Каръян егит дыры но фронтысь куинь сэрего гожтэт

Мынам пичи дыры ортчиз Быдӟым ожмаськон вакытэ. Атай ветеринар луыса ужам. Тулыс ву тудӟыку коласькыса-коласькыса ветлэм ветпунктэ, висись валэз эмъяны. Кезьыт пыӵамен сэрен висьыса кулэм. Атай кулыку мыным кык арес но вылымтэ, тямыс нылпиос пӧлысь куинь апай-сузэръёс гинэ улэп кылиськеммы. Анаймы, Петыр Наталья, туж шаплы вылэм, секыт улонлэн куронэз сыӵе вал, дыр. Со кышкатэк ворттылэм борӟемен, вуко арык вамен уяса потам. Сапег но лэсьтыны дышем, нырысетӥ лэсьтэм пичи сапегез туж вольыт пӧрмем. Бабаймы базарысь бертэм бераз паймем сыӵе ӟеч сапег лэсьтэмезлы, йырзэ бергатъяса ик ушъям анайлэсь ужзэ. Бератаз воргоронъёслы но сапег лэсьтылэм. Москвае но басьтылӥзы, пе, сапегъёссэ. Анаймы ачиз туж задор вал, милемыз но туж чурыт будэтӥз.

Жугиськонэ куинь центнер картофка, ӟазег, курег но мукет сиёнъёс сётоно вал. Милемлы, рос-прос сиён ӧз деты, ӵем дыръя кӧт сюмаса улӥм. Огпол адӟи эшъёсылэсь тэркы-пуньыосын урамтӥ васькемзэс. Кытчы озьы мынӥськоды шуыса юамелы валэктӥзы: «Амбарын ужась анайёсмылы туннэ кӧжыпог пӧзьто, отчы мынӥськом». Кӧжы кутсан нуналэ котьку но кӧжыпог пӧзьто вал. Ми но тэркы-пуньыосын ваським. Анай милемлы одӥг пуньы но кӧжыпог ӧз сёты, сютэм дыръя туж сиеммы потӥз ке но. Со куспын гидкуазе куасьтыны вӧлдэм турыммес скал сием но, лёганы но вуттэм. Кинлы кӧжыпог, нош милемлы кӧжыпог ӧз деты, скалмы турымез изъянтэмез понна писэн детӥз. Кулэ дыръяз тыш но, жалян но сюрылӥз. Нош внукъёссэ но правнукъёссэ анай орчыт яратӥз, вань курон-косонъёссэс быдэсъяз. Пересь ни мон шуыса ӧз улы, кунян но кариськылӥз, пуны-коӵыш но луылӥз соосын шудыкуз.

9-тӥ классэз йылпумъяны ӧз кылды. Дышетскон арбериосмес дэра сумкае тырыса, яке кышетэ думыса школае ветлӥмы. Ньылетӥ классын дышетскыку школае мынон азьын, ӵукна ик султыса, нюлэскысь пу вайыса вуттӥмы. Куддыр уроке бере кыльыса вуылӥм, дышетӥсь тышкаське вал. Яке, школае сразу бычкыен мынӥськом вал но урокъёс бере, куддыр пегаса но, нюлэскысь жерда вандыса вайылӥм.

