Мон луысал ке дышетӥсь...

5-тӥ коньывуонэ дышетӥсьёс асьсэлэсь ӧнер праздниксэс пусйизы. Малпасько, соос трос гинэ пӧртэм шуныт кылъёс кылӥзы. Нош кыӵе луыны кулэ зэмос дышетӥсь? Ципья шоръёзо школаысь 7-тӥ классын дышетскись нылпиос ӟуч кылъя уроказы (дышетӥсьсы — Нина Давлекова) асьсэлэсь малпанъёссэс гожтӥзы. Тӥледыз но соосын тодматэммы потэ.

Малпасько, мон дышетӥсь луысал ке, мынам урокам котькинлэн лыктэмез потысал. Мон ваньзэ рос-прос, валамон но капчи валэкто. Мон понна валтӥсез, дышетскись материалэз мед валалоз шуыса. Эшшо урокъёсы шулдыр луозы, татын ваньзы вераны но ас малпанъёсынызы люкиськыны быгатозы. Дышетскисьёсы ӵемысь парен яке группаосын ужалозы. Мынам урокъёсам практикаез тросгес луоз. Кин ке шонертэм валэктон сётӥз ке, янгышсэ валэкто, аслыз янгышсэ тупатыны луонлык сёто, ведь котькуд адями ас янгышъёсыз вылын дышетскыны кулэ. Дышетскисьёс йыртэмазы яке ӵашетӥзы ке, соосты буйгатыны тыршо. Кылсярысь, кыӵе ке уж сёто яке тунсыко учыр верало.

Дорысь уж ялан уг сёты, малы ке шуоно урокын трос дышетскомы, нош нылпиос жадё, соослы но шутэтскон кулэ. 

Уроклэн пумаз мон одно ик тунсыкъясько, кельшиз-а урок, мае будэтэмзы потэ яке кыӵе воштӥськонъёс пыртэмзы потэ шуыса.

Дышетӥсьлэн ужез капчи ӧвӧл, но адями та ӧнерез быръе ке, озьыен, со солэн призваниез луыны кулэ.

Гаврилова София

Кин ке но малпа, дышетӥсьлэн ужез сокем секыт уж ӧвӧл шуыса. Сыӵе адямиос уг ик валало, луоз, кыӵе секыт со уж. Зэмзэ ке верано, мон дышетӥсь ӧй луысал.

Дышетӥсь луыса ужан понна, чидан, кужым кулэ, нылпиосын ужаны, тунсыкъяськытыны быгатоно но, конечно, темаосты, правилоосты валэктыны йӧндыроно. Эшшо кылзӥськисьтэм нылпиосын ужаны секыт, котькудӥзлы нимысьтыз амал шедьтоно.

Мон дышетӥсь луысал ке но, мон кемалась ужысь кошкысал ини. Но мынам бырйыны луонлыке ӧй ке луысал но мыным дышетыны тупасал ке, мон дышетскисьёсты валаны тыршысал. Соослэн но трос ужзы: дорысь ужъёс, кинлэн ке кружокъёсыз вань, кудогъёсызлэн улоназы кыӵе ке шуг-секытъёссы луо, кудъёсыз дышетсконлы люкето. Соин но мон нылпиослы трос уж ӧй сётысал. Дышетскисьёсты но дырын-дырын гинэ чурыт кутысал.

Виссарионова Ирина

Дышетӥсь — со кулэ луись профессия. Малы ке шуоно дышетӥсьёс дышето сыӵе адямиосты, кудъёсыз, оло, бадӟым адямиос луозы. Малпаське ай, мар луысал, дышетӥсьёс ке ӧй луысалзы? Хаос кылдысал, ведь адямиослэн дышетскемзы но ӧй луысал. Кин луысалмы асьмеос? Ведь ӵапак соос ик асьмеды улонлы дышето.

Мон дышетӥсь луысал ке, урокъёсты тунсыкогес карысал, кылсярысь, ми 30 минут дышетскысалмы, нош кылем 15 минутсэ вераськысалмы, мон тунсыкъяськысал, ма соослы урокын кельшиз, нош маиз ӧз. Соослэсь верамъёссэс лыдэ басьтыны тыршысал. «Кык» но ӧй пуктысал дышетскисьёслы, ведь нылпиослэсь задача быдэстымтэзэс котьку азьтэменызы гинэ валэктыны уг луы ук, куддыр соос валатэк но кылё, кызьы быдэстоно ужез. Азьтэм луысалзы ке но, оценказэс тупатыны луонлык сётысал. 

Мон урокъёсты сокем тунсыко ортчытыны тыршысал, нылпиос ӵашетыны мылзы но ӧй потысал. Классэным пӧртэм вечеринкаос, походъёс но мукет ужрадъёс радъясал. Соосын одӥг тулкымын луысал. 
Оло, соку нылпиос урокъёсты кельтэмысь дугдысалзы но шумпотыса школае ветлысалзы. 

Ваньзэ тае гожтыса, мон валасько, макем дышетӥсьлэн ужез секыт но кылкутымон.

Плотникова София

Мон дышетӥсь луысал ке, котькуд дышетскисьын ас ужпумъёсме быдэстон понна луонлыкъёс адӟысал. Дышетскись ассэ гажамон адямиен мед шӧдоз шуыса, умой но каньыл атмосфера кылдытысал.

Мон урокъёсты ортчытыны тыршысал, котькуд дышетскисьлы тунсыко мед луоз, котькудӥз выль тодон-валанъёслы мыло-кыдо мед кыстӥськоз шуыса. 
Йылпумъяса, мон гожтысал на, дышетӥсь луон — со секыт уж. Дышетисьёс вылэ трос уж куштӥське. Со дыре ик урокъёсты но ортчытоно, кудъёсызлэн ке классы но вань, отын но трос гинэ пӧртэм ужпумъёсты быдэстоно.

