Механизатор Владимир Тукметов

Та арняе Балтась Культура юртын бадӟым, данъяськымон но шумпотымон ужрад ортчиз — ёросысьтымы сӥё-дано ужасьёсты, бадӟым карыса, грамотаосын, таукарон гожтэтъёсын но коньдонкузьымъёсын пусйизы. Сценаын район главалэсь Рамиль Нутфуллинлэсь кузьымъёссэ басьтӥзы гурт удысын тыршисьёс но, пӧртэм социальной удысъёсын ужасьёс но. Соиз шумпотымон: арлы быдэ азьмынӥсьёс пӧлын удмурт тыршисьёсмы но луо. Куд-огеныз тӥледыз но тодматэммы потэ.

Механизатор Владимир Тукметов

Владимир Тукметов — ёросысь самой адӟем карымон но ушъямон механизаторъёслэн одӥгез. Музъем ужлы со 34 арзэ сӥзем ини. Соин вераны луэ: Владимир Тукаевичлэн вань шуымон ассэ валаны кутскемез дырысен улонэз музъем ужен, техникаен юн герӟаськем. Трос аръёс ӵоже гурт удысын тыршеменыз валче но гурт возёс удыслэн азинсконаз пыртэм люкетэз понна со туэ «ТР-ысь гурт удысысь сӥё-дано механизатор» нимен пусйиськиз.

— Уг ватӥськы, таӵе бадӟым каремзы, сӥё-дано механизатор нимен пусъемзы, туж шумпотымон вал. Ужам уждэ адӟизы ке, дунъяны быгатӥзы ке, котькин но шумпотэ, дыр, ни со. Та дырозь но таукарон гожтэтъёс басьтылэме вань. Сётэмзылы шумпотӥсько, — шуэ Владимир Тукаевич.

Зэмзэ но, кыӵе ужез быдэстӥд ке но, кивалтӥсьёслэн таукарыны, ужъя данъяны быгатэмзы котьку шумпоттэ. Тужгес но Владимир Тукметов кадь кема-кема аръёс ӵоже одӥг интыын тыршем ужасьёсты. Зэм, школазэ йылпумъямез бере Владимир Тукаевич Ципьяысь мебель лэсьтон фабрикаын пуконъёс, табуреткаос лэсьтыса ужам ке но, ас интызэ со музъем удысын ужаны кутскемез бере гинэ шедьтэм, 1986-тӥ арын (соку егит Владимир Германиын армиын служить карыса бертэм луэ). Службазэ йылпумъям бераз вордскем гуртаз, Тагашуре бертыса, егит воргорон «Труд» колхозэ ужаны интыяське. Со нуналысен ини со обществолэн оскымон ужасез луэ. Нырысь Владимирлы ДТ-75 тракторез оско. Кема ужа пиосмурт со тракторен. Тодэ солэсь котькуд ёзъёссэ, «висёнъёссэ». Туннэ нуналэ со вылын ини кык техника лыдъяське — МТЗ-1221 тракторен но ужа Владимир Тукаевич.

— Соиныз но, таиныз но ужасько. Вань улон бусыын — гыриськод, кизиськод... Музъем бордаз кыске ук. Соин ужме но яратӥсько. Ӧй ке яратысал, сомында ар ужаны ӧй быгатысал ни, — валэктэ Владимир Тукаевич.

Школазэ йылпумъям дырысеныз ик ужаны кутскем бере, солы дышетскыны но йӧтымтэ. Ужаны кутскем бере кыӵе дышетскон ни? Ма, зэмзэ ке верано, туж кулэ но луымтэ со Владимирлы — солы аслаз ужез сюлмызъя вал. Зарни киосыз нокыӵе ужлэсь кышкаллямтэ, кивалтэт мар карыны косэм — сое ужам. Котькуд гурт удысын ужасьлэн кадь, солэн но пӧртэмез луэ: вазь ӵукнаысен уйинозь ужанъёс, техника но куддыръя ужаны люкетэ.

— Ужаку шуг-секытъёс луо ни со. Куддыръя жадиськод но. Но гурт улон, колхозын ужан мыным кельше. Техникаен ужаны яратӥсько, — пусъе вераськисе. — Азьпалан но умой ужаны мед кылдоз. 

Малы ке но тросаз учыре гурт удысын ужасьёс асьсэ сярысь вераны возьдасько, кышкало яке воксё малпало, соос газетэ гожтымон адямиос ӧвӧл шуыса. Уг тодӥськы, малы озьы малпало соос. Валэкто тазьы: огшоры ужъёсты быдэсъясь адямиосты малы газетэ гожъянэз? Гожъялэ, шуо, дышетӥсьёс, визьнодасьёс, врачъёс но мукетъёс сярысь. Соослэн, пе, ужзы трослы секытгес но кылкутымонгес. Бен, споръяськыны но уг луы кадь, но соглаш луыны но секыт: котькинлэн ужез аспӧртэмлыко но со дыре секыт ук. (Юри газетэ тросгес гожъяно-а, мар-а гурт удысын ужасьёс сярысь?).