Дышетскисьёс машинаен Шеморданэ ю тысь нуллӥзы. Секыт мешокъёсты ӝужыт интые тубытъяса ӝоктылӥмы. Кӧламы машинаын ик. Кӧргеме пыдын ветлӥмы етӥн ишкыны. Куспамы ӵошатскон радъямы: кудӥз группалэн культоез ӟеч пӧрмоз, кабанэз чебер сюриськоз. Бусыысь юосты сюрлоен киын аранэ но пыриським. Бадӟым кырмыса араны тыршыса киосмы зӧк тӧрнало вал. Выль кенъёс сюлыкен аразы, соослы одно ик сюлыкен ветлоно вал. Куд-огез пӧсьлы чидатэк сюлыксэс культо пушкы ватылӥзы. Арасьёс пӧсь куазен но ыжгон пыдпононэн ветлӥзы, бӧрысь ини дэралэсь вуризы. Гурт пумысь ӵыпетысь кошкись вуэн ужась кутсаськон машинаен ужамы. Комбайнлэн копителяз кык ӵошен, кыкнапалаз султыса, куроез тупатъяса тырим. Ужамтэ ужмы ӧз кыльы, ваньзэ тыршыса, кужыммес жалятэк ужамы. Тросэзлэн тазалыксы куашказ сютэм но секыт ужаса, Лиза апае но амбарын ужакуз сӧсырмыны шедиз.

Онтон агаймес (бабаймылэн пиез) жугиськонэ басьтӥзы. Фронтысь гожтэтсэ али но утьыса возиськом. Анай но, ми но туж яратӥськом но гажаськом вал ӟеч, лякыт сямо Онтон агаймес. Туж сюлмаськимы солэн дӥськутэз чылкыт но ӝикыт мед луоз шуыса. Эшъёсыз но паймо вал айшетэз но ыштырез котьку чылк-чылк миськемын луэ шуыса. Нош бабаймы лек вал, милемыз ӵем жугылӥз. Онтон агай милемыз котьку утиз солэсь, сюдыны сюлмаськиз, дурбасьтылӥз: «Соос ведь сюты нылпиос ӧвӧл, малы атай нылпиосты кур кариськод», — шуылӥз.

Бусыын валэн гырыкуз Онтон агайлы ожмаськонэ повестка ваем юлтошез. Валэзлэсь серметсэ басьтэм, сарвылаз чабкем но гуртэ лэзем. Табере ожысь бертон уз деты ини шуыса бусыысь бертыса кошкем. Анайлы, апаезлы кышет сётыса кельтӥз, мыным но апайлы вуэм шундыберган йыр сётыса кельтӥз жугиськонэ кошкыкуз. Польшае вуытозь ож сюресэз ортчем, вормон нунал но матын вылэм ни. Похоронкаез вуэм бере ваньмы туж бӧрдӥмы. Анай ӵем-ӵем лыдӟыны косӥз Онтон агайлэсь гожтэтсэ.

Тани со куинь сэрего фронтысь ыстэм гожтэт, кызьы гожтэмын озьы ик сётӥськом.

Зеча мотора улиськоды эшъёс кутскисько гожтэт гожтыны эшъёс тиледыз тодам уськытыса, унолись но салам верасько. Малы бен кенак кыче ивордэс ивортыса уд лэзиське. Кенак мон тиледыз тодам уськытыса  пичи кине посулка лэзем вал сое басьтиды ке вераса лэзьы или сюрес выле быдмиз медам. Вот кенак Марияен Зинкаез кизьы ке но дышетыны туртты ява. И Лизаез секыт ужаны ен лезы колхозлись ужзэ ужаса уд быкты. Кенак тон мон пона ен сюлмаськы. Мар гине куле мар гине сиид мар гине юид со вань. Но толко соиз начар изверен тушан но матын минутэн секундэн быдмемез витьыса гине улиськом. Ой кенак моне вордытос мерты вал укно улад улмопуде сясказэ ускыса улысалд др кенак. Мон справка лезем вал сое басьтида. Мынам юлтошеслен кинлен иворыз ван, кинлен иворез овол сое вераса лэзьы ява. Сион палти кече улиськод сое но вераса лэзьы скалдес вордиськода али. Мон уно уг гожтиськы пичи гине зеч ивор лезисько

Ну пока зеч луе зеч уле мон пока та минутын сол таза килисько.

Та гожтетез лезе сузэръёсы шуттэм пичи агайды тиледыз тодаз уськытыса.

5./III 45г.

Петыр Зина апай Кузнецовалэсь верамзэ гожтӥз

Вера Лобанова

Вукогурт