Людмила Якимова — Татарстанысь самой усто удмурт визьнодась

25-тӥ куарусёнэ Казаньысь Калыкъёслэн эшъяськон юртазы «Лучший воспитатель дошкольной образовательной организации с родным удмуртским языком обучения и воспитания» конкурслэн финалэз ортчиз. Радъясьёс — Татарстанысь дышетонъя но наукая министерство, Татарстанысь удмуртъёслэн НКА-зы но «Вордскем кыл» журнал. Та конкурсын асьме ёросысьтымы Шор Кушкет нылпи садысь визьнодась Людмила Якимова нырысетӥ инты басьтӥз. Конкурсэ пыриськемез сярысь вераськыны соглаш луыса, Людмила Алексеевна «Азьлане» газетлы интервью сётӥз.

— Людмила Алексеевна, ку но кызьы тӥ конкурс сярысь тодӥды? Кин ке ӵектӥз-а тӥледлы та конкурсэ пыриськыны?

— Конкурсэ пыриськыны мыным ӵектӥз Шор Кушкет нылпи садысь дошкольной люкетъя директорлэн воштӥсез Асанова Ирина Вячеславовна. Мон соглаш луи но конкурслы дасяськыны кутски.

— Ӧжытак конкурслэн радыз сярысь но верасалды ке… Кӧня этапен со ортчиз? Трос вал-а вожвылъяськисьёс? Финалэ потыны секыт вал-а?

— Конкурслэн нырысь ик ёрос этапез ортчиз, отчы Балтась районысь ньыль нылпи садъёсысь удмурт визьнодасьёс пыриськизы. Нош республиканской этапын, кудӥз Казаньын 25-тӥ куарусёнэ ортчиз, вить конкурсантъёс вал: кыкез Кукмор ёросысь, Менделеевск но Агрыз ёросъёсысь представительёс но мон.

— Кыӵе «эскеронъёс» пыр потӥзы удмурт визьнодасьёс?

— Финал сярысь верано ке, ми ваньмы куинь ужъёсты быдэстӥмы: «Визитной карточка», «Мастер-класс» (таяз ужын мон корт коньдонъёслэсь йыркерттэт лэсьтӥ) но «Мынам хоббие». Озьы ик ортчиз пресс-конференция но. 

— Людмила Алексеевна, вань вал-а вожвылъяськисьёс пӧлын кужмо но бадӟым опыто визьнодасьёс? Коллегаосыныды матысенгес тодматскыны, опытэныды вошъяськыны вутскиды-а?

— Зэмзэ но, вожвылъяськисьёс пӧлын вал визьмо но трос аръем опытэн визьнодасьёс. Шумпотымон, соос пӧлысь кӧнякееныз матысенгес тодматскыса, ужан опытъёсынымы вошъяськыны быгатӥмы. Та выллем конкурсъёс соин ик пайдаё луо — визьнодасьёс, ог-огзылэн опытэнызы тодматскыса, асьсэ ужазы сое кутыны быгато. Туала улонын  нылпиосты вордскем (удмурт кыл сярысь верасько) кылзылы дышетон понна визьнодасьёслы выль но тунсыко амалъёсты кутыны дышетскыны кулэ луэ. Соин визьнодасьёслэн тазьы пумиськыса вожвылъяськемзы, ог-огенызы тодматскемзы но опытэнызы вошъяськемзы туала дыре туж кулэ шуыса малпасько.     

— Кызьы тӥ малпаськоды, конкурсын вормыны тӥледлы мар юрттӥз?

— Мон малпасько, аслэсьтым калыкме, анай кылэз яратэме юрттӥз, дыр, шуыса. Зэмзэ ке верано, конкурслы трос дасяським, ваньзэ рос-прос дасяны тыршимы. Соин та вормон — мынам но валче ужась визьнодасьёслэн огъя тыршеммылэн бервылыз. 

— Котькин вала, кыӵе гинэ конкурсэ пыриськиз ке но, адямилы юрттӥсь кулэ шуыса. Тӥляд но юрттӥсьёсты, визь-кенеш сётӥсьёсты луиллям, дыр…

— Шонер. Мынам но юрттӥсьёсы трос луизы. Балтась ёросысь дышетонъя управлениысь методист Гульнара Нутфуллина юрттӥз, аслэсьтыз малпанъёссэ ӵектӥз, опытэныз вошъяськиз. Ӵош ужась коллегаосы (Наталья Шестакова, Ирина Асанова)презентациез дасяны, информация люканы юрттӥзы. Бадӟым юрттэт озьы ик возьматӥзы матысь адямиосы но: кылын но, ужен но юрттӥзы. Кылсярысь, Надя апае йыркерттэтлэсь инъетсэ (основазэ) вуриз. Гуртоосы но палэнын ӧз кыле. Василий Никитин юрттӥз занятилэсь конспектсэ дасяны, Зоя Никитина конкурсэ пыриськон понна сценической костюмъёссэ сётӥз. Ваньзылы та муртъёслы юрттэмзы понна бадӟым тау шуэме потэ. Соос ӧй ке юрттысалзы, финалэ потыны но вормись луыны туж секыт луысал.   

— Огъя учконо ке, конкурс тӥледлы кельшиз-а? Туэ со нырысетӥзэ гинэ ортчытӥськиз ук, озьы бере, оло, кыӵе ке тырмымтэосыз луиллям, дыр.

— Зэм, конкурс туэ нырысетӥзэ радъяськиз, ми солэн первооткрывательёсыз луимы, историе пырыса кылимы. Мыным кельшиз. Таӵе конкурсъёс вылӥ уровенен мед ортчозы шуыса, радъясьёслы но, вожвылъяськисьёслы но туж трос дасяськыны кулэ. Малы ке шуоно со туж кылкутымон ужрад. Мыным вормон капчиен ӧз сётскы: кулэ луиз туж трос ужъёсты дасяны но радъяны, азям пуктэм ужпумъёсты но пыр-поч быдэстыны тырши. Кышканэ сярысь но вунэтыны тупаз.

— Озьы шуиськоды бере, вуонояз но та яке та выллем конкурсъёсы пыриськыны мылкыдды вань?

— Пырисько, дыр, шуыса малпасько. Котькуд визьнодась аслэсьтыз опытсэ бадӟыматыны кулэ. Нош та выллем конкурсъёс ӵапак выль опыт люканы юртто.

— Людмила Алексеевна, тӥледыз та бадӟым вормонэныды ӟечкыласькомы! Та вормонды азьланяз но конкурсъёсы пыриськыса вормонэ вутскон понна стимул мед луоз.