«Нянь – со узырлык, байлык» (+фоторепортаж)

Мон дышетӥсько соосты умой но тыршись луыны. Нош сыӵе бадӟым малпанэ кылдӥз: туала нылпиос няньлэсь кадырзэ мед тодозы шуыса. Соин ик анай-атайёсын ӵош ми та уж борды кутскимы. Нянь удысын ужасьёс дорын ветлытыны тыршим. Бадӟым тау шуэме потэ ООО «Дуслыкын» ужасьёслы. Ваньзы но валэктӥзы, возьматӥзы асьсэлэсь ужъёссэс. Библиотекаын ужась Римма Александровна милемлы дасяз нянь сярысь туж трос материал. Дано ужасьёс Г.Ефремов, Г.Захаров, Р.Гильмуллин сярысь тодӥзы. Озьы ик нылпиос «Азьлане» газетысь но ООО «Дуслыклэн» ю бусыосаз ужамзы сярысь тодӥзы. Нянь сярысь люкамы визькылъёс, выжыкылъёс, пӧртэм киужъёсты лэсьтӥмы. Малпасько, трос ужам ужмы огшоры уз кыльы шуыса. Нылпиослэн район газетэ но гожтэмзы потӥз нянь сярысь тодэмзэс. Тани соослэн малпанъёссы.

Мамыкова Таня:
Август толэзьлэн пумыз. Куазь пӧсь. Бусыос ӵуж-ӵужесь. Отын комбайнъёс ужало. Галина Борисовна, классэн кивалтӥсьмы, милемыз анай-атайёсынымы ӵош кык машинаен бусые нуиз. Бусыын ми адӟимы трос комбайнъёс. Ми лыктыку, комбайнёръёс лымшор каро вал. Милемыз но компотэн куно каризы. Бусыын нянь но туж ческыт потӥз. Собере комбайнлэн кабинаяз тубыса, укнотӥз адӟим вӧл-вӧл паськыт, октэм бусыез. Паймыса учким, кызьы ю-нянез окто. Татын милемыз пумитаз агроном Рафкат агай. Со милемлы валэктӥз, кызьы будэто нянