«Мон — шудо адями!»

7 гудырикошконэ аслэсьтыз 70 аресъем юбилейзэ пусъе тодмо удмурт кырӟась но крезьгурчи, Россиысь сӥё-дано артист, Удмурт Элькунысь калык артист, асьмелэн аспалмы — Балтась музъемлэн дано пиез — Геннадий Васильевич Кузнецов. Вордскиз со Татарстанысь Балтась ёросысь Ципья гуртын 1955-тӥ арын.

Ципья палъёс кемаласен тодмо кырӟаны-вераны, эктыны-шудыны быгатэменызы. Геннадий Васильевичлэн семьяез но та ласянь быгатонлыкеныз висъяськылэм. Атаез, Василий Иванович, туж усто шудэм кубызэн. Крезьгуран амалэз но паймымон луэм солэн. Мукет шудӥсьёс бам бордазы ӝиптыса смычоксэс кыскаллям ке, атаез кубыззэ пыдес вылаз пуктыса шудылэм. Кыӵе гинэ гуръёс пӧрмытъямтэ, ваньмыз сюлэме пыӵамон луэм, угось атаезлэн гурез, дырекъяса сямен, адями куара кадь чузъяськылэм. Сыӵе гур кылдытон понна со кубыззэ пыдесыныз куалекъятэ вылэм. Геннадий Васильевич тодаз вае: «Одӥг пол, тодӥсько на, кырын ог кызь градус кезьыт, соос ваньзы казакъёс кадь дӥсяськемын, туж тазаесь, кужмоесь воргоронъёс, атае кубызэн шудэ. Кӧня егитъёс адӟизы-кылӥзы солэсь та амалэн шудэмзэ! Гуртысь одӥг сюан но, мукет шулдыръяськон но сотэк ӧз ортчылы кадь. Атае кемалась кулӥз ни, но солэн кубызэн шудэм гуръёсыз али ке но пель сьӧрам чузъясько кадь». 

Анаез Мария Семёновна егитгес дыръяз чебер куараеныз висъяськылӥз. Апаез но, Ляля Васильевна, туж чебер кырӟа. 

Пичи дырысеныз ик Геннадий Васильевич малпам киноартист луыны. Эшеныз валче сыӵе малпанзы луэм, нош дыр ортчемъя, эшез быръем лэсьтӥськон удысэз. «Мон но эшеным валче строительной колледже дышетскыны мыныны малпай вал. Экзаменын пукыку, билет шоры учки но, мынам ӧвӧл та шуи но, потыса кошки», — тодаз уськытэ Геннадий Васильевич.

Пинал дырысенызы ик асьсэос асьсэды шулдыртыса будӥллям соос: художественной самодеятельностьын кырӟаса, эктыса, духовой оркестрын шудыса. Вал дӧдьые пуксьыса, котькыӵе куазен мукет гуртъёстӥ удмурт спектакльёс пуктылыса ветлӥллям. «Соку ик сценатэк улэме уг луы ни вал», — шуэ Геннадий Кузнецов.

Школаез йылпумъямез бере, Казане крезьгуръя училищее пырыны мынэ Геннадий Васильевич, но сое уг куто, нырысь армие мын, шуо. Соин со «Сельхозтехника» предприятие слесарь луыса ужаны интыяське. Ар ортчыса, дышетскыны пыре Удмуртиысь культпросветучилищее. Но дышетсконзэ куспетӥ кароно луэ: 1973-тӥ арын Геннадий Кузнецовез армие басьто. Службазэ со Латвиын ортче, военно-транспортной авиациын. Армиын дыръяз мукет военнослужащейёсын ӵош вокально-инструментальной ансамбль кылдыто. Отын трос концертъёс сёто.

Арми радъёсысь бертэмез бере Геннадий колледжын дышетсконзэ йылпумъя, собере «Италмас» ансамбльлэн директорез Анатолий Мамонтов сое дораз ужаны ӧте. Та ансамбльын Геннадий Кузнецов 1990-тӥ арозь тырше. Со вакытэ ик, 34 аресаз, РСФСР-ысь тужгес егитэз сӥё-дано артист луэ, собере — Удмурт Элькунысь калык артист. Со туж данъяське, ужезлы вылӥ дунъет сётыны быгатӥзы шуыса. 

Тӥни озьы 1990-тӥ арын, «Италмасысь» тросэз валтӥсь артистъёс кошкыса, «Айкай» театр кылдэм. Кутсконэз туж секытэн сётӥськем: крезьгуро инструментъёссы но луымтэ, дӥськут но утчано-малпано луэм. «Милям коллективмес калык азе быдэсак вашкала удмурт дӥськутэн поттыны мылкыдмы вал угось. Ваньзэ чидам-вормим. Концертъёсын гуртъёсы потӥськом ке, нырысь ик коркась корка ветлылӥм, пересьёслэсь сандыкъёсысьтызы вашкала дӥськутсэс дуно дунын но басьтылӥм», — тодаз вае Геннадий Васильевич. 

Нялтас вераса, театр кылдэм бере, кема малпаськиллям, кыӵе солы ним сётыны. Соин валче ялӥллям конкурс: кин коллективлы усто но чебер ним сётоз. Трос вариантъёс пӧлысь бырйиллям Геннадий Кузнецовлэсь малпанзэ — «Айкай»!

Озьы ик пусъеме потэ: Геннадий Кузнецов туж усто крезьгурчи но луэ. Со удмурт кылбуръёсъя крезьгуръёс кылдытэ. «Крезьгур гожъян — мон понна хобби», — шуэ со. Солэн тужгес тодмо кырӟанэз Михаил Федотовлэн кылъёсызъя гожтэмын, «Мон бакчаям мертто пинал льӧмпу» шуыса нимаське. Яратоно крезьгуро инструментъёсыз пӧлын луэ арган, озьы ик со гитараен, ударникен, флейтаен, ымкрезен но шудыны быгатэ. 

Мынам Геннадий Васильевичлэсь юаме вань, артистлэн ужез капчи-а шуыса.
«Артистлэн ужез капчи ӧвӧл. Сцена вылэ потыса, тон котыр ласянь кельшымон мед луод. Калык соку ик учке выросъёстэ но, дӥськуттэ но, кырӟаны-вераны быгатэмдэ но. Учкисез уд алда. Нош со быгатонлык ас кожаз уг лыкты. Ужаны кулэ, туж трос ужаны. Кыӵе ке образ кылдытон понна синучкон азьын астэ чаклано. Туж чаклано кырӟан-веран кылъёсты. Егит муртлэн котькыӵе удысын кумирез луыны кулэ. Тон но быръем адямиед кадь ик быгатӥсь мед луод, вылӥе ӝутскыны мед тыршод. Мон та ласянь троссэ адӟем карылӥ Муслим Магомаевлэсь но Валерий Ободзинскийлэсь», — юанэлы валэктон сётӥз мыным дано артист.

Геннадий Кузнецовлэн кузпалэз но, Таисия Павловна, удмурт Элькунысь сӥё-дано артистка. Тодматскизы соос 1990-тӥ арын «Италмас» ансамбльын. Собере кема аръёс ӵоже ӵош ужазы «Айкай» театрын. Соослэн нылзы но пизы вань. Шуныт но ӟеч кылъёсын тодаз вае Геннадий Васильевич аслэсьтыз варманайзэ, кудӥз утиз соослэсь нылпиоссэс. «Кык яке куинь толэзьлы кунгож сьӧры гастрольёсы кошкыкумы, нылпиосмы оскымон но сюлмаськись киосы кылё вал», — шуэ артист.

«Мон — шудо адями!», — шуэ со ачиз сярысь. Малы ке шуоно азьвыл ик солэн пичи дырысеныз артист луон малпанэз быдэсмиз — улонзэ со творчестволы сӥзиз. Солэсь кырӟанъёссэ туж яратыса но витьыса пумита калык. Со удмурт кылэз, лулчеберетэз но фольклорез данъя, калыклы вуттэ! Озьы ик со яратоно кузпал, атай но песятай! 

Мон но туж данъяськисько, мынам сыӵе дано но калыкен гажано ӵужмуртэ вань шуыса! Шумпотӥсько, нылпиосы но Геннадий Васильевичлэсь адӟем карыса удмурт кырӟанъёсты но эктонъёсты яратыса будо шуыса. «Мон но Геня агай кадь тодмо но усто кырӟась луо!» — данъяськыса вера нылы. 

Ми понна бадӟым шумпотон луыса, 
Кема улы Тон музъем вылын!
Задор мылкыд, семьяын шудбур
Медаз куштэ тонэ улонын!
Ваньмылэн мылкыд каронъёсмы
Тынэсьтыд мылкыддэ мед ӝутозы.
Шудбурен но шумпотонэн тыр нуналъёсыд мед ортчозы!

Елена Фомина, Ярак-Чурма гурт