Мылысь-кыдысь пумиськон

Кемалась ӧвӧл Ӟаны гуртын улӥсь Иван Васильевич Ермаковлы 80 арес тырмиз. Солэн котырес лыдпусэзлы сӥзем трос ӟечкыланъёс потӥзы «Азьлане» газетлэн бамъёсаз. Иван Васильевичез тодымтэез ӧвӧл, дыр, асьме палан — трос аръёс ӵоже кивалтӥсь луыса тыршиз со Ӟаны школаын. Солы сӥзьыса пумиськон ужрад ортчытыны малпаллям туала школаын ужась дышетӥсьёс. Мыным но шуд усиз та пумиськонын луыны. 

Азьло ик гожтэме потэ куазь сярысь. Пушкинлэн кылбурысьтыз ӧжытак ӟуч кылын вераса: «Вечор, ты помнишь, вьюга злилась!» Малпаськон кылдӥз — ма карано? Удмуртъёс озьы шуиллям: «мынонзэ мынод, бертонэз вань али». Нош ӵукнаяз куазь ӵапак воштӥськиз! Уй куспын нош ик Пушкинъя луиз: «Мороз и солнце — день чудесный!» Таӵе шундыё нуналлы шумпотыса, сюрес вылэ потӥмы. Тани сюрес капчи луэмен вазьгес ик школае вуимы. Татын ужась коллективлэн тыршемез урамысен ик адске. Паськыт, вӧлмыт, чылкыт лымы мычемын — школалэн ымнырыз! Дышетӥсьёс но, школаез утялтон бордын ужасьёс но огкылысь ужало шуыса школае пырыку ик шӧдыны луэ. Лыктэм куноосыз шуныт пумитало пичиос но, бадӟымъёс но — таиз ини школалэн пуштросэз! Дырмы вакчиен рос-прос учкыны ӧм вуэ школаысь музеез, со понна нимаз ик вуоно на. Мыным туж тунсыко потӥз отын!

Ӧтем куноосыз актовой залэ люкаса, ӟечкы-лан ужрадэн паймытӥзы. Ладэн-ладэн Иван Васильевичлэсь улон сюрессэ кылзыны но адӟыны быгатӥмы. Трос шумпотон, серекъян луиз отын, куддыръя синвуосмес, кутыны быгатытэк, ӵушылӥмы. Чебересь кырӟанъёс, кылбуръёс кылзӥмы сцена вылысен. Валамы: удмуртлыкез утён бордын тыршыса ужало али будӥсь нылпиосын!

Нимаз ик вераме потэ, кыӵе адӟымон кивалтӥсь луэм Иван Васильевич! Соин ӵош ужам директоръёс ваньзы сямен люкаськыса ӟечкыланы малпаллям. Соос трос гинэ шуг-секытъёс пыр потэмын ке но, мылкыдъёссы пинал али. Паймымон капчи мылкыдо соос! Улонысь серемес учыръёсты верало, арганэн, гитараен шудо, кырӟало, эктыны но быгато на! Соос шоры учкыса паймоно, шумпотоно, ӧжытак ӝоже но усёно. Малы меда аръёс дырто?

«Эх, дауръёс, улон дауръёс! Сяська сямен тӧлӟо но кошко!
Оген медаз ортче та аръёс, ӵошен уломы, эшъёс!»

Ӵошен ке улӥмы — кужмо луомы! Та кылъёс семьялы но тупало, школаын ужасьёслы но, тодмо эшъёслы но, пӧртэм калык вискын но. Быдэс дунне вылын но озьы медло вал!

Иван Васильевич! Вордскем нуналэдлы сӥзем люкаськонмы «вӧй вылтӥ» кадь ортчиз! Зэмос пумиськон — шулдыръяськонлы пӧрмиз. Семьяед но тынад синмаськымон. Ваньдылы юн тазалык, трос аръёс ӵоже шудо улыны мед кылдоз! 

Туж бадӟым тау каронмес вераськомы школаен кивалтӥсьлы Грахов Константин Викторовичлы, дышетӥсьёслы, утятон но сиён пӧран удысын ужасьёслы! Тӥляд огинэ, тупаса но тыршыса ужамды син азе йӧтымон! Ӟаны школалэсь нимзэ котьку вылын возьыны тазалыкты мед луоз, ваньмылы тупаса улон сӥзисько!

Нина Андреева

Туспуктэм: И. Камалов