Кытын кыдало андан кадь юн сямъёс?

Маринаен ёросысь ӵошат-сконъёсын пумиськид ке, тод ини: со вылӥ интытэк татысь уз берты. Озьы ик луэ: Марина куддыр бызьылонъёсын пиосты но ортчытэ ай. Бызьылон гинэ ӧвӧл, кыӵе гинэ спортысь дисциплинае со уг пыриськы, ваньмаз солы шуд усе вормыны яке призо инты басьтыны. Сыӵе пумозяз сылон сям солэн вираз пыӵамын кадь ини. Палэнысен учкиськод ке солэсь дасяськон йылолъёссэ, паймиськод: со туж каньыл, уг дырты, ӝикыт, трос уг вераськы. Туннэ нуналэ со ужысьтыз спортъя командаяз гинэ ӧвӧл, ёросысь спортъя командалэн составаз но пыре, пӧртэм ӵошатсконъёсын оскымон адями луэ.

Нырысетӥ инты, кытын адямилэн сямыз кыданы кутске — со вордӥськем семья но вордӥськем интыос. Мариналэн со — Пор-Кутеш гурт. Анаез — Алевтина, лыдъян-чотан удысын тырше, атаез — Владимир, водитель луыса ужа. Озьы ик вань на Полина сузэрез. Татын солэн валтӥсь юнматскон дыръёсыз ортчизы. Нырысетӥ вамышъёс, нырысетӥ кылъёс, нырысетӥ бызьылонъёс, нырысетӥ вӧсь усёнъёс луизы татын — ваньмыз вордскем палъёсаз ортчизы. 

— Спортэз яратон мылкыдэ пичи дырысен ик кенжиз ини. Милям гуртамы туж трос нылпиос вал. Ми котькуд нунал пӧртэм выль шудонъёсын шудылӥм. Отысен ик ӝог бызьыны, велосипедэн ворттылыны, футболэн шудыны, уяны дышетски. Та ваньмыз монэ кыдатӥз, дыр. Азьло ведь телефонъёс но ӧй вал, милям вань пичи дырмы урамын ортчиз шуыны луэ, — спортэ нырысетӥ лэсьтэм вамышъёсыз сярысь вера Марина. 

Школаын дышетскыкуз егит нылаш спортэн юн эшъяськиз ини (та сярысь пыр-поч лыдӟыны быгатоды, 11.08.2007 арын потэм «Азьлане» газетлэн 63-тӥ номерысьтыз — ред.). Та луиз Мариналэн кыкетӥез интыез, кытын солэн сямез кыдаз. Та дырысен 18 ар ортчиз ини. Со аръёс куспын со кузпал но, анай но луиз, но улон принципъёсыз гинэ ӧз воштӥське, таза улон сямез яратон мылкыдэз но солэн ӧз кысы. 

— Самой серьёзной ӵошатсконъёс школаын кутскизы ини. Котькудаз монэ школаысь физкультураен дышетӥсьмы Руслан Эрнстович Михайлов нуллэ вал. Пӧртэм пумо ӵошатсконъёс луо вал. Отысен ик вормонъёс, призо интыос кутскизы. Огпол велоспортъя спартакиадае ветлӥм. Со дыре та мынам самой бадӟымез ӵошатсконэ вал. Отын мон куинетӥ инты басьтӥ но монэ тренер Гумар Захарович синйылтӥз. Со мыным велоспортэн выронме азинтыны ӵектӥз. Соку ик, кема малпаськытэк, анай-атайлэсь но юатэк, соглаш кариськи. Мон тодӥсько вал, анай-атай мынэсьтым котькуд малпанме валалозы, мыным дурбасьтозы шуыса. Соос котьку мыным оскизы. 

Университетын дышетскон аръёсаз Мариналэн андан сямез эшшо но юнматскиз. 

Туннэ нуналэ Марина «Газпром трансгаз Казань» организацилэн филиалаз — Балтасьысь «ЭПУ Балтасигаз» управлениын — ужа. Татын но солы туж бадӟымесь луонлыкъёс усьтӥсько. Ужасьёс пӧртэм ӵошатсконъёсы пырисько, азинсконъёсы вутско, призо интыосын но данъясько. Та Мариналэн куинетӥез сям кыдатон интыез луэ. 

