Кинлэн куараез сюлэмез буйгатэ?

Соослэн кырӟанъёссы но эктонъёссы реабилитаци ортчыны лыктэмъёслэсь мылкыдзэс ӝуто но бервыло емышъёссэ сёто.

Ципья гуртысь «Наз» социально-реабилитационной центрез быдэс республикаын тодо ини. Татчы бускель ёросъёсысь гинэ уг лыкто, мукет элькунъёсысь но вуо. Юнме шорысь ӧвӧл, дыр. Ужасьёслэн шуныт мылкыдо но котьку юрттэт сётыны дась луэмзы адямиез бордаз кыске. Вылӥ квалификациен ужасьёс нуналлы быдэ адямиосты пыд йылазы йӧн-йӧн сылыны дышето, мерлыкын асьсэды утялтыны мед быгатозы шуыса тыршо.

Соослэсь дырзэс шулдыр карон понна ик ёросысь лулчеберетъя юртъёсысь но гурт клубъёсысь коллективъёс лыкто. 15 пӧсьтолэзе таӵе концерт ортчытӥзы Ӟаны лулчеберетъя юртысь но Вуж Кушкет гурт клубысь огазеям коллективъёс. Гужем пӧсь нуналэ концерт но педлон, чылкыт омырын радъяськиз. Центре ветлӥсьёс сяна, татчы ӧтемын вал нимысьтыз ожгар операцие пыриськисьёслэн нылпиоссы но. Концерт аспӧртэмлыко шудон-эстафетаен пӧлэстӥськыса мынӥз.

Республикаысь ӟеч-лэсьтонъя (благотворительной) фондлэн кивалтӥсез Нурания Сайфутдинова кузпалэныз ӵош центрлы дурбасьтыса, радъям празднике ческыт арбериосын, кузьымъёсын но коркан будӥсь сяськаосын лыктӥзы, та сяськаосты центре ветлӥсь кышномуртъёслы кузьмазы. 

Шулдыр но пуштросо ужрад бере ваньзэсты табанен но чаен куноязы. Чылкыт омырын та эшшо но ческыт шӧдӥськиз. Ваньзы сюлмысь шулдыръяськыса, эктыса, ог-огзылы мылкыдзэс ӝутӥзы.

Висён бере йӧнатскон сотэк но капчиен уг сётскы, нош таӵе центр луыку, со шӧдӥськытэк ик кыле, дыр. Таӵе ужрадъёсты радъясьёслы, спонсоръёслы бадӟым тау. Азьланяз но центр бервыло мед ужалоз, адямиослы пайда мед ваёз.