Наталья Буракова — котькуд ласянь паймытӥсь нылкышно

Нылкышнолэн чеберлыкез паймытыны быгатӥсь луэмез бордын шуо. Сизнер гуртысь кенэн, Наталья Бураковаен, тодматскеме бере, та кылъёсын эшшо огпол соглаш луи.

Нылкышно юртлэн чылкытлыкез понна гинэ ӧвӧл, семья куспын тупаса, эшлыко улон понна но, матысьёсызлэн каньыллыксы понна но кыл кутэ. Котькыӵе ужлы но дунъет сётыны быгатыны кулэ нылкышнолы, ӟеч кылъёссэ но солы жаляно ӧвӧл. Наталья Буракова — сыӵе адӟем карымон, примере пуктымон кышномуртъёслэн одӥгез. Анайзыез но атайзыез понна со гажамон кен, кузпалэз понна — яратоно кышномурт, нылпиосыз понна — котьма ласянь пример луись муспотон анай.  Дарья, Никита, Алексей нылпиоссы анай-атайзы вӧзын удмуртлыкез гажаса будо. Та паймымон но адӟем карымон кышномуртэн лыдӟисьёсмес но матысенгес тодматэме потэ.

— Наталья, кӧня ке ар ӵоже тӥлесьтыд интервью басьтыны малпасько вал ини. Улыса-вылыса асьмелы тани пумиськыны но кылдӥз. Трос пол гуртоосты тӥледын вераськыны ӵектӥзы. Тӥледыз соос туж визьмо но ужась кен, оскымон кузпал но эш, адӟем карымон анай но кышномурт шуо. Вылаз ик, асьтэос пор луиськоды ке но, чылкыт удмурт кылын вераськиськоды вылэм. Кызьы со озьы луиз, та сярысь ӧжытак вералэ вал.
— Мон сярысь сыӵе шуныт кылъёс верамзы понна гуртоосылы бадӟым тау. Но зэмзэ верано ке, удмурт кылэз дышетскемелы сокем паймымон но ӧвӧл кадь. Вордски мон 1986-тӥ арын Бадӟым Карлыган гуртын. Нош со гурт трос калыкысь адямиосты огазея. Отын вань удмуртэз но, порез но, бигерез но, ӟучез но. Карлыганысь трос йӧскалыкъем школаын 11-тӥ классэз йылпумъяй, собере Мари-Турекысь училищее сиён пӧзьтӥсьлы дышетскыны пыри. Собере Йошкар-Олае пельнянь лэсьтонъя цехе ужаны интыяськи, берлогес магазинын вузкари. Озьы куинь ар ӵоже ужаме бере, вуоно кузпалэным, Сергеен тодматски.

— Асьтэос пор, вуоно кузпалды — удмурт. Кызьы тӥляд анай-атайёсты та шоры учкизы? Анайзыды но атайзыды тӥледыз кызьы пумитазы?
— Мынам аслам анае вазь кулӥз, монэ атае будэтӥз шуыны кулэ. Ӵужмуртэ но ӵужапае солы туж юрттӥзы монэ быдэ вуттыны. Кызьы верай ини, вордскем гуртам, Карлыганын, трос калыкысь адямиос уло.  Соос азьло дырысен куспазы эшлыко но тупаса улӥзы. Мон ачим но Карлыганысь «Ӟардон» ансамбле ветлӥ, соку трос выль удмурт кылъёс тодӥ. Соин удмурт пилы быземме умоен адӟизы, нокин пумит кыл ӧз вера. Кузпалэлэн ӵыжы-выжыосыз но монэ туж умой пумитазы, со понна соослы бадӟым тау.  

— Но котьма ке но чылкыт удмурт гуртын улыны дышон капчиен сётскымтэ, дыр…
— Нырысь туж секыт вал — ваньмыз ят, гурт но тодмотэм, адямиосыз но. Вылаз ик мукет республика. Нырысь вордскем палъёсылэсь туж мӧзми, сопала сюлмы кыскиз. Эшъёсы но соку ӧй вал али татын. Ваньзы удмурт кылын вераськизы, нош мон пырак удмурт кылэз соку ӧй тоды…

