Кин тросгес?

Арлы быдэ та нуналэз пусъёнэ тросгес но тросгес адямиос пырисько. 

Удмурт кыллэн нуналаз дуннеллэн пӧртэм сэрегъёсаз ортчыло сӥё-дано но шулдыръяськон ужрадъёс: удмурт кыллэн историезлы сӥзем адӟытонъёс, викторинаос, тунсыко лекциос, нимысьтыз та нуналлы дасяло крезьгуро программаос, тематической экскурсиос, пӧртэм мастер-классъёс. Библиотекаосын радъяло выль авторъёсын но выль книгаосын тодматон ӝытъёс.

Удмурт кыллэсь нуналзэ асьме ёросысь культура юртъёсын, лыдӟиськонниосын, школаосын но пусъё.

Покчи Лӧзя школа арлы быдэ та дано нуналэз аспӧртэмлыко пусйыны тырше. 27-тӥ шуркынмонэ вазь ӵукна ик дышетӥсьёсты но дышетскисьёсты ческыт кузьымен пумитазы. Озьы ик та нуналэ нылпиос пӧлын «Кин тросгес?» шуыса нимаськем акция радъяськиз. Со ньыль номинациосъя ортчиз: «Удмурт кылэз яратӥсь класс», «Тужгес но удмуртлыко класс», «Удмурт кыллэн визьлюкез» но «5-лы гинэ дышетскись». Котькуд номинациын вормем классъёс дипломъёсын пусйиськизы. 

Собере удмурт кылъя но литературая дышетӥсь Наталия Антонова 10-тӥ классын дышетскисьёсын ӵош ортчытӥз «Вераськом анай кылынымы» акция. Школаын, урамын, магазинъёсын, почта ёзын но фельдшер-акушер пунктын луыса, соос Удмурт кыллэн нуналэз сярысь веразы, удмурт пужыен значокъёс кузьмазы.