Калыкъёслэн огазе луэмзы тупаса улонэ вуттэ

Татын вань калыкъёс огазе эшъяськыса но тыршыса уло, гуртлэн азинсконаз трос кужым пырто.
— Ципья гурт поселениез ке учконо, татын бигерез но, порез но, удмуртэз но, ӟучез но валче эшъяськыса уло. Ми калыкъёсты ум люкиське. Вань праздникъёсты огазе пусйиськом. Котькуд удысын тыршисьёсмы кужмоесь, ортчись ужрадъёсты рос-прос дасяло, асьсэос ик калыкез но люкало. Трос калыко поселениын ужаны секыт шуид ке, солэн аслаз плюсъёсыз но вань. Кылсярысь, милям туж трос праздникъёсмы ортчо. Котькудаз аслаз кылкутӥсь адямиосыз но вань. Котькуд калык нимысьтыз саклыкез куре ук, котькудӥзлэн аслаз сям-йылолъёсыз, калык праздникъёсыз. Соин нокинэ палэнэ ум кельтӥське. Азьланяз но калыкъёсмы куспын эшъяськон мед луоз кадь потэ, — ивортэ Ципья гурт поселенилэн кивалтэтэз.
Нош кызьы калыкез огазе люканы луэ? Кызьы калыкъёсты висъятэк, ваньзылы огкадь саклык висъяно? Та юанъёслы валэктон шедьтыны луэ Ципья гуртысь лулчеберетъя юртын. Татын сюлмысь ужало Елена Демеева но Евгения Михайлова, кудъёсыз Ципья калыкез огазе герӟало. Елена Александровна Ципья лулчеберетъя юртэн 2022 арысен кивалтэ, нош Евгения Петровна — устолыкъя кивалтӥсь — татын ини 10 арлэсь трос тырше. 
Лулчеберет удысэз басьтоно ке, татын эктон-кырӟанъёс гинэ азьпал радэ уг пото, татын мерлыко ужъёсты но быдэстоно, арлыдоосын но кусып возёно, егитъёсты но тунсыкъяськытоно, калыкез но шулдыртоно, мылкыдзэс капчиятоно. Ваньмыз та нылкышноослэн пельпумъёсазы усе. Лулчеберетэн герӟаськем ужрадъёс сяна, татын нимысьтыз ожгар операция ортчон интые лэзён понна сетьёсты но пуно ай.
— Туннэ нуналлы лулчеберетъя юртамы бадӟымъёслэн удмурт фольклоръя «Зангари» коллективезы, пиналъёслэн «Азвесь гырлы» удмурт хореографической коллективзы, «Ципья зоутъёс» удмурт вокальной трио, выльдэм составен «Туганай» крашин фольклор ансамбль, мызганчиослэн «Дуслык» ансамбльзы, пичиослэн «Радуга» хореографической коллективзы но «Лейсэн» вокальной ансамбльзы ужало. Ципья гуртын калык кемаласен ини трос йӧскалыкъем луыса, эшлыко улӥз. Туннэ нуналозь но озьы со. Котькуд ужрадэз ми котьку но куинь кылын ӟечъяськыса кутскиськом: бигерен, ӟучен но удмуртэн. Та милям вирамы пыӵамын ини. Нош валтӥсь люкетсэ ваньзылы валамон медло шуыса котьку ӟуч кылын нуыны тыршиськом ини. Кылсярысь, концерт луиз ке, ми котьку Ципья гуртын улӥсь калыкъёслэсь эктон-кырӟанъёссэс пыртыны тыршиськом. Милям малпаммыя, та туж кулэ, — лулчеберетъя юртлэн ужъёсыз сярысь веранзэ кутскиз Евгения Петровна.
— Туала дыре асьмеос туж трос вераськом калыкъёслэн эшъяськонзы сярысь. Нош лулчеберет удысэз учконо ке, кызьы Ципья гуртын куспазы эшлыко уло пӧртэм калыкъёс? Котькудӥз ассэ вылӥегес ӝутыны медэ, дыр, ук?