— Но тӥ ят гуртэ лыктӥды ке но, Сизнерын ят адями ӧд луэ. Удмурт кылын но туж вольыт вераськиськоды, акцентты но уг шӧдӥськы ни.
— Табере уг шӧдӥськы, дыр, ини. Мон ведь 2007-тӥ арын татчы картлы кошки. Сергеен тодматскеммы бере, куинь пол гинэ адскимы, гужем тодматским, толалтэ кураны лыктӥз ини. Ог-огенымы телефон пыр вераськимы. Нош рос-прос ог-огмес тодыны ини семья кылдытэммы бере гинэ кутскимы шуыны луэ. Картлы кошкеме бере, Сергей монэным удмурт кылын гинэ вераськиз, ӟучен воксё ӧм вераське. Озьы ик удмурт кылын вераськыны дыши, мон понна со чик но секыт ӧй вал, кӧня ке толэзьскын вераськисько вал ни чылкыт удмурт кылын. Школаын дышетскыкум ик, классысьтым тросэз дышетскисьёс удмуртъёс вал. Эшъёсынымы куспамы куддыръя удмурт кылъёс пыртылыса вераськылӥмы. Мон малпасько, нылмурт картлы кошке бере, кузпалзэ сяна, солэсь ӵыжы-выжыоссэ но, солэсь вордскем кылзэ но гажаны кулэ шуыса. Удмурт кылэз гинэ ӧвӧл, бигерзэ но дышетски. Татчы улыны лыктэме бере, нырысь Смаиль гуртэ магазинэ ужаны интыяськи, ӵапак отын бигер кылэз дышетски. Секытэн сётскиз мыным со кыл, но кулэ бере — кулэ. Смаильысь бигер песяйёс дышетӥзы монэ бигерен вераськыны (серекъя). Смаиль гуртысь ик фермаын но кунян сюдӥсь луыса ужай. Отын но бигер кылэз тодэме туж юрттӥз. Со гуртысь ик почтаын но кык ар ӵоже ужай, отын но бигер кылэз тодэме ужме трослы капчиятӥз. Почтаын ужаны мыным туж кельше вал, адямиосын вераськыны, лыдӟиськыны мон яратӥсько. Али тани ньылетӥ арзэ ини Ципья школаысь столовойын ужасько. Татчы ужаны ӧтемзы бере, малпаськытэк лыктӥ. Малы ке шуоно ужасько аслам дышетскем ӧнерея, сиён пӧзьтӥсь луыса. Ньыль кылъёсты тодӥсько бере, Ципья школаын но уг ышы, дыр (серекъя). Пичиысен тросгес ӟуч кылын вераськыса будӥ. Пор кылэз но тодӥсько вал. Нош али вунэтыны кутски ни, тросгес удмуртсэ но бигерзэ тодӥсько.

— Нош нылпиосты вордскем бере, кыӵе кылын соосын вераськыны кулэ шуэм юан ӧз кылды-а?
— Сыӵе юан ӧз кылды. Мон тодӥ: мынам нылпиосы удмурт сямен вераськыса будозы. Пинал ваён юртысен нырысетӥ нылпиме ваемен валче, песяй внучказэ удмурт кылын вазьыса пумитаз, со дырысен нылпиосмы удмурт кылын вераськыса будо ини. Со вакытэ мон ачим но удмурт кылын вольыт вераськисько вал ни, соин та ласянь нокыӵе шуг-секытъёс ӧз кылдэ. Нылпиосы куиньназы но удмурт кылын вераськыса будо. Школаын но удмурт кылэз дышетско, со соослэн вордскем кылзы. Покчи пимы Алёша гинэ удмурт кылэн туж уг вераськы, ӟученгес вераське.

— Пор кылэз но мед тодозы вал шуыса малпанды но ӧз луы-а?
— Нылпиосмылэн али ке но пор кылэз дышетскыны мылкыдзы вань. Карлыганэ ӵыжы-выжыосмы доры куное мынӥськомы ке, соослэсь пор кылын вераськемзэс кылзо, нылпиосылы тунсыко потэ. Никита «малы ми пор кылэз но ум дышетскиське меда» шуэ. Монэ сыӵе кылъёсыз шумпотто. Атайзылэн кылыныз гинэ ӧвӧл, анайзылэн вордскем кылынызы но тунсыкъясько нылпиосы шуыса шумпотӥсько.

