«Кин кытчы, нош ми Башкирие»

Инвожо толэзь, тужгес но солэн берпуметӥ арняез, праздникъёслы, калык шулдыръяськонъёслы узыр луиз. Толэзь кутсконын гуртъёсын Сабантуйёс, ортчизы, собере ёрос «Гырон быдтон», гуртъёслэн нуналъёссы, Семык. 29-тӥ инвожое пусйимы Элькун «Гырон быдтонмес», кудӥз радъяськиз Менделеевск ёросысь Тэремшур гуртын. 29-тӥ инвожое ик ортчиз вашкала удмурт гуръёсъя «Чакара» фестиваль но. Туэ со луиз Башкортостанысь Янаул карын. Ӵапак отчы, кыдёкын сюресэз матын карыса, вуылэм Турья гуртысь «Марӟан» ансамбль. Кызьы ветлыса бертӥллям, мар адӟиллям, ма соосты тунсыкъяськытэм, синмаськытэм башкир музъемын вера ансамбльлэн но Вуж Турья гурт клублэн кивалтӥсез Ирина Исьмекова:

— Со туж секыт напряжённой арня вал. 29-тӥ инвожое ик Малмыжын Сабантуй, Менделеевскын «Гырон быдтон» ортче вал бере, автобус луоз шуыса, милемыз оскытыны ӧз быгатэ. Юрттӥз «Борнак» обществолэн кивалтӥсез Назипов Рафкат Накипович. Ёросысь лулчеберетъя ёзэтлэн кивалтӥсеныз кенешизы но огкылэ вуизы: Ильназ Ильич автобус шедьтӥз, Рафкат Накипович сюрес дунэз тыриз. Соин нырысь ик соослы туж бадӟым тау кылъёсме верасько. Рафкат Накиповичлы нимысьтыз тау, куронэн вазиськыку, огпол но отказ уг кары, котьку юрттэ. 

Сюрес вылэ потӥмы уйин. Сизьым час мынӥмы, Белая шуыса нимаськем шур вамен переправая потӥмы. Милемыз туж шуныт пумитазы, матысь кунооссэс кадь сюдӥзы-вордӥзы! Сюанлы кадь дасяськиллям вал. Куинь пол сюдӥзы. Маиз паймытӥз: асьмелэн ӵемысь шатёр формаен палаткаос дасяло ук куноосты пумитан понна, нош отын юртаос дасяллям. Со юртаос пушкысен чылкак удмурт сямен радъямын-чеберъямын вал. Туж кельшиз, туж тунсыко адске. 

Нош кӧня сиёнэн пуртыос сыло вал! Кинъёс со пуртыос азьын сыло шуыса малпаськоды? Воргоронъёс! Ми понна со паймымон вал. 

Фестивале Россилэн пӧртэм сэрегъёсысьтыз удмуртъёс вуизы: Татарстанысь, Пермь шаерысь, Свердловск, Киров, Тюмень, Челябинск, Иркутск но Курган улосвылъёсысь, Ханты-Манси автономной округысь, Москваысь но Санкт-Петербургысь. Котькудӥз коллектив аслэсьтыз аспӧртэмлыко луэмзэ возьматыны тыршиз, аутентичной костюменыз висъяськиз. Ми шошма удмуртъёслэсь возьвыл шудонзэс возьматӥмы. 

Ансамбльмылы котьку сямен Кушкет гуртысь мызганчи Алексей Павлов юрттӥз, туж бадӟым тау солы, котьку куара кылзэ, ӟеч лэсьтэмез аслыз но ӟечен мед берытскоз. Генриетта но Алексей Павловъёс, асьсэос но Кушкет гуртлэсь данзэ утьыса, фестивале пыриськизы, туж умой выступить каризы. 

Учырен пайдаяськыса, ансамбле ветлӥсь нылъёсылы но таукарон кылъёсме верасько, тазалык но семья шудбур сӥзисько.