Лулгажан удмуртъёс, эн дыртэ таркаськыны!

2016-тӥ ар йылпумъяське ни, соин валче газетлы гожтӥськон но. Туннэ нуналэ газетэз басьтэ 652 семья. Нош вуоно арезлы гожтӥськемын на солэн ӝыныез гинэ!!! Берло ортчытэм переписья асьмеос - удмуртъёс - районъя 4029 кузя луиськеммы. Коркалы быдэ 3-5 эшдярен улӥськомы шуыса лыдъяд ке, та сюрслэсь трос семья луэммес возьматэ. Озьыен, ог 400 семья газет уг басьты шуыса валаны луэ. Мар вераны кулэ та семьяослэн «Азьлане» газетэз басьтымтэзы сярысь? Нырысь ик соос, огъя валаммыя, арнялы кык пол газет вуыку шумпотонлэсь люкемын. Собере, соос районамы ортчылӥсь ужрадъёс сярысь иворъёсты ас дыраз тодыса вуттыло меда? Бус пӧлы йыромем дыдыкъёслы уг пӧрмо-а озьы? Со сяна, соос асьмелэсь, газет басьтӥсь удмуртъёслэсь, люкиськыса, нуналмысь нуналэ дят луыса мыно, таркасько.

Мар сётэ асьмелы та газет? Улонамы кулэ луись иворъёс сяна, «Азьлане» газет асьмемыз огазея - соя асьмеос ог-огмылы матын но кадырлы, дуно луиськомы. Удмуртлыкмес утьыса возе со. Ас вордскем шаерамы улӥськомы шуыса шӧдытэ, возьматэ, вера. Отысь лул кужым басьтӥськомы асьмеос!

Сётоз-а сомында кужым газет дун тыр басьтэм, кылсярысь, кык кило кампет? - Уз!

«Азьлане» газетлэн тиражез таӵе улӥе, тодэммыя, огпол но ӧз васькылы на! Тани учке арысь аре макем куштӥськиськомы газетлэсь, соин валче удмуртлыкмылэсь но: 2013-тӥ арын - 851, 2014-тӥ арын - 840, 2015-тӥ арын - 742, 2016-тӥ арын - 652 гожтӥськем семья луэм.

Бен, валамон, берло дыре «Азьлане» но «Хезмэт» газетъёслэн дунзы зэмзэ но куртчылӥськись луиз. Кылсярысь, 2015-тӥ арын газетлэн дуныз 456 манет вал, 2016-ын - 549 манет, нош 2017-тӥ арлэн паларез понна газетлэн дуныз 600 манетозь вуиз. Татын валэктон сётыны кулэ, дыр. «Почта России» государстволэсь расходъёсты кулэстыны юрттӥсь дотациез басьтымтэен сэрен, газетъёслэн дунъёссы будо. Газетмылэн тиражезлэн ӧжыт лыдын потэмезлэн но татын интыез вань.

Гажано лыдӟисьёс, кызьы но озьы, туннэ нуналэ Республикаямы одӥг асьме дорын гинэ таӵе удмурт газет потэ. 1930-тӥ аръёсы со ог 7-8 луэм но котькудаз «удмурт» районъёсын потылэм. Но аръёс ортчемъя, лек тӧлъёслэн пеллямъёссылы одӥг «Азьлане» газетмы гинэ чидам. Тау со понна асьме выжыосмылы, ӧвӧл коньдонзэс но вань карыса, ас дыраз гожтӥськыса, утьыны быгатӥллям. Тау со понна ёрос кивалтӥсьёсмылы - газетмес утьыса воземзы понна!

Ойдолэ, эшъёс, асьмеос но утёмы ог-огмес герӟась яратоно газетмес, соин валче асьмемыз асьмеос. Гожтӥськоме газетлы!

«Кенеш» НКА-лэн
Правлениезлэн нимыныз тӧроез Л. САПОЖНИКОВ