«Коррупцилы шуом «Ӧвӧл!»

Туала дыре коррупция улонамы одӥгез валтӥсь ужпум-висён луэ. Азьло дыре асьме пӧлын «коррупция» кылэз тодӥсез ик ӧй вал, дыр. Нош али «коррупция» кыл ӵемгес но ӵемгес пумиськыны кутскиз. Интернет вотэсэ пырид ке, котькытын со кыл. Пичи пиналысен кутскыса, арлыдоосыз дорозь со сярысь пӧртэм гаджетъёс пыр лыдӟо-чаклало, кенешо но эчешо.

    Нош кытысь со потэмын? Кытысен кутске солэн инъетэз? Историез бугыръяно ке, солэн выжыосыз туж пыдло кошкемын. «Коррупция» валан дунне вылысь вань калыкъёс пӧлы вӧлмемын. Асьме кунэнымы ӵошатыку, дунне вылын вань   вылэм кунъёс, кытын коррупциен герӟаськем ужъёс трослы ӧжыт. Кылсярысь, Даниын но Финляндиын. Но, жаляса верано, Россиын со данаклы трос. Озьы ке но, Д.А.Медведевлэн верамезъя «Асьмеос мукет кунъёс шоры чиньыен возьматыны кулэ ӧвӧл, соослэн коррупцизы ӧвӧл шуыса, нырысь ик асьме кунмы пушкысь ужпумъёсмес  быдэстыны кулэ».

Та верамен мон быдэсак соглаш. Коррупция темая калыкын юн эчешон, бугыръяськон ужъёс мыно, кудъёсыз вылӥ кивалтӥсьёсты но кивалтэтэз янгыше уськыто. Берло дыре адямилэн улоназ нырысетӥ интые потыны  кутскиз узырлык. Коньдонлэн пуштросэз пайда(кузьым) поттонлы пӧрмиз. Али дыре со улонлэн пӧртэм удысъёсаз алямын. Кыллюкамысь лыдӟыса, мон таӵе валанэ вуи: «Коррупция - со калыкен бырйыса оскем кивалтӥсьлэн яке огшоры адямилэн аслыз пайдаен быдэстон вылысь «кузьымо» ужез яке кыӵе ке луонлыкез».

Ас вакытазы асьме кунамы соин нюръяськон ужъёс нуизы Иван Грозный но Пётр I эксэйёс, Совето властьлэн Вылӥ кивалтӥсез И.В.Сталин но. Асьме дыре гижысь-пиньысь нюръяськон уж нуэ Россилэн азьмуртэз В.В.Путин но солэн    юртттӥсез Д.А.Медведев. Ваньзэ вераны кутскид ке, уен нуналэз но сураны луоно?! Тужгес но сюлэмшугъяськытӥсез луэ туннэ нуналлы: Россия но Украина вискын нимысьтыз военной операция. Туэ тулыс Обороная Министерствоысь Кивалтэтын, В.В.Путинлэн сак эскерон ужъёс нуэмез улсын, туж бадӟым коррупционной ужъёс шараямын, вылӥ военной чиновникъёс ужысьтызы палэнтэмын. Нош кӧняез сыӵе ужъёс «вотэс» пушкын на.

Куинетӥ арзэ  мынэ ни та лек ожгар. Кӧня мобилизовать карем но контрактэн шаермес утьыны кошкем воргоронъёс. Берло дыре гуртъёсы ӵемысь вуыло кулэм сярысь секыт иворъёс. Кӧня егит пиосмы кышнояськытэк быро, кӧня семья кузпалтэк-атайтэк, матысь адямитэк кыле?! Сюрсэн тупаса улӥсь калык быре. Шуг шедьтыны кылъёс, кудъёсыз быгатозы шараяны мылкыдъёсты, куке матысь адямиед пыраклы синъёссэ кыне... Нокинлэн матысьсэ ыштэмез уг поты, кызьы ке но ожысь шутэтскыны бертэм ожгарчизэ, выльысь лэзёнтэм вылысь сюрес утча. Таӵе ужын ожгарын кылкутӥсь ӧнерчиосты утчало, матысьёссэс пӧртэм муген ватыса возё. Асьсэды шонере поттон вылысь сюрсъёсын валэктонъёс шедьто, кудӥз возьытлыклы эмъюм (взятка) луэ. Та дыре соос уг но малпало, вылды, ожгарчиос ӧжыт кылемысь, кылемъёсызлы тушмонэз вормыны туж секыт луоз, Россимылэн кужымез  лябӟоз шуыса. Со ик дыре «взятка» басьтӥсьёс (вылӥ военной чиновникъёс) миллионъёсын асьсэлы коньдон люкало, асьсэлэсь ӵыжы-выжыоссэс оже мынонлэсь утё. Тӥни кытын туннэ нуналлы самой лэчыт ужпум! Ку асьме кунмы тушмонэз вормоз, куке вӧзамы сыӵе гыжкалъёс, сюлэмтэм адямиос но пӧечиос ужало?!Тушмонэз ӵошен вормоно! Дэмен та коррупциез ӧм ке быдтэ, азьланяз улонмы эшшо но секыт луоз. Бадӟым Атыкай ожын вормон асьме калыклы пример луыны кулэ. Сютэм улыса но вормыны быгатӥллям асьмелэнъёс. Туннэ нуналлы оскыса вераме луэ, ӧвӧл, дыр, асьме калык пӧлын сютэм но ёрмыса улӥсьёс. Котькуд семья тыр улэ. Коррупциен вырисьёс гинэ ваньзэ тае сантэмало.

Луэ- а бен та таӵе жобен  нюръяськыны? Луэ!!!

Коррупциен нюръяськонын пайдаё амалъёс вань ик. Нырысь ик, таӵе ужъёсты одно ик шарае поттоно но сыӵе ужен герӟаськем адямиосты кылкутытоно. Кыкетӥез, эскерись органъёсты асьсэ ужзы шоры сак учкытоно. Адями коррупциен медаз выры шуыса, бадӟым валэктон уж нуоно дышетон удысысь ужъюртъёсын. Нош тужгес но валтӥсез луэ татын семья. Кызьы уло анай-атайёс, кыӵе амалъёсын визьнодало соос пиналзэс - та бордын луэ пиналлэн вуоно улонэз, асьме кунмылэн вормонэз но азинсконэз. Вунэтоно ӧвӧл: асьмелэн улонмы будӥсь пиналъёс бордын, соин ик «мукет кунъёс шоры чиньыен возьматыса асьмеос вераны кулэ ӧвӧл «соослэн коррупцизы ӧвӧл» шуыса, нырысь асьме пушкысь ужпумъёсмес быдэстыны кулэ». Оскем потэ, кема ик дыр ортчытэк, коррупция быроз. Ӵошен нюръяськоме улонын  зэмлыкез утён  понна!»

Покчи Лӧзя огъя тодон-валан сётӥсь шоръёзо школаысь 9 «б» классысь дышетскись Антонова Елена                                                       

Дышетӥсез Антонова Наталия Львовна

Л