Плотникова Мария

Мон дышетӥсь луысал ке, дорысь ужез ӧжытгес сётысал. Урокъёсын тунсыко шудонъёс ортчытысал. Кылзӥськисьтэм дышеткисьёсты классысь уллясал. Урокъёсын трос гожъяськыны ӧй курысал. Мынам информатикая яке трудъя дышетӥсь луэме потэ. Оценкаосты тупатыны но лэзьысал.

Ахметов Ильназ

Мон дышетӥсь луысал ке, кылын вераськон (устной) предметэз нуысал: литература, обществознание яке история, малы ке шуоно со капчи профессия. Кылсярысь, одӥг параграф лыдӟид но дышетскисьёслы верад. Нош дорысь уж сярысь верано ке, мон лыдӟыны но юанъёслы валэктон шедьтыны косысал.

Капчи уж — кылын вераськон предмет.

Зайнуллин Камиль

Мон дышетӥсь луысал ке (уг оскиськы, луысал шуыса), мон трос правилоосты но оценкаосты воштысал. Кылсярысь, дышетскись сочинение гожтыкуз дас янгыш лэсьтӥз ке, котькуд туала дышетӥсь солы «кык» пуктысал ини, мон озьы ӧй лэсьтысал. Мон сямен, дышетскисьёслы «кык» тыроно ӧвӧл, ведь озьы нокинлэн но дышетскон мылкыдэз уз сайка. Мон солы янгышъёсыз вылын ужаны косысал. «Кык» интые буш кельтысал, со интые дышетскисьлы со темая ик куинь поллы тросгес дорысь уж сётысал. Озьы дышетскись темаез но пыр-поч валасал-дышетысал, собере сочиненизэ но «витьлы» гожтысал.

Эшшо мон чебер но туала модая дӥсяськыны лэзьысал, малы ке шуоно яркыт но чебер дӥськутлэсь дышетскисьёс котьку шумпотыса но умойгес дышетскысалзы, капчи мылкыдын лыктысалзы. Мон ваньзэ уг вера ни, мар мон лэсьтысал. Но малпасько, правилоосты одно ик вошъяны кулэ. 
Йылпумъяса верасал: дышетӥсь — со туж креативной но творческой профессия.

Степанов Владислав

Дышетӥсь — со кылкутымон уж. Соос асьмеды быдэс улон сюресамы келяло. Соослэн ӧнерзы — со нимысьтыз искусство, малы ке шуоно соос котькуд нылпилы нимысьтыз амал шедьтыны кулэ, соослэн урокъёссы котькудӥз понна тунсыко луыны кулэ. 

Мон дышетӥсь луысал ке, котькуд нылпилы тупась амал шедьтысал, тунсыкъёссы сярысь тодысал но, озьыен, сыӵе урокъёс ортчытысал, кудъёсыз соос понна тунсыко луысал. Класс эшлыко но нылпиос ог-огзылэсь малпанъёссэс кылзыны мед быгатозы шуыса, ужъёсты кык кузя быдэстыны ӵектысал.

Кузнецова Полина

Дышетӥсь луысал ке, мон дышетскисьёсын одӥг тулкымын луысал. Соосын огкыл шедьтон понна йӧно дышетӥсь луыны тыршысал. Бадӟым нагрузка сётонтэм, ӧжытгес дорысь уж сётъясал. Уроклэн пумаз маин ке шудытысал, куно карысал. Контрольной но самостоятельной ужъёс дыръя дас вить минутлы классысь потысал. Темаез пыр-поч валэктысал.

Урокъёс мӧзмыт луонтэм, серемес мылкыдо дышетӥсь луэме потэ. Трос гожъяськыны но ӧй косысал. Оценкаосты тупатыны лэзьысал. Аслым яратоно дышеткисьёсты ӧй бырйысал.

Тӥни сыӵе дышетӥсь луэме потэ!

Наумова Софья

Мон дышетӥсь луысал ке, котьку дышетскисьёслы юрттысал. 
Школаын мон классэн кивалтӥсь луысал, телефонын пукыны но мылкыдъя дӥсяськыса ветлыны лэзьысал. Мон аслам дышетскисьёсыным эшлыко улысал. 

Ионов Александр

Мон дышетӥсь луысал ке, дышетскисьёсыным эшъяськыны тыршысал. Мон соослы пӧртэм шудонъёс но тунсыко ужъёс малпасал. Мынам урокъёсам дышетскисьёс учебникысь гинэ ужъёсты ӧй быдэстысалзы, пӧртэм йыртӥянъёсты но лэсьтысалзы. Нылпиосты тунсыкъяськытон понна котькуд урокын сётэм темая пӧртэм тунсыко фактъёс сётысал. Но самой валтӥсез — мон ноку но классын яратоноосты ӧй бырйысал.

Кушакова Анжелика

Мон дышетӥсь луысал ке... Мон аслым математика предметэз бырйысал. Мыным капчиен сётӥське примеръёсты но пӧртэм заданиосты быдэсъяны. 
Мынам классын ваньмыз лад-лад луысал. Дышетскись куашетэ — замечание лэсьтӥсько. Куинь урок ӵоже озьы ик куашетысал но ӧй кылзӥськысал ке, мон «кык» пуктысал. Трос дорысь уж ӧй сётысал, кылзӥськисьтэм нылпиез кужмысь ӧй дышетысал, замечание сётысал но «кык» пуктысал. 

Романов Артём