Хезмәт

Балтач районы

16+
2024 - Гаилә елы
Азьлане

КАЛЫКЕЗ ОГАЗЕЯСЬ КУЖЫМ (+фоторепортаж)

Котьку сямен шулдыр ортчиз асьме удмурт лулчеберет праздникмы - «Гырон быдтон».

Кызьы ивортӥськеммы вал ини, «Гырон быдтон» праздник район масштабен кыкетӥ арзэ ортчытӥське. Туэ шулдыръяськонэз ортчытон Ӟаны котырысь гуртъёслы оскемын вал. Вераны кулэ, соос та кылкутымон ужпумез данэн быдэстӥзы. Ваньмыз туж умой радъямын вал. Инкуазь-Анаймы но шулдыр куазьзэ ӧз жаля. Шунды шорын пыжымон ке но вал, калыклы шулдыръяськыны со ӧз люкеты. Нимысьтыз пусъем потэ, ужрадэз ортчытон инты но туж умой быръемын вал шуыса. Пӧсь шунды сиослэсь саюло интые, писпуос, куакъёс пӧлы ватскыны луэ вал.

«Гырон быдтонлэн» одӥгез валтӥсь тодметэз - со нырез бичатыса возь вылэ ческыт зын вӧлмытӥсь ӝук. Ческытлэсь но ческыт пӧрмем вал ук ӝуксы. Но калык та праздникез кылдэ ньылымон ческыт ӝук, пыжем сиёнъёс но пайдаё турын чай понна гинэ ӧвӧл, нош солэн шара, шулдыр луэмез, мылысь-кыдысь ортчытӥськемез, калыкез огъя семьяе огазеяны быгатӥсь кужым луэмез понна яратэ.

Праздниклы кутскон сётыса, Быдӟым Инмарез данъяса Ципья черкогуртысь отец Георгий вӧсь кылъёс лыдӟиз. Собере люкаськем калыкез «Гырон быдтонэн» ӟечкыласа но ваньзэ умойзэ сӥзьыса кыл веразы Балтась ёрослэн тӧроез Рамиль Нутфуллин, исполкомлэн кивалтӥсезлэн воштӥсез Ильгам Гайнутдинов, Татарстанысь удмуртъёслэн «Кенеш» Огазеяськонзылэн тӧроез Андрей Герасимов, Ѓаны гурт поселенилэн кивалтӥсез Юрий Перфилов но асьме ёросысь удмуртъёслэн азьветлӥсьсы Леонид Сапожников. Сцена вылэ ӧтьыса сӥё-дано каризы интыысь азьветлӥсьёсты, гуртысь адӟем карымон адямиосты. Соос пӧлын трос аръёс ӵоже Ӟаны школаын директор луыса ужам Иван Васильевич Ермаков, Ӟаны школаысь шаертодонъя музеен кивалтӥсь, дышетӥсь Василий Петрович Никитин, лулысь-сюлмысь «Азьлане» газетэн кема аръёс ӵоже кивалтыса удмуртлыкез азинтонэ, лул ваньбурмес узыртонэ бадӟым люкет пыртэм Александр Михайлович Кунаев но вань вал.

Вунэтоно ӧвӧл: «Гырон быдтон» - со гурт ужасез, музъем ужасез, солэсь ужзэ данъясь праздник. Соин но гуртын мылысь-кыдысь тыршись адямиос сценаын дано инты басьто. Мукет аръёслэсь висъяськыса, туэ «Гырон быдтонын» тракторъёслэн парадзы ортчиз. Воргоронъёс, асьсэлэн пичи тракторъёсынызы майданэз котыртыса, калыкез паймытӥзы.
Со сяна, ужрадэз радъясьёс кема аръёс ӵоже валче тупаса улэм кузпалъёс сярысь но вунэтӥллямтэ. Соосты но сцена вылэ ӧтьыса нимысьтыз синпель кузьымъёсын шумпоттӥзы. Арлыдо кузпалъёслэн кенешъёссы-сӥзёнъёссы егит кузпалъёслы - берпум вордскем нуныослэн анай-атайёссылы (соосты но сцена вылэ ӧтиллям вал) - но визьнод басьтымон луизы, дыр, шуыса малпасько.

Нош кыӵе праздник луоз, пе, кырӟан-эктонтэк. Со ласянь асьмелэн данъяськыны инъетмы вань. Угось удмурт калык кырӟаны но, эктыны но туж усто. Калыклы умой мылкыд кузьмазы ёросысьтымы самодеятельной коллективъёс но Удмурт Элькунысь Кияса ёросысь «Ерпечкаос». Соос асьсэлэн шулдыр, сюлме пыӵась кырӟанъёсынызы праздниклы аспӧртэмлыко шӧм ватсазы.
Шулдыр крезьгур улсын пӧртэм тунсыко шудонъёс, вожвылъяськонъёс ортчытӥськизы. Пусйыны кулэ, кузьымъёс но туж ӟечесь вал шуыса. Калык мылысь-кыдысь та ужрадъёсы пыриськиз: гӧршок но пыргытӥз, возь вылтӥ куасэн но бызьылӥз, бодыен кыстаськиз, пичи дырысь шудонэз тодаз вайыса, дас кык чаракаен но шудӥз, гынсапегъёсты но куяз, курегпуз но питыръяз...
Пиналъёс синъёссэс думыса арбери но вандылӥзы, пал пыд вылазы сылыса пуйыен жугиськизы, пуйыен бызьылӥзы. Егит пиос, воргоронъёс но нылкышноос пӧлын ки кужымез мертанъя, отжимание лэсьтонъя вожвылъяськонъёс ортчытӥськизы. «Гырон быдтонлэн» эшшо одӥг аспӧртэмлыкез - атас кутон. Атасэд но паймытӥз, ужаса сие шуиз кадь. Возьвылэз котыръяса, куакъёс, писпуос пӧлы пыраса бызьылӥз уга! Но атаслэсь чырткем воргорон шедиз ик - Сизнер гуртысь Иван Антонов быгатӥз кутыны шаян тылобурдоез. (Юртамы атасмы ӧвӧл, шуэм вал. Курегъёсыз шумпотозы ини).

Тӥни озьы, ар ӵожелы тырмымон капчи мылкыд, сайкыт тодэ ваёнъёс кельтыса, шулдыр но аспӧртэмлыко ортчиз туэез но «Гырон быдтон».

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: 250