«Мунё сюан» сярысь кылэмды вань-а?

«Мунё сюан» сярысь кылэмды вань-а? 

Тӥ азьын туж тунсыко туспуктэм. Со лэсьтэмын луыны кулэ 1980-тӥ аръёслэн кутсконаз. Та туспуктэмын Балтась ёросысь Сизнер гуртысь нылъёс. Соослэн киязы кубочуклы кельшись пичи бодыос, нош бодыос борды думемын пичи басма кесэгъёс. Юан кылдэ: мар меда со?

Адямиослэсь юалляськыса но интернет источникъёсысь бугыръяськыса, пичияк ивортодэт шедьтыны луиз ик. Утёд ке, Балтась ёросысь удмуртъёслэн азьло дыръя луэм сыӵе тунсыко йылолзы, нимаськем со «мунё сюан», кыкетӥ нимыз — «кубочук куран». Кылсярысь, Сизнер гуртын сое ӵапак «кубочук куран» нимызъя тодо. 

Та йылол сярысь этномузыковед, искусствоведениея доктор, Удмурт Элькунысь тодосъя сӥё-дано ужась Нуриева Ирина Муртазовна «Удмуртская музыкально-песенная традиция: специфика жанрообразования и функционирования» шуыса нимаськем диссертацияз вакчияк ивортодэт сётэ. 

Солэн верамезъя, таӵе йылол Татарстанысь Балтась ёросын пусъемын луэм. Вӧйдыре, сюан кырӟанъёсты кырӟаса, 10-15 аресъем нылъёс коркасен корка пыраса ветлӥллям. Одӥгез соос пӧлысь, зэмос сюанын сямен ик, кияз кутэм кубочук. Нылъёс озьы, коркасен корка пыраса, басма юдэсъёсты бичаллям, бӧрысь, куспазы люкыса, мунёоссылы дӥсь вурыны мед быгатозы шуыса. Татысен ик, дыр, та йылоллэн нимыз но, шуэ тодосчи. 

«Мунё сюан» одӥг нуналысен куинь нуналозь кыстӥськыны быгатэм. Нылпиос огаз юртэ люкаськыса, люкам кеньырлэсь обрядовой шыд но ӝук пӧзьтӥллям, коркаос кузя ветлыкузы, соосты чукиндэр сюкасен (квасэн) куноятӥллям, пе. 

— Пыр-поч вераны уг быгатӥськы ни мон та йылол сярысь. Но тодӥсько, Вӧй праздник дыръя коркасен корка ветлӥськом вал шуыса. Кин ке пичи басма сётэ вал, нош кин ке кубочукамы кык коньы манет шуккылӥз. Милемлы, пичиослы, шулдыр потэ вал озьы ветлыны, — тодаз вае Сизнер гуртын вордскем но быдэ вуэм кышномурт Наталия Плотникова.

Тӥни сыӵе тунсыко ивортодэтъёсты ватэ вылэм та туспуктэм. Нош тӥ тодӥськоды вал-а «мунё сюан» сярысь?

Туспуктэм Анфиса Ермохиналэн архивысьтыз