Кытын вордскид, отын ик кулэ луид

Арлы быдэ пӧсьтолэзьлэн кыкетӥ ӟучарняяз Россиын Почталэсь нуналзэ пусъё. Туэ почтаын ужасьёсты сӥлы карозы 13-тӥ пӧсьтолэзе. 

Кӧня ар ини Сизнер гуртысь почтальон Надежда Матвеева ас калыкезлы, гуртоосызлы ӟеч уж лэсьтэ — газет-журнал нуллэ, пенсия коньдонзэс сётъя. Та удыс борды со вань сюлмыныз бурмиз шуыса верад  ке но, янгыш уз луы. Котькуд юртын Надежда Михайловна — витем куно, котькин сое шумпотыса пумита. Калыкен огкыл шедьтыны быгатэмез, лякыт сямыз, капчи мылкыдыз но ӟеч сюлэмыз понна сое гуртоосыз туж ярато но гажало.

Таисия Павловна Семёнова:

— Милям гуртамы кема аръёс ӵоже почтальон луыса Надежда Матвеева ужа — туж востэм, сабырлыко, визьмо, чылкыт но ӝикыт, лякыт сямо, куара кылзӥсь, муспотон но веськрес кышномурт. Толэзьлы быдэ ми сое чидатэк витиськом но шумпотыса пумитаськом. 
Дораз но тазалыксы лябӟем анай-атайзэ туж тыршыса, сюлмысь уте. Со вылын юртъер котырысь ужъёс но. Арлыдо адямиосты туж сӥлы каре, храме но нуллэ. Одӥг кыл но пумит верамез ӧвӧл, котьку пальышась ымнырын адямиосын вераське. Вань гурт калык сое гажа, яратэ. Туж шыпыт гинэ, вераськыкуз куаразэ но ноку уг ӝуты. Газет-журналъёсты но котьку дыраз вуттэ. Паймоно кадь, котькытчы вутске. Ачиз машинаен почтазэ бускель Смаиль гуртысь нуллэ, ноку но уг ӝожтӥськы.

— Дышетскемея мон бухгалтер, но ӧнерея ужаны ӧз тупа, шуыны кулэ. 2000-тӥ арын, Ципья шоръёзо школаез йылпумъяме бере, мон Атняысь гурт удысъя техникуме бухгалтерлы дышетскыны пыри. Кык ар отын та ӧнеръя тодон-валан люкай но монэ направлениен Кукмор ёросысь Мамашир гуртэ лэзизы, отын одӥг ар мында экономист луыса ужай. Собере куать арлэсь трос Ижкарын вузкарон удысын тырши. Бератаз ини гуртэ берытски но почтае ужаны интыяськи. Тӥни озьы 2009 арлэн июнь толэзьысеныз ини улонэ почта удысэн пӧлэстӥськыса мынэ. Семья мугъёсын сэрен кык арлы та ужелэсь куштӥськоно луи ик вал, но улон ачиз ваньзэ ас интыяз пуктӥз: 2018-тӥ арын мон выльысь почтае берытски, туннэ нуналэ но та удысын тыршисько, — шуэ Надежда Михайловна.

Туала дыре калыклэн печатной изданиослы туж гожтӥськемез уг поты, ваньмыз интернетын вань, шуо. Та югдурлы паймонэз но ӧвӧл кадь ини. Угось улон азинскемъя, котькуд ласянь луонлыкъёс но паськытало, тунсыкъёс но воштӥсько.

— Зэм, туала вакытэ егитъёслэн газет лыдӟемзы уг поты ни, — вера почтальон. — Интернетын ваньмыз вань, отысь ваньзэ лыдӟыны луэ, шуо. Но мӧйыос пӧлын газетэз, киязы кутыса, лыдӟыны яратӥсьёс вань на. Угось газет сое лэсьтӥсь адямиослэсь ки но сюлэм шунытсэс уте, кагаз но буёл зыныз гинэ ма сылэ, газет чуръёс сюлме пыӵало, тодэм информациез ачид пыр поттӥськод кадь.

Печатной изданиос пӧлысь Сизнеръёс «Азьлане» газетэз матынгес каро, 2025 арлэн кыкетӥ паларез понна 32 мурт ёрос газетлы гожтӥськиз. Ӟеч сямлы пӧрмиз ини «Смаиль» обществолэн ас ужасьёсызлы ёрос газетэз гожтэмез, таяз аре СВО-е пыриськемъёслэн семьяоссылы но гожтӥз. 

