Марина Матвеева: «Адямилы вӧсь карисько, нош соос мыным «тау» шуо»

Эмъян удысын «огшоры» адямиос ужаны уг быгато, шуо. Отын тыршо сыӵеосыз гинэ, кин нырысетӥ интые мукет адямилэсь тазалыксэ, улонзэ пуктэ. Пор-Кутеш гуртысь Марина Матвеева — эмъян удысын тыршись бадӟым сюлэмо, жалясь мылкыдо эмсузэр. Туннэ нуналэ тырше Казаньысь 6-тӥ номеро больницаысь реанимацияя ёзэтын. Со али егит специалист, туж бадӟым стаженыз но ушъяськыны уг быгаты. Но солэн вань сыӵе сямыз, кудӥз зэмос тазалыкез утён удысын ужась адямиослы тупа — Марина адями понна сюлмаськись нылаш. Соин Марина зэм но медицинаын «огшоры» адями ӧвӧл. Кызьы со эмсузэр луиз, ужаз кыӵе шуг-секытъёсын пумиськиз но пумиськылэ, секыт учыръёссы кызьы ассэ кияз кутыны быгатэ — та сярысь Маринаен интервьюамы.

— Марина, ӟечбур! Нырысь лыдӟисьёсмес асэныд тодматы вал. Кытын но кинлы тон дышетскид, маин тунсыкъяськиськод?

— Ӟечбур. Туж шумпотӥсько ёрос газетмылы интервью сётыны. Малпасько, мон кадь егит ӧнерчиос понна со азьпалан ужаны стимул сётэ шуыса. Дышетски мон Ӟаны гуртысь шоръёзо школаын. 9-тӥ классме йылпумъяме бере, 2017-тӥ арын, Уржуме медициная колледже эмсузэрлы дышетскыны пыри. Биологиен экзамен сётӥ ке но (та предметэз школаын туж яратӥ), улонме эмъян удысэн герӟало шуыса ӧй малпа. Дизайнер луэме потэ вал — мыным котьку кельшиз ас киосыным мае ке чеберзэ лэсьтыны. Вылаз ик художественной школаез но йылпумъяй. Но Дурга гуртын улӥсь Михайлова Света апае ӵектӥз эмсузэр луыны. Малпаськи но соглаш луи. Уржумысь колледже дышетскыны пыри, ньыль ар ӵоже отын тодон-валан басьтӥ. Тунсыко, мынам матысь адямиосы пӧлын трос медицина удысын тыршисьёс вань. Соин практика ласянь шуг-секытъёсы ӧз луэ — матысьёсы юрттӥзы, визь-кенеш сётӥзы. 

— Ужан сюресэд ма бордысен но кытын кутскиз?

— Дышетсконме йылпумъяме бере, ужаны интыяськи Казаньысь психиатрической больницае. Егит луэме шоры учкытэк, вань сюлмаськонъёсме но кышканъёсме палэнэ кельтыса, кутски отын ужаны. Туж секыт вал нырысь. Но мон ӧй но малпа капчи луоз шуыса. Азьланяз аслым ик ужаны капчигес мед луоз шуыса отчы ужаны интыяськи ук. Соин шуг-секытъёсты вормыны, чиданы тырши. 

— Марина, бен эмсузэрлэн ужаз, тынад малпамедъя, маиз самой секытэз, кышкытэз? 

— Мон понна самой секытэз — адямиослэсь кулэмзэс адӟон. Дышетскыкум но, дышетскыны пырытозям но тодӥ, кулон учыръёсын ужам пумиськоно луоз шуыса. Но теориын тодон — со одӥг, практикаын валан — воксё мукет вылэм. Адямиос туж жаль пото. Кинлы ке юрттыны ӧй быгаты ке (мазэ ватонэз, пӧртэмез луэ — ваньмыз ми бордын гинэ но ӧвол ук), пушкам туж секыт луэ. Соин мыным та секытэн сётске. Мукет шуг-секытъёс ӧвӧл шуымон, ваньмызлы дышыны луэ. Коллективен ке тупаса ужад, уждэ ке валад, мукет номыр секытэз ӧвӧл.

— Ваньмызлы дышид ни, озьыен? 

— Ваньмызлы шуымон. Кызьы верай ини, психиатрической больницаын ужан туж трос опыт но практика сётӥз. Но мынам мукет отделениын но ужаса утеме потӥз. Со муген кемалась ӧвӧл интыяськи 6-тӥ номеро больницае ужаны. Нырысь мыным отын ужасьёс веразы, ӝыны яке одӥг ар ӵоже стажировка ортчоно луоз шуыса. Но опытэ луэмысь, стажировкаме одӥг арня куспын ортчыны быгатӥ. Туннэ нуналэ дежурствоосын пукисько ини. Коллективмы умой, ужаны мыным кельше.

— Секыт йӧтэ-а?

— Милям ужамы самой валтӥсез — врачъёслэсь назначениоссэс быдэстон. Уколъёсты пуктон, висисьёслы таблеткаосты сётон, доврачебной сётоно юрттэт возьматон но мукет ужъёс — тае ваньзэ дыраз быдэстоно. Вань ужъёс туж сак луэмез кулэ каро. Соин мон ужаны мынон азьын сюлмаськыны кутскисько ни, ужын ваньмыз умой гинэ мед ортчоз вал шуыса. Смена пӧртэм сямен ортчыны быгатэ ук — куддыръя каньыл, куддыръя секыт. Куке тон валаськод, адямилэн улонэз тон бордын луэ шуыса, киос но куалекъяло. Озьыен, капчи ӧвӧл. Но астэ кияд кутыны быгатыны кулэ.

