССР-лэн Вылӥ Советэзлэн (Кенешезлэн) указэныз, Балтась районлэн составысьтыз потыса, Ципья нимаз район луыса люкиське, Ципья гурт солэн центрез луэ. Гуртлэн воштӥськонэзлы но выльдэмезлы со стимул сётэ. Кылдытӥсько район масштабын ужась предприятиос. Калыклэн лыдыз будэ, бигеръёс та пала тросгес вуыны кутско.1939-тӥ арын усьтӥське нырысетӥ нылпи сад. 1948-тӥ арын Арбор шур вамен выль выж лэсьтӥське - та луэ районлэсь тужгес но кулэ луись ужпумзэ быдэстон.

1958-тӥ арын Ципья но Балтась районъёс нош ик огазеясько, районлэн центрез выже Балтасе.

Берло аръёсы ортчо уно воштӥськонъёс, озьы ке но, али дыре но Ципьяын кылзэ кутӥсь, оскымон, усьтэм мылкыдо, муртэз валась калык улэ.
(информация басьтэмын «Балтась энциклопедилэн» кыкетӥ люкетысьтыз)

Ӵошен ужаськом
Куке но Ципья ачиз район центр вылэм. Али дыре поселение Арбор, Вукогурт, Сырья, Тагашур, Вуж Ципья, Янгурчи гуртъёсты огазея. Татын уло пӧртэм национальностен адямиос. Туала дыре но поселение мукетъёсызлэсь висъяське куно карыны быгатэменыз, котькуд осконэн улӥсь муртэз одӥг сямен дунъяменыз. Татын гинэ одӥг гуртлы черк но мечеть но вань. Кылем арын гинэ ужаны кутскем нылпи сад вань улӥсьёс понна шумпотон луиз. Дано школаез, мурт городъёсын но тодмо луыны вутскем музеез но солэн визьмо, егит сюлэмо директорез Гарифзян Галиев гуртлэн данъяськонзы луо. Гурт калык понна вань луонлыкъёс кылдытӥсько, культура юрт, библиотека, дас пала вузаськон точкаос, больница, «Наз» реабилитационной центрлэн люкетэз пайдаё ужало. «Арбор», «Труд» обществоос, Ципьялэн трос удысъем жилищно-коммунальной хозяйствоез, «Балтасиагрохимсервислэн» Ципьяысь отрядэз но азинтӥсько.

Гуртлэн 490 хозяйствоез вань, 1615 адями лыдъяське.

- Самообложениен люкам уксё гуртлэсь улонзэ умоятонлы кошке. Калык сярысь сюлмаськыса, арлы быдэ урам сюресъёсы векчи из вӧлдӥськом. Нош адямилы ведь али ик лэсьтыса сёт. Та ужъёс ми бордысь гинэ уг пото, шол. Уж борды кутскем валась муртъёслэн юрттэменызы 315 сюрс уксё люкамы. Государствоен сётэм уксёен огъяса, 1 миллион 575 сюрс луиз. Таин тупатыны быгатӥмы Чайников но Тукай урамъёсты, - ивортӥз поселенилэн главаез Азат Нотфуллин.

Берло аръёсы уногес ужаны кутскемын пӧртэм программаосъя. Кылсярысь, «ПМК-5» организациен Вукогуртэ ву пыртӥськиз, Вуж Ципьяысь Арборка шур вамен потэм урамъёсы ву кыскемын, «Чылкыт ву» программая Ципьяын берло кык аре 3 скважина гудӟемын. Туннэ нуналэ 8 скважина пӧлысь 7-ез калыклы юрттэт сётэ, нош одӥгез запасын улэ. Озьы ик та программая Ципьяысь Школьной но Молодёжной урамъёсын лэсьтэмын выль скважина, башня, трасса, мукет сямен вераса, 2000 метр выль труба кыскемын. Та ужъёс быдэстэмын «Стройметиз» организациен. Озьы ик кык скважина, башня но выль трубаос лэсьтэмын вал Чайников урамын. «РАМИНВЕСТ-М» обществолэн кужыменыз ву пыртэмын Янгурчи гуртэ. Али лэсьтӥськись коркаосы но ву кыстӥське, туннэ нуналэ газ проект но ужаське вылэм.

Бадӟым саклык висъяське кулэяськись муртъёслы. Уноез коркаос лэсьтӥсько пӧртэм интыосысь юрттэт басьтыса. Кылсярысь, Вуж Ципьяысь Владислав Зайцевлы «Труд» обществолэн но гурт поселенилэн юрттэменыз пичи гинэ корка лэсьтыны быгатӥллям. Ачаликова Маргариталы, черкен огазеяськыса, чебер корка лэсьтыса сётӥллям.

Поселениысь котькуд Быдӟым Отечественной войнаысь ветеранъёслы но корка пуктэмын. Туннэ нуналлы Ципьяын кыкез гинэ ветеран улэп на. Гуртлэн тужгес но мӧйы улӥсез лыдъяське 97 аресъем Вера Петрова но «Дружба народов» музейлэн воштӥськисьтэм директорез Гарифзян Галиев. Нош самой пичиез - одӥг толэзьем Адель Гарифуллин.

Туала гуртлэн шулдыръяськонъёсаз кинэ гинэ уд адӟы: бигер, удмурт, узбек, чуваш, пор, ӟуч, поляк, цыган национальностен адямиос. Ваньзы соос огазеяськыса шулдыръяськыны быгато.
Гуртлэсь туссэ вуж коркаос сӧро кадь потэ шуыса, соослэсь азьпал «адӟонзэс» тодэме потыса вазиськи Азат Газизулловичлы. Соослэсь бадӟым кышкытлык ваемзэс умой валаськом, озьы ке но, али ми соосыз йӧтыны ум быгатӥське, пе. Гурт урамъёс понна кылкутӥсь адямиос вань, соос юртто, сыӵе коркаосты чакласа уло. Зэм, гурт поселенилэн кузёезлы кыӵе удысысь гинэ юрттэт кулэ уг луы, котькудаз шедё валась муртъёс: гурт хозяйствоя обществоос но вань, школа директоръёс но.

- «Труд», «Арбор» обществоослэн кузёоосынызы, Ципья но Арбор школа директоръёсын килэн вить чиньыосыз кадь ӵошен ужаськом. Малы ке шуоно гурт поселенилэн кужыменыз гинэ номыр ужаны ӧй луысал. «Балтасиагрохимсервислэн» Ципьяысь отрядэныз, «МДСУ-1», «Мелиоратор» обществоен огъя кыл шедьтыса ужаськом. Озьы ик район кивалтэтлэсь юрттэтсэ но шӧдыса улӥськом, - шуэ Азат Нотфуллин.

Гурт поселенилэн кивалтӥсезлэн бур киыз - Ольга Гаврилова - ас должностяз 2008-тӥ арысен ужа. Исполнительной комитетлэн кивалтӥсеныз Ильнур Галиевен вань ужъёсты ӵошен ужаськом, ог-огмылы юрттӥськом, пе.

Гурт поселение озьы ик узыр трос нылпиё семьяосыныз. Куинь нылпиен семья - 46, ньыль нылпиен - 3 семья лыдъяське. Светлана но Сергей Копаровъёс 5 пизэс будэто, Тамара но Фаиль Гафиуллинъёс - 6, Ольга но Василий Волковъёс - 14 пинал вордо. Вань татын «Ана даны - Материнская слава» медален пусйиськем анайёс но: Роза Аухадиева, Айгуль Зиннатуллина, Ольга Волкова, Антонида Давыдова. Тӥни кызьы улэ татын калык.

Залия ХАСАНОВА