Лиана Фёдорова — зэмос пор «энерджайзер»

Туннэ татын, ӵуказе мукет интыын. Туннэ сценаын кырӟа, ӵуказе эктэ. Со олокытчы но вутске: дышетскыны но, ужаны но, пӧртэм ужрадъёсы пыриськыны но. Эшъёсыз понна со зэмос юлтош, котьку каньыл кылыныз но чебер пальпотонэныз буйгатыны быгатӥсь эш. Ӵыжы-выжыосыз понна — юн пыкет луись, юрттӥсь нылаш. Нош ёросысьтымы пор калык понна — оскымон но данъяськымон, пор калык понна сюлмаськись егит ныл. Ваньмыз та Улисьял гуртын вордскем, али дыре Казаньын дышетскись аспалмы Лиана Фёдорова сярысь. «Азьлане» газетлы интервью сётыкуз, со вераз, ку но кызьы со пор калыклэн лулчеберетэныз тунсыкъяськыны кутскиз, кызьы со удмурт лулчеберет шоры учке но аслаз кырӟамез сярысь кыӵе урод-лек кылъёсын пумиськылэ. Та но мукетыз сярысь — интервьюын.

— Лиана, тон паймымон нылаш: ачид чырткем, ачид чебер, ачид усто кырӟась но эктӥсь… Тон пичи дырысеныд сыӵе активной нылпи вал-а? Маин тунсыкъяськид но маин вырид пичи дыръяд? Кӧня ке кылын асэныд тодматы лыдӟисьёсмес.
— Кӧня ке кылын верано ке, мон огшоры нылаш. Вордски Улисьял гуртын. Анае фермаын ужа, скал кыске. Атае осеменатор. Выны но сузэры вань. Кӧня асме тодӥсько, мон зэмзэ но сыӵе активной вал (серекъя). Кырӟаны но эктыны яратэме сярысь верано ке… Мон тодӥсько, бабае гитараен шудэм шуыса. Озьы ик со кылбуръёс, кырӟанъёс гожъям. Нош анай ласянь ӵыжы-выжыосме учконо ке, отын мызганчиос трос. Николай Кугергин ӵужатае бордысен кутскыса, соослэн котькуд поколениын мызганчиоссы вань. Ӵужатай шудэм, солэн пиез Геннадий шудэ, Геннадийлэн пиез Денис но шудэ... Мон мызганэн уг шудӥськы, но шудӥсько гитараен. Али фортепианоен, барабанэн, домбраен шудыны дышетскисько. Мызганэн но туж потэ шудыны быгатэме. Огпол, мыным ньыль арес дыръя, Вероника апае (соку со студент вал) гуртысь коллективен концертэ дасяськиз. Клубен Толя агай кивалтэ вал али соку. Соослы туж срочно кулэ луиз одӥг номер и мар тон малпаськод? Соос мыным кырӟан дышетскыны кулэ шуыса веразы. Ну, кулэ бере, кулэ шуи… Кык-куинь час куспын мон со кырӟанэз дышетскыса сцена вылэ потӥ. Со вал мынам нырысетӥез сольной выступление (серекъя). Со учыр бере кӧня пол сценаосы потылӥ, дыр… Садике ветлыкум но, школаын дышетскыкум но. Суредаськыны, причёскаос лэсьтылыны яратӥ пичи дырысеным. 11-тӥ классэз йылпумъяме бере Казаньысь торгово-экономической техникуме парикмахерлы дышетскыны кошки. Одӥг ар дышетскыса, диплом басьтӥ но басьтэм ӧнерея ужаны кутски. Туэысен Казаньысь Кун консерваториысь этномузыкология факультетын дышетскисько. Татын ми тодматскиськом Поволжьеысь калыкъёслэн (мордва, чуваш, бигер, удмурт, крашин но мукетъёсыз) лулчеберетэнызы, сям-йылолъёсынызы. Сокем тунсыко дышетскыны, калыкъёс сярысь выльзэ тодыны.