— Нациос пӧлын ог-огзэс гажан вань ке, лулчеберетын но озьы ик мынэ со, та ог-огенызы озьы герӟаськемын ини. Мукет калыклэсь кылзэ но лулчеберетсэ, сям-йылолъёссэ тодӥськод ке, ужаны но улыны туж капчи. Ми калыкъёсты ум люкиське ук. Кылсярысь, кин ке мылкыд каре ке удмуртэн кырӟаны, ми солы луонлык сётӥськом, маин ке юрттӥськом, потэ ке солэн бигерен яке ӟучен эктэмез, ми шумпотӥськом гинэ. Сцена котькинлы усьтэмын. Лыкты но быгатонлыкъёстэ паськытаты. Пичи дырысен нылпиос асьсэлэсь кылзэс гажаса но валаса будӥзы ке, со туж умой. Ципья гуртын тросэз куинь кылэз тодэ. Та эшшо но бадӟымгес луонлыкъёс сётэ. Нош милемлы, лулчеберет удысын ужасьёслы, сыӵе мыло-кыдо пыриськись адямиос луизы ке, шумпотон гинэ, — азьланьто веранзэс Елена Александровна но Евгения Петровна. 
— Мукет гуртъёсын ӵошатоно ке, тӥляд егитъёсты но тросгес. Соос пӧлын шӧдӥсько-а калыкъёсты люкон мылкыдъёс яке калык пӧртэмлыкъёс?
— Зэмзэ вераса, та юан пумысен малпаськеммы но ӧвӧл. Малы ке шуоно егитъёсмы йӧскалыкъя асьсэды уг люко, соос ваньзы пичиысен валче шудыса будо, ог-огзылэсь кылзэс но лулчеберетсэс тодо. Нош нылпи садысен ини нылпиослы калыкъёслы гажан но валан мылкыдъёсты пыӵато. Кылсярысь, лулчеберетъя юртамы арлы быдэ Ымусьтон праздникез ортчытӥськом. Та празднике православной осконэн улӥсь нылпиос гинэ уг лыкто, мусульман осконэн улӥсь нылпиос но вуо. Нош Сабантуй но Гырон-быдтон йӧскалык праздникъёс сярысь веранэз но ӧвӧл. Вань калыкъёс эшъяськыса уло шуыса, ми туж шумпотӥськом. 
— Кельше-а тӥледлы бадӟым но трос йӧскалыкъем гуртын ужаны? Кызьы та ужды радъяське? Кыӵе шуг-секытъёсын пумиськоно луиськоды?
— Веранэз ик ӧвӧл, трос йӧскалыкъем калыкен ужаны секытгес. Ведь котьку ик малпаськоно, кызьы та калыкез палэнэ кельтоно ӧвӧл, кызьы тазэ шулдыртоно, кызьы тазэ ӝоже уськытоно ӧвӧл. Со понна та поселениын улӥсь калыкъёслэсь эктон-кырӟанъёссэс, сям-йылолъёссэс, праздникъёссэс тодоно, тунсыкъяськоно. Шуг-секытъёс котькуд ужын пумисько, сотэк уж азьлань уг мыны. Но тонэн артэ юрттыны дась луись калык вань ке, вань секытъёсты капчиен вормыны луэ. Кылсярысь, мыным та уж ӧй кельшысал ке, мон дас ар ӵоже та ужын ӧй ӝегатскысал ини. Лулчеберет юртын ужан — со калыкен уж нырысь ик. Огнад номыр лэсьтыны уг лу, соин ми котьку калыкен ӵош. Озьы ик котьку библиотекаен, музеен, школаен, нылпи садэн ужаны тыршиськом, «Наз» реабилитационной центре но ӵемысь вуылӥськом. Тани толон гинэ (вераськонмы 29 коньывуонэ вал — ред.) центрлэсь 20 ар тырмонзэ пусйим. Озьы ик толон музеямы «Ак калфак» организацилэн улоскуспо слётэз ортчиз. Татчы но пыриським. Огъя вераса, ужмы трос, ваньмаз вутско.
Калык огазеяськон — со огшоры веран гинэ ӧвӧл. Туннэ нуналэ со зэмзэ но азьпал радын сылӥсь валатон. Калыкъёс огазе луыса гинэ вань шуг-секытъёсты вормыны быгато. Тае ик валэктэ нимысьтыз юнматэм нунал но.
— Учырен пайдаяськыса, лулчеберетъя юртысь ужрадъёсы мыло-кыдо пыриськисьёслы бадӟым тау шуэммы потэ. Малы ке шуоно валтӥсь ужзы бере соос репетициосы лыкто. Соостэк милям одӥг ужрадмы но, концертмы но уг ортчы. Ваньзылы сӥзиськом тазалык, тынӥсь улон но ваньзэ умойзэ гинэ.

Автор: Юлия Щербакова
Фото: Евгения Михайлова