— Вераськонмы Анайлэн нуналэзлы но сӥзем бере, юатэк кельтыны уг быгатӥськы: нылпиосты понна тӥ кыӵе анай луиськоды?
— Куронъёсты пуктӥсь анай шуысал. Нылпиосы монэ, кузпалме, семьямес ноку возьытэ медаз уськытэ кадь потэ. Мед луозы соос тыршисесь, ужасесь но йӧноесь. Нош соос сыӵе мед будозы шуыса, нылпиосын вераськыны, ужаны, вырыны кулэ. Мон соосты дышетӥсько котьку кутскем ужзэс пумозяз вуттыны. Дорысь ужзэс но озьы ик ужатӥсько — кутскиллям вылэм, пумаз-йылаз мед потозы. Озьы дышетыны тыршиськомы нылпиосмес. Нылпиослэн мыным ноку но «тон урод анай» шуэмзы ӧвӧл. Ременен но соослы йӧтэмез ӧвӧл, сыӵе визьнодан амалъёсты ми ум кутӥське. Ваньзэ кылын валэктыны тыршиськомы. Асьмелэн примерамы — ужъёсынымы, кылъёсынымы — возьматӥськомы. Нылпиос ведь котьку анай-атайзылэсь адӟем каро.

— Наталья, тӥ ужаськоды, кузпалэныды ӵош куинь нылпиостэс визьнодаськоды, юрттэс чылкыт возиськоды. Маин ке выриськоды-а, тунсыкъяськиськоды-а шуыса юай ке, «Дыры ӧвӧл» шуоды-а?
— (Серекъя). Мон та юанэз вити. Туж яратӥсько книгаосты лыдӟыны. Лыдӟисько классикаез, нылкышно романъёсты. Кемалась ӧвӧл «Анна Каренинаез», «Тихий Донэз» выльысь лыдӟыса поттӥ. Та гожтосъёс мыным туж кельшо. Нылпиосы но лыдӟиськыны мед яратозы кадь потэ. Ми соосын кык библиотекаосы ветлӥськомы — Смаиле но Ципьяе. Дашалы книгаосты лыдӟыны яратонэ выжиз, со но лыдӟиськыны яратэ. Никита нош кырӟаны яратэ, Ципьяысь крезьгуръя школае ветлэ. Покчи пимы Алексей школае ӧз мыны али. Озьы ик мон керттӥськыны яратӥсько, кин ке керттэмме кельшытӥз ке, кузьмасько. Яратӥсько пӧраськыны но, семьяме ческыт пыжиськемъёсын шумпоттэме потэ. Со сяна, семьяенымы алмазной мозаикаез но кельшытӥськомы. Яратӥськомы вань семьяен пазлъёсты люканы. Оъя вераса, семьяын сыӵе каньыл, шыпыт ужъёсын дырез ортчытӥськомы. Жаляса гинэ вераны кулэ, дыр котьку уг луы. Нош ваньзэ вутскем но потэ кадь.

— Зэмзэ но, тӥледыз Сизнерын юнме гинэ чырткем но шаплы кен уг шуо, вылэм.
— (Серекъя). Палэнысен умойгес адске, дыр. Аслым но озьы верамзы вань, но мон асме туж чырткем ӧй шуысал. Котькытчы вутскыны уг луы. Анайзыме но атайзыме пусъеме потэ — Нина Михайловнаез но Михаил Денисовичез. Соос милемлы туж юртто, нылпиосмес визьноданы но, утьыны но. Вордскем дырысенызы трос кужымзэс сётӥзы но сёто внукъёссылы. Соос ӧй ке луысалзы, нокытчы ӧй вутскысал, дыр. Тау соослы туж бадӟым. Монэ умой пумитазы, куспамы керетэммы но ӧвӧл. Туннэ нуналэ но валче тупаса улӥськомы. Бадӟым тау кузпалэлы но. Сергей трос ужа. Туннэ нуналэ «Елмай» обществоын тырше, молоковозын водитель луыса ужа. Дорын луыкуз, со но нылпиосты визьноданы тырше, соосын дырзэ ортчытэ. Кылын но, ужын но дышетыны тырше. Озьы тӥни, огъя кужыммес поныса, нылпиосмес валче будэтыны, визьноданы, соослэсь зэмос адямиосты пӧрмытыны тыршиськомы.  

— Оскисько, сыӵе анай-атайзы луыку, вӧзазы песяй-бабайзы луыку, нылпиосты умой визьнод басьтыса будозы шуыса. Вераськемды понна бадӟым тау тӥледлы. Сӥзисько тӥледлы нырысь ик тазалык но шудбур, семьяяды каньыллык. Нылпиосты котьку мед шумпоттозы, мед луозы тӥледлы юн оскон но пыкет.