Малы Ымусьтон дыръя кызэз чебермало?

Легенда маде, VIII-тӥ дауре Уйпал Европаын Бонифаций нимо святой язычникъёсты христиан осконэ берыктыны малпам. Солэн косэмезъя язычникъёслэсь вӧсяськоно писпузэс — тыпыез - погыртӥллям. Усьыкуз со котырысьтыз мукет писпуосты но погыртэм, одӥгез гинэ кылем — кыз. Бонифаций тае Инмар пусэн лыдъям.

Православной осконын кыз котьку Улонлэн Писпуэныз лыдъяськем, малы ке шуоно со котьку вож сылэ. Нырысь та писпуэз Ымусьтонлы юрт доры гинэ пуктылӥллям но ӧвӧл чеберъяллям. Пётр I дыръя кутскиллям урамын кызлэсь но пужымлэсь вайёссэ чеберманы. Корка кызэз даур но ӝыны ортчыса гинэ пыртӥллям.

Православной оскисьёс Ымусьтон азьын одно ик кызэз чебермало. Сое Выль ар азьын чебермаса но Ымусьтон праздник дырозь кельтыны уг алӥськы. Кызлы зэмос ымусьтон шӧм сётэмды ке потэ, эн вунэтэ нимысьтыз символъёс сярысь. Писпулэн йылаз одно ик луыны кулэ тямыс пумо кизили, со Вифлеем кизилиез тодэ уськытэ. Шудонъёс карыса ошыны луэ пичиесь улмоосты, соос удалтонлэн, узыр урожайлэн тодметэз луо, озьы ик пичи гырлыосты, фонарикъёсты, таос Иисус Христос доры сюресэз возьмато.

7 январь но 25 декабрь

Ымустон — со вань христианъёслэн огъя прадниксы. Висъяське сое пусъён дырпус (календарь) гинэ: католикъёс Ымусьтонэз 25 декабре пусъё, православной оскисьёс — 7 январе. Нош мар кароно, куке ӵыжы-выжыосыд яке эшъёсыд пӧлын 25 декабре но Ымусьтонэз пусйись католикъёс но вань ке (кылсярысь, Европаысь куное лыкто).

Валамон, православной муртлы валтӥсез 7 январе пусйиськись праздник луэ, но 25 декабре но пусъемед ке потэ, номыр кышкытэз ӧвӧл. Соиз но таиз но Иисус Христослэсь вордскемзэ данъян луэ ук! Но католической службае, сям-йылолъёсы пыриськоно ӧвӧл, озьы ик уг яра вунэтыны декабре мынӥсь Ымусьтон кӧсутён сярысь. Нош праздник кӧсутёнлы уг ке люкеты, малы бен сое пусъёнтэмез. Ымусьтон — со узыр ӝӧк но  шулдыръяськон гинэ ӧвӧл ук, нырысь ик со сьӧлыктэ веранэн, причастиен герӟаське.

Кызьы пусйыны луэ Ымусьтонэз нылпиеныд?

Ымусьтонэз луэ но кулэ нылпиосын пумитаны. Тужгес но соос анай-атаенызы черке ветло ке. Пичи дырысенызы ик нылпиослы луэ та праздник сярысь, Иисус Христос сярысь вераны.

Пиналъёс праздниклэсь шӧмзэ мед валалозы шуыса, солы азьвыл ик дасяськыны кутсконо. Бадӟымгес нылпиос кӧс утьыны но быгато. Пичиосызлыгес нош, та сярысь валэктыса, быръён сётыны луэ, марлэсь куштӥськыны, кылсярысь кӧсутён дыръя ческыт сиёнъёстэк улыны. Озьы ик умой луоз ӵошен праздник ӝӧкез дасяны, соку нылпиос праздникез асьсэлы матын каро.

Бадӟым нылпиос уй службае но пыриськыны быгато. †укна нош ваньзы кыз улын сылӥсь кузьымъёсты учко. Ымусьтон кыз улын но пӧртэм кузьымъёс луыны быгато ук!

Праздниклы дасяськыса, анай-атайёслы азьвыл ик Иисус Христослэн вордскеменыз герӟаськем тунсыко кузьымъёсты басьтыны яке ческыт кузьымъёсты дасяны луэ.

Интернетысь басьтыса берыктэмын

Туспуктэмез Г. Газизуллиналэн