Максим Григорьев — Вукогуртысь егит мызганчи

Та веранэз паськытатыса, тазьы вераны но луысал, дыр: «Усто мызганчи — ӝыны ужрад». Малы ке шуоно мызган сюанын гинэ ӧвӧл, котькыӵе праздникын — армие келян но армиысь пумитан ӝытъёсын, вордскем нунал ортчытон праздникъёсын но мукетъёсаз — туж вылӥ дунъяськем но дунъяське. Мызган гур улсын азьло дырысен кырӟаллям но эктӥллям, шумпотӥллям но куректӥллям, яратӥллям но мӧзмиллям...

Удмурт калык азьло дырысен мызган гуръёс улсын юмшаны яратэм. Но аръёс ортчыса, та крезьгур инструментэз уг вунэто, сое туннэ но туж гажало. Асьме ёросамы но кӧня мызганэн но баянэн шудыны быгатӥсь адямиос вань ук! Шумпотымон, туннэ нуналэ та крезьгур инструментъёсын шудыны дышетскисьёс но ӧжыт ӧвӧл (Балтасьысь крезьгуръя школаын 10 мызганчи, 8 баянист дышетске, Нурмаын — 11 баянист, Ципьяын — 3 баянист, 1 мызганчи). Соос пӧлын ёрос, республика, Россия масштабен конкурсъёсы ветлыса вормонэн бертэм аспалъёсмы но вань. Таяз учыре статьяе Вукогуртын улӥсь егит мызганчи — Максим Григорьев сярысь. Максим школаын гинэ дышетске ке но али, шӧдскымон вормонъёсыныз ушъяськыны быгатэ ини. Но, зэмзэ верано ке, со воксё ушъяськись пиос пӧлысь ӧвӧл вылэм.

— Нырысетӥзэ мызганэз киям кутыку, мыным 12 арес вал. Мон соку 6-тӥ классын дышетски. Мынам бабае Лев Григорьев но, ӵужатае Иван Ермаков но мызганэн шудо бере, пичиысен соослэсь шудэмзэс адӟыса будӥ. Соин паймонэз но ӧвӧл, дыр, мызганэн шудыны кутскемелы, — ачиз сярысь вераны кутске Максим.

Нырысетӥзэ шудыса утьыкуз, вуж мызганэз кыскам ке но, Максимлэн шудэзлы, со арын ик атаез солы выль «Чайка» мызган басьтыса сётэм: вуж мызганзэс вылезлы воштон понна эшшо одӥг муг луэм ук — Максим мызганэн тунсыкъяськыны кутскем. Анай-атаез солы Ципьяысь крезьгуръя школаысь баянъя классын дышетскыны но ӵекто. Максим пумит уг луы.

— Вить ар ӵоже дышетски музыкальной школаын, — азьланьтэ веранзэ егит мызганчи. — Дышетӥсьёсылы Альфия Марсельевна Галляметдиновалы, Миляуша Нафиковна Кадыровалы тау карисько. Дышетӥзы, кенешъёссэс сётӥзы, юрттӥзы. Анай-атае но трос кужымзэс понӥзы, котьку юрттӥзы, дышетсконлы люкетоз шуыса но ноку ӧз вералэ.

Крезьгуръя школаын дышетскон туж капчиен ӧз сётскы ке но, Максим сое умой йылпумъя. Удмурт юмшан гуръёсты, кырӟанъёсты дышетскемез потыса, соосты но ачиз интернетысь шедьтыса шудыны дышетске. Вӧзаз котьку юрттыны дась луись мызганчи бабаез но луэ, со но внукезлы шӧдскымон юрттэт сётэ.

— Дышетскем бере, туннэ троссэ шудыны быгатӥсько ини, — возьдаськысагес вера Максим. — Удмуртсэ но, бигерзэ но, порзэ но. Мыным аслым туж кельше калык кырӟанъёсты, калык юмшан гуръёсты быдэсъяны. Озьы ик апай сямен, агай сямен эктонъёсты. Та калыклы ноку но акыльтӥсьтэм гуръёс ук. Соос адямиосты огазеяло, валче каро, уродэз сярысь вунэтыны юртто.

Али Максимлэн мызганэн шудыны туж ик трос дырыз ӧвӧл ке но (со 11-тӥ классын дышетске, экзаменъёсты сётыны дасяське), яратоно крезьгур инструментсэ со уг кушты, шутэтскон нуналъёсаз ке но, сое кияз кутэ. Зэмзэ верано ке, школаын но кыӵе ке ужрадъёс луыку, Максим одно ик мызганэн шудэменыз шумпоттэ. Вить ар ӵоже тыршыса дышетскемезлэн туж умой бервылъёсыз но вань вылэм ини. Кылсярысь, 2020-тӥ арын Максим, нылпиос но егитъёс пӧлын ортчись калыккуспо «Талантливое поколение» (Москва) конкурсэ пыриськыса, «Музыкальное творчество» номинациын удмурт крезьгуръёсты быдэстыса, 1-тӥ степенё лауреатлэн дипломеныз пусйиське. Туала искусствоосъя III калыккуспо «YourWay» конкурс-фестивальын но «Инструментальное исполнительство. Гармонь» номинациын Максим 1 степенё лауреат луэ. Ёросамы ортчись конкурсъёсы но егит пияш мыло-кыдо пыриське. Туэ «Уйнагыз, гармуннар!» фестивале пыриськыса но со люкаськем калыкез чебер шудэменыз паймытӥз.

— Мызган сяна, мукет крезьгур инструментъёсын мон уг тунсыкъяськиськы, — шуэ Максим. — Котькыӵе крезьгур инструментэн дышетскыны мылкыд карид ке но, солы трос дыр висъяно, кутскем бере, кулэезъя, пыр-поч дышетсконо. Дышетскон юртэ пырыны но кулэ, со понна трос дышетскыны тыршисько.

Максим кытчы дышетскыны пыроз, уг тоды али. Но со тодэ: котькытчы дышетскыны пыриз ке но, мызганэн шудонзэ со уз вунэты. Туннэ нуналэ со ини туж вольыт, быгатыса шудэ. Лулчеберет юртын со егит мызганчиослэн одӥгез луыса висъяське. Школаын но Максимез тыршись пияшез кадь тодо.

Максим — бадӟым но эшлыко семьяысь пияш. Вукогуртын соослэн семьязы — адӟем карымон семьяослэн одӥгез. Атаез Николай Львович «Труд» возёсын тырше, анаез Алина Ивановна Ципья шоръёзо школаын англи кылъя дышетӥсь луыса ужа. Маша сузэрыз нырысетӥ классын дышетске. Песяез Юлия Ивановна но бабаез Лев Афанасьевич соосын ӵош уло. Анай-атаез но, песяй-бабаез но Максимлы котьма ласянь юртто. Максимлэн верамезъя, конкурсъёсын вормонъёсы вутскон — со аслаз тыршемезлэн гинэ ӧвӧл, семьяезлэн заслугаез.

Егит луэмез шоры учкытэк, Максимез ёросысьтымы бадӟым опыто мызганчиосын одӥг радэ султытыны луэ. Малы ке шуоно со пичи дырысеныз аслэсьтыз устолыксэ возьматыны быгатӥз. Оскисько, мызганэн шудонзэ ӧз ке кушты, со эшшо но быдӟымгес вормонъёсы вутскыны быгатоз шуыса.