— Котьку-а бен пӧрме, урод мылкыдъёслы сётскытэк, астэ кияд воземед? Эмсузэрлэн ужез — капчи ужъёс пӧлысь ӧвӧл ук, со сазь йыро луэмез (хладнокровие) кулэ каре. 

— Мон асме тазьы буйгатӥсько: та ӧнерез бырйи бере, мыным рос-прос ужано, мылкыдъёслы сётсконо ӧвӧл — со ужлы люкетэ гинэ. Ма, зэмзэ верано ке, милям мылкыдъёслы сётскыны туж ик дырмы но уг луы — сутка ӵоже ужаса жадёно... Но озьы ке но луо сыӵе учыръёс, куке вож но потэ, куддыръя туж серем но луэ. Адямиен ужаськод бере, пӧртэмез луэ ини. Кылсярысь, кемалась ӧвӧл таӵе учыр луиз. Одӥг песянай мынэсьтым юа: «Тон ветеринарлы дышетскид-а, медиклы-а?». Шораз мар вазьыны ик пайми. Мар верамез потӥз солэн та юанэныз — али ке но уг валаськы. Серекъялод-а, бӧрдод-а отын. Но ми, адямиосын (тросгес учыре мӧйы муртъёсын) ужаськомы бере, сыӵе юанъёслы дась луыны кулэ. Сыӵе милям ужмы...

— «Милям» шуыкуд, тон эмсузэръёс сярысь вераськод-а? 

— Эмсузэръёс но, эмчиос но сярысь верасько. Бен, эмчиослэн ужзы вераса быдтонтэм секыт, кылкутымон, трос кужымез кулэ карись. Но со дыре эмсузэръёслэн ужзылэсь но кулэлыксэс кулэстыны кулэ ӧвӧл. Мон ачим туж данъяськисько, эмсузэр луисько шуыса, адямиослы юрттыны, врачъёсын ужаса опыт люканы быгатӥсько шуыса. Сменаям но тыршисько, врачъёслы монэным ужаны капчигес мед луоз шуыса. Эмчиос но валало, макем трос ужзы эмсузэръёслэн. Висисьёслэн улонзы ведь, мар шуид ке но, эмчиос бордын гинэ ӧвӧл, эмсузэръёс бордын но. 

— Висисьёс бен валало-а эмсузэръёслэсь дунзэс? Ӟеч кылъёссэс уг жаляло-а?

— Уг жаляло. Йӧно но ӟеч кылъёсын гинэ ӧвӧл, пӧртэм пичи кузьымъёсын но тау каро. Валамон, ми кузьымъёс понна ум ужаське, но адями сюлмысьтыз мае ке кузьмаку, кызьы солы отказать карод? Мон ачим жалясь мылкыдо бере, мылкыдъёсме ватыны уг быгатӥськы. Соин тау шуыса веракузы, синкылие но потылэ... Но валтӥсез тани мар: мон сыӵе учыръёсы валасько, юнме гинэ медицина удысэз бырйиськымтэ шуыса. 

— Озьы бере, тон аслад интыяд?

— Аслам интыям. Кылдэмез озьы луэм шуыса малпасько мон. Котькуд адямилэн та улонын аслаз сюресэз. Кылдэмын ке тыныд медицина удысын ужаны, тон отын ужалод. Кылдымтэ ке, уг ке пӧрмы тынад — коть дас ар тодон-валан басьты — тон уд ужа та удысын. Аслам тодмоосы пӧлын но мылкыд карытэк дышетскись эмсузэръёс вань. Малы асьсэды курадӟыто — уг валаськы. Мыным тани ӧнере ласянь удалтӥз. Бен, асме нырысь мукет удысын утеме потӥз ке но, дыр ортчыса, медициная колледжын дышетскыны кутскеме бере, мон сюлмысь вуоно ӧнерме яратӥ. Мон валай, адями понна кыӵе кулэ луись ӧнер луэ со. Со сяна, анаелэн, Мария Александровналэн но атаелэн, Василий Пантелеймоновичлэн юрттэмзы, валамзы но бадӟым инты басьтэ. Соослы тау, ноку пал кыл уг верало, ваньмыз ласянь юрттыны гинэ тыршо. Эшшо тани маиз валтӥсез: ужаны мылкыд луыны кулэ. Мон ачим тазьы малпасько: куке тон егит, куке тынад дырыд вань но тазалыкед юн — ужано. 

— Уд малпаськы-а дышетскондэ азьланьтыны, эмчи луыны?

— Оло, малпаськысал но, дыр, эмчиослы куать ар дышетсконо ӧй ке луысал (серекъя — ред.). Мынам сомында дышетскыны дыры ӧвӧл — ужаме потэ. Но мон та ӧнерелы но туж шумпотӥсько. Со сяна, али анай-атаелы юрттыны дыр шедьтэме луэ. Вырисько на тортъёсты, пӧртэм ческыт десертъёсты пыжонэн но. Нылкышноослы маникюр лэсьтӥсько. Огъя вераса, уже тырмыт. 

— Марина, вераськемед понна тау! Ужад бадӟым вормонъёс сӥзисько. Вань ужъёсад вутскыны кужымед мед луоз!