Куас сюресъёсты волятӥзы

Ӵошатсконъёсы асьме ёросысь Покчи Лӧзя, Ципья, Ӟаны, Сосна шоръёзо школаосысь, Балтась школаысь но гимназиысь, Арча но Кукмор ёросъёсысь, Марий Эл Республикаысь ваньзэ 76 куасэн бызьылӥсьёс пыриськизы. Владимир Алексеевез буре вайыса, куасэн бызьылонъя ӵошатсконъёсты ортчытон малпанэн ёрос кивалтэтэ вазиськиз спортъя школаысь тренер Сергей Григорьев.

— Бен, кичӧлтӥсез мон луисько, — валэктон сётэ Сергей Анатольевич. — Ӟеч адями но зэмос спортсмен сярысь сайкыт тодэ ваёнъёс калык пӧлын кема мед улозы шуыса, мынам потэ вал Владимир Витальевичез но солэсь заслугаоссэ данъянэ аслэсьтым люкетме пыртэме. Ӧти вань эшъёсме, котырысьтымы бускель ёросъёсысь: Кукморысь, Сабаысь — вуизы эшъёсы. Ми котьку соосын ӵош нискыламы, вожвылъяськимы. Ваньмы ӵош Владимир Витальевичез буре вайимы. 

Ёрос кивалтэт палэнэ ӧз кыльы, малпанме умоен лыдъяса, юрттэт кизэ сётӥз. Ёросысь спортъя школалэн директорез Исмагилов Марат Фаритович туж мыло-кыдо юрттӥз, спортъя но егитъёсын ужанъя ёзэтлэн кивалтӥсез Загидуллин Рустам Рафисович но мыным дурбасьтӥз. Коньдон ласянь юрттэт сётӥзы «Дуслык» возёслэн кивалтӥсез Колоколов Николай Григорьевич, «Сосна» обществолэн кивалтӥсез Ситдиков Фирдаус Габдуллович, «МДСУ» обществолэн кивалтӥсез Каюмов Марат Харисович, «БАЛТАСИДОРСЕРВИС»-лэн директорез Ильясов Рашит Магъсумович. Вань организационной ужъёсты радъяны юрттӥзы Покчи Лӧзя гурт поселенилэн аскивалтон ёзэтаз ужасьёс, быдэс составен лыктӥзы. Ӟаныысен мыло-кыдо адямиос вуизы, сиён-юон дасязы. Бускель Марий Элысен но юрттэт вуиз: Волжск ёросысь «Москва» возёсысь Григорьев Рудольф Антонович коньдон келяз. Соин но мон сюлмысь тау каремме верасько вань адямиослы, кудъёсыз мыным юрттӥзы, та ӟеч ужын пыкет луизы. Зэмзэ ке верано, мон пайми ик, ӧй но малпа вал сомында адями та ӟеч уже пыриськоз шуыса. Туж бадӟым тау ваньзылы но.

Ялтра нюлэскын куасэн бызьылонъя ӵошатсконъёс арлы быдэ ортчо, со сезонэз борӟанлы сӥзем ӵошатсконъёс луо. Нош таӵеез ортчиз нырысьсэ.
Ваньмыз пӧрмиз ке, ёрос юрттэт сётӥз ке, азьланяз но радъяломы. Кылдӥз ке, Татарстан уровенен но ортчытомы.

— Якутиын но спортэн вырем, куасэн бызьылэм Володя агай. Татын но бызьылӥз, Российской ӵошатсконъёсы, капчи атлетикая вожвылъяськонъёсы, куасэн бызьылонъёсы пыриськылӥз, калыккуспо марафонэ но ми валче пыриськимы. Ӵош ветлӥськом вал ӵошатсконъёсы.
Туж энергичной, тунсыко, сюлмо но позитивной адями вал со, шудыса вераськыны яратылӥз. Мон малпасько, соин артэ туж капчи вал адямиослы. Со туж улонэз яратӥз.

Володя агай пенсие кошкем бере солэн интыяз мон лыктӥ ужаны. Со дырысен мон спортъя школаын ужасько ини, — тодэ ваёнъёссэ вера тренер.

Зэм но, Гондыргуртысь Владимир Алексеев спортэз матын каременыз гуртоосызлы гинэ ӧвӧл, котырысь гурт калыклы но, ёросын улӥсьёслы но тодмо адями вал. Жаляса верано, Владимир Алексеев туннэ асьме пӧламы ӧвӧл ини: 2025-тӥ арын кема но секыт висемез бере солэн сюлэмез йыгаськемысь дугдӥз (интыез узьмагын мед луоз, вылаз усем сюез мамык кадь мед потоз).

2020-тӥ арын газетамы но сайтамы Наталья Жуковалэн статьяез потӥз вал. Статьялэн героез — ӵапак Владимир Алексеев. Тодады вайытон вылысь отысь куд-ог фактъёсты ӵектӥськом.

Владимир Витальевич 1953-тӥ арын Гондыргуртын вордскем, быдэ вуэмез бере трос аръёс ӵоже Якутиын улэм. Отын кӧня ке дыр ӵоже железобетонной заводын тыршем, берлогес стропальщик луыса но ужам. Нош вордскем палъёсаз берытскемез бере, Владимир Витальевич Балтась ёросысь спортшколаын ужаны кутскем.

Выль ужан интыяз дышыны кема дыр кулэ луымтэ солы, угось Якутиын улыкуз но спорт ужрадъёсы пыриськем. Тренер толалтэзэ нылпиосты куасэн ветлыны дышетэм, тулыс но гужем соосын ӵош бызьылэм. 2012-тӥ арын «Алга» возёсысен со дано шутэтсконэ потэм.

Владимир Алексеев ас арлыдъемъёсыз пӧлын бызьылонъя трос пол Россиысь призёр луэм. Казань, Ижевск, Йошкар-Ола городъёсын ортчем полумарафонъёсы но (22 иськем) мыло-кыдо пыриськылэм адӟем карымон тренер.

Туспуктэм: https://vk.com/club59964466