«Кӧня ми сое тодӥськомы, со весь кубызэн шудӥз»

Газетамы («Азьлане» № 29) кубызчиос сярысь статья потэм бере, валамон луиз: ёросысьтымы котькудаз сямен удмурт гуртын аслаз кубызчиез луэм, нош куд-ог гуртъёсын одӥг гинэ но ӧвӧл, кӧня ке. Но, жаляса верано, тросэз соос асьме понна тодмотэм луыса кылё, ёросамы экспедициосын вуылэм тодосчиослэн ужъёсазы но соос пусъемын ӧвӧл. Одӥгез сыӵе кубызчи — Сизнер гуртысь Сергеев Анатолий Павлович.

— Атаймы, Сергеев Анатолий Павлович, вордске 26-тӥ тулыспалэ 1932-тӥ арын Балтась ёросысь Сизнер гуртын. Мария Ларионовна но Павел Сергеевич Сергеевъёслэн семьяязы со кыкетӥ нылпи луэ. Дышетске Сизнер школаын, йылпумъя 4 класс. Атайзэ 1942-тӥ арын жугиськонэ басьто, анайзы кыле ньыль нылпиен. Собере атайлы дышетскон уг йӧты ини, пиналъёс ужало колхозын анаенызы ӵош. Атайзы со арын ик бырыны шеде, пичи Анатолийлы анаезлы юрттыны тупа, со пичиысен ик валэн ветлыны, ужаны кутске. Быдэ вуэм бераз армие мынэ. Куинь ар ӵоже служить каре Дальней Востокын. Курильской шормуӵе вуылэ. Службазэ рос-прос быдэсъя. Воинской частязы атаез, сиён умой пӧраны быгатэмысьтыз, повар каро. Валэн усто кивалтыны быгатэмзэ лыдэ басьтыса, солы частьлэсь валзэ утьыны оско. 

Армиысь бертэмез бере атай колхозэ ик ужаны кыле, малы ке шуоно соослы кошкыны паспорт уг сёто (анаен атай кузпалъяськемзы бере кошкыны туртто вылэм). Пенсие потытозяз тырше со колхозын. Ю-нянь октон дыръя комбайнэн ужа. Колхозысен нюлэскы пу кораны лэзё вал, эшшо сапег лэсьтэ вал со, кудыос кутазы. 

Приволжской округын 1972-тӥ арын туж кужмо нюлэсъёс ӝуало, атаймес но отчы военкоматысен нюлэс кысыны ысто. Отын луэмез понна грамотаосыз но вань солэн.

Анаенымы, Ольга кышноеныз, вордӥзы вить нылъёсты. Нырысетӥ вордскем пизы вордскем бераз ик кулэм. Собере Инмар пи сётымтэ ини соослы. 

Кема улыны ӧз кылды анаен атайлы. Анай кулӥз 1995-тӥ арын 4 инвожое. Кышноез кулэм бере, атайлы инсульт луиз но одӥг арскын, 22-тӥ пӧсьтолэзе 1996-тӥ арын, ачиз но та дуннеысь кошкиз.

Кӧня ми атаймес тодӥськомы, со весь кубызэн шудӥз. Сюанъёс азьло кубызтэк ортчытӥллямтэ, валлян даурын огзы доры огзы юмшаса ветлӥллям, шулдыр улӥллям. 1988-1989-тӥ аръёсы УдГУ-ысен финн-угор делегация лыктӥз, нимысьтыз ӧтизы вал съёмкае, видео уськытӥзы, атай кубызэн, Зоя апай (бускельмы) балалайкаен, анай удмурт дӥсен, — тодэ ваёнъёссэ улӟытэ Анатолий агайлэн Анфиса нылыз. 

Кинлэсь но ку Анатолий Павлович кубызэн шудыны дышетскем, тодмо ӧвӧл. Но улытозяз солэн кӧня ке кубызэз луэм. Берпуметӥзэ Мария нылыз басьтыса сётэм.

— Мон та кубызэз атайлы Вятской Полянаысен 1986-тӥ арын вайи, — атаезлэсь крезьгуро инструментсэ возьматыса вера Мария Анатольевна. — Кубызэз сӧриськиз, лӧптӥськыса быдмиз но атай сюлмаськонэ усиз: «Кубызэ ӧвӧл ни таре мынам», — шуиз. Басьтэм кубыз вал соиз но, клеез начар луэм-а, мар-а, — лӧптӥськиз со солэн. Мон Полянаын ужаны кутски но нырысетӥ уждунэным атайлы выль кубыз басьтыса вайи. Соин со мыным аслым но туж дуно, кадырласа гинэ возисько мон сое. Атай кулэм бере дорам вайи, али но гуртысьтымы библиотекалэн музеяз со. Смычокез но, сиез но быдме ини. «Куараез золгес мед потоз шуыса, валлэсь быжзэ-а, йырсизэ-а карнано татчы, нылы», — шуэ вал атай мыным. Пичи дыръя котыраз бергаськомы вал. Маин ке но зыра вал али со смычоксэ. «Атай, марлы зыраськод?», — юаськом вал. «Тае зырад ке, куараез мотор потэ солэн», — шуэ вал со. 

Атай кубызэн шудыку, анай зоутэн кырӟа вал. Солэн куараез туж чебер вал. Атай ачиз ӵемысь солдат кырӟанъёсты кырӟаны яратылӥз. 

— Кубыз сяна, милям балалайка но вань вал, соин анай шудылэ вал куддыр. Кудмы ке но быгатомы шуыса, вылды, мызган но басьтыса сётӥз атай милемлы. Чебер гинэ горд пыръем мызган вал со. Пичи дыръя шумпотыса кыскамы ке но сое, вить нылъёс пӧлысь одӥгмы но соин шудыны ӧм пӧрмытэ. Жаляса верано луиськом, инструмент луыса но, крезьгурлы ӧм дышетске. Талант но луымтэ, дыр, ини, — жалян мылкыдзэ ватытэк вера Мария Анатольевна.

Бен, котьмалы быгатон но кулэ карон кулэ уга. Кин тодэ, оло, Сергеев Анатолий Павловичлэсь выжызэ азинтӥсьёс пӧлын но куке кубызэн тунсыкъяськисьёс шедёзы. Туж умой луысал.