— Туннэ нуналэ организацимы туж бадӟымесь вамышъёсын азьлань мынэ шуысал. Пӧртэм ёрос, республика но Россия масштабен ӵошатсконъёсы ветлӥськом. Котькуд ӵошатскон — нимысьтыз улон кадь, марзэ ке выльзэ шедьтӥськод, дышетскиськод.

Егит кышномурт шоры учкыса, малпалод, солэн йыраз уж но спорт гинэ шуыса. Ӧвӧл, веськрес мугоро нылкышнолэн кык пиосыз будо — Артур но Арсений. Кыкназы ик анайзы кадь спортэн тунсыкъясько. Арсений футболэн шудэ, Артур куасэн усто нискыла. Анаенызы валче велосипедэн ворттылыны но бызьылыны ярато. Озьы пиослэн но сямъёссы кыдало, дыр, анайзылэн но спортэн эшъяськон мылкыдыз эшшо но пуроме.

— Кызьы мон соослэсь мылкыдзэс ӝутыны котьку тыршисько, озьы ик соос но мыным туж бадӟым кужым сёто. Призо интыос басьтӥ ке, туж шумпото мон понна. «Ми тынэсьтыд мукет инты ӧм но возьмалэ. Тон милям ӟечок!», — шуо. Мон понна та кылъёс самой дуно но валтӥсь, самой бадӟым пыкет луо. Озьы тӥни мылкыд ӝутӥське спортэн вырыны, тазалыкез юнматыны, нылпиосы понна пример луыны, — мылкыдъёсыныз люкиське егит анай.

Зэмзэ но, анай понна нылпиосыдлэн вормонъёсыз аслад вормонъёсыдлэсь но дуно пото. Марина тае туж умой тодэ. Ас дыраз аслаз анай-атаез солы туж бадӟым пыкет сётӥзы, табере со ачиз но нылпиосызлы ваньзэ умойзэ сётыны тырше, шуг-секытъёсты данэн вормыны дышетэ. Мулюковъёс котькуд семья ӵошатсконъёсы пырыны тыршо, одно ик призо интыос басьто. 

Котькуд адями понна спорт пӧртэм сямен адӟиське. Кинлы ке со улонысь самой бадӟым уж, кинлы ке уждун, кин ке тазалыкез понна тырше, кин ке секыт малпанъёсызлэсь куштӥськон понна спортэ вые. Кызьы гинэ эн учкы, спорт — со эмъюм, висёнлэсь-а, сюлэм курадӟонъёслэсь-а.

— Спорт — со дисциплина но визьнодан. Нырысь ик со аслыд кулэ. Спортэн эшъяськыса гинэ мугордэ, тазалыктэ юнматыны быгатӥськод. Туала улонын таза улон сям туж бадӟым инты басьтэ, — веранзэ йылпумъяз Марина.

Туала улонын спортлэн интыез зэмзэ но туж бадӟым. Нуналлы быдэ пӧртэм пумо дисциплинаос, ӵошатсконъёс кылдо. Марина кадь ӝуась сюлэмо егитъёс луыса гинэ, мерлыклэн азьпал сюресэз умой луоз шуыса оскон кылдэ. Ваньмы но спортэн ӧжытак эшъяськимы ке, оло, тросэз висёнъёсмы но палэнтӥмы ортчысалзы. Вань спортэн тунсыкъяськись, спортэз яратӥсь адямиосты матынъяськись праздникен ӟечкыласьком!

Нялтас вераса, инвожо толэзе Саба ёросын Россиысь Гурт возёсъя министерствоен радъям «Земля спорта» Огъяросси марафонлэн улосвыл люкетэз ортчиз вал. Марина Мулюкова, отчы пыриськыса, ГТО-лэсь нормативъёссэ сётонъя дисциплинаын куинетӥ инты басьтӥз, нош силовой экстримын вормисе потӥз. Та вормонъёсызлы луыса со куарусён толэзе Сочиын ортчоно ӵошатсконъёсы путёвка басьтӥз! Ӟечкыласьком но вормонъёс сӥзиськом Мариналы!