— Пор калыклэн историеныз, лулчеберетэныз ку тунсыкъяськыны кутскид? Ма бордысен со кутскиз? Кин ке яратон пыӵатӥз-а яке тон ачид со борды кыстӥськид?
— Кытын ке 11 аресысен тунсыкъяськыны кутски шуысал. Мон ачим но уг тодӥськы, кызьы со озьы луыса потӥз. Пичи дырысеным клубын пор эктонъёсын но кырӟанъёсын выступать карыны дыши, соку ик вордскем кылме, калыкелэсь лулчеберетсэ матын карыны, валаны кутскиськем, дыр. Туж тунсыко потыны кутскизы пор кырӟанъёс, эктонъёс. 5-тӥ классэ Ципьяысь школае дышетскыны выжеме бере, отын матысен тодматски ӟучъёсын но, удмуртъёсын но, бигеръёсын но. Котькуд калык аспӧртэмлыко, аслаз сям-йылолъёсыныз, сямъёсыныз, лулчеберетэныз висъяське вылэм шуыса мон соку умой валаны кутски. Мыным тунсыко луиз соосты эскерыны. Но со дыре ик аслэсьтым кылме эшшо но кужмогес яратыны, солэсь дунлыксэ но кулэлыксэ умойгес валаны кутски. Та мугъёс пор кылэз эшшо но матынгес карыны юрттӥзы. Со сяна, мынам песяе егит дырысеныз кырӟаны яратэ. Азьло ведь шулдыръяськыны гурт калык туж яратэм, клубын быдэс гуртэн люкаськыса юмшаллям. Мынам гуртоосылэн сыӵе люкаськонъёссы али но син азям (песяе сьӧры куриськисько вал клубе). Син азяд пукты сыӵе картина: пичи гурт клуб, люкаськемын зал тыр адями, ваньзы валляна сямен экто-кырӟало, шулдыръясько… Нош мон соос дорын. Синкылиостэк со дыръёсты тодам ваеме но уг луы. Со сыӵе шудо вакытъёс вал! Бабае но ӵемысь пор калыкен герӟаськем пӧртэм историосты вера; Нина песяе, Елизавета ӵужанае но котьку пор калыклэн историез, лулчеберетэз, сям-йылолъёсыз сярысь вераллязы. Мон тунсыкъяськыса кылзӥськылӥ соосты котьку. Песяе мынам вашкала кырӟанъёсты умой тодэ. Мыным туж кельшо традиционной сюанъёс, отын такмакъёсты кырӟало. Сыӵе со такмакъёс мыным кельшо, тодысалды ке! Сюлме йӧтымон. Быдэ вуэмея, пор калыклэн лулчеберетэныз тунсыкъяськонэ эшшо но будыны кутскиз. Ортче вылэм пор сюан, мон аслым отын кылэм такмакъёслэсь кылъёсссэ гожтыса кельтыны кутски. Дорам бертӥсько но нимысьтыз со понна кутэм тетраде гожъясько вал. Огъя вераса, мынам вань улонэ пор кылэн, пор калыкен герӟаськемын вал котьку. Быдэс окружение сыӵе вал, гуртын но ваньзы пор кылын вераськизы ведь. Лулчеберето ужрадъёс бере но котьку калыкен кыльыса юмшамы, эктӥмы, кырӟамы… Со удмуртъёслэн но озьы шуыса тодӥсько. Сыӵе люкаськонъёс вань гурт калыкез огазеяло. Озьыен бадӟым поколение милемлы, егитъёслы, аслэсьтыз опытсэ сётэ, устолыксэ возьматэ. Сыӵе атмосфераын будэм бере, валамон ини, малы мон вордскем кылме, калыкме, лулчеберетмес яратӥсько но матын карисько.

Лиана сярысь пыр-поч лыдӟыны быгатоды «Азьлане» газетысь.

Фото: автор