— Аслэсьтым ужме яратӥсько. Шумпотӥсько, адямиослы ӟеч мылкыдъёс кузьманы быгатӥсько шуыса. Кельше адямиосын вераськыны. Адӟисько, кызьы гуртоосы шумпото лыктэмелы, чидатэк витё газетэз яке пенсиез. Ялан движениын луыны но мыным кельше, солэсь пайдазэ но шӧдӥсько, — азьланьтэ веранзэ Надежда.

Зэм но, тэк улон соя ӧвӧл. Надежда Михайловна туж сюлмо адями. Гуртлэн улоназ но со мыло-кыдо пыриське. Кыӵе ке калык шулдыръяськон радъяно-ортчытоно-а, яке люкаськыса мерлыко ужъёсты быдэстоно-а — котькудаз шумпотыса аслэсьтыз люкетсэ пыртэ, котькинлы юрттӥське. Со сяна, Надежда спортэн, таза улон сямен но эшъяське. Кылсярысь, со туж яратэ куасэн ветлыны. Азьвылгес Улисьял гуртын ортчись куасэн вожвылъяськонъёсы но пыриське вал, грамотаосыз но солэн трос, зарни медалез но вань. Ваньмыз вылэ ватсаны кулэ на: Надежда матысьёсыз понна но воштонтэм адями. Юртъер котырысь ужъёс со вылын, гуртын пудотэк но уг луы, пудо-живот утялтон ужъёсты но быдэсъяно. Нош самой валтӥсез — со анай-атаезлэн оскымон пыкетэз.

Надежда Сизнер гуртысь Татьяна но Михаил Матвеевъёслэн бадӟым но эшлыко семьяязы вордскемын, вить нылпиос пӧлысь со куинетӥез луэ. Та семьяын пиналъёссы пичиысен ужаны, ужез гажаны дышетскыса, ог-огедлы юрттонлэсь дунлыксэ валаса будо. Огъя вераса, ӟеч сямо, визьмо адямиос луыса быдэ вуо. Но 2024-тӥ арын та шудо семьяе бадӟым кайгу вуэ — Матвеевъёслэн покчиез пизы, Павел, нимысьтыз ожгар операциын бырыны шеде (Секыт сюез мамык, интыез узьмагын мед луоз). Татьяна апайлэн но Михаил агайлэн тазалыксы сотэк но лябӟемын вал ини, нош улонлэн та шуккетэз бере соос эшшо но сётскизы. Со секыт дыръёсы но, али но Надежда, вань сюлэм шунытсэ сётыса, анай-атайзэ уте, тазалыксэс сак эскерыса улэ. 

Почтальонъёс бадӟым уждун понна уг тыршо. Та удысэ кылё зэмос профессионалъёс, ӟеч сюлэмо адямиос, кинлэн ужпумез — адямиослы юрттон. Котькыӵе куазь дыръя сюресъёстӥ но сюрестэм интыостӥ почтаын тыршисьёс корреспонденциез умой но дыраз вутто, газет-журналъёслы гожтӥськонэз радъяло. Бадӟым городъёсын тыршемзы туж ик синме уг йӧты, оло, нош тани гурт интыын — соос воштонтэм адямиос. Нимысьтыз пусйыны кулэ, гуртысь почтальон — со почта нуллӥсь гинэ ӧвӧл, со юрттӥсь но, визь-кенеш сётӥсь но, психолог но. Угось со газет-журналъёсты гинэ уг ӵекты, ватсаса юрттэт но сётэ: коммунальной услугаос понна тыриськонъёсты кутэ, вузкарыны но тупа — сыӵе туала улонлэн куронъёсыз. Почтальонэз чидатэк витё, сюлмысь вераськон, иворъёсты тодон понна. Нош со котькудзэ кылзэ, дурбасьтэ, лӧпкытэ. Нош кызьы сотэк? Соос гуртоос ук, матысь адямиос.

Ӧнер праздникен валче сӥзиськом почтаын вань ужасьёслы но ветеранъёслы, тазалык, шудбур, оптимизм, ӵуказе нуналлы оскон но ваньзэ умойзэ! Шунды инбамын но мед пиштоз, сюлмады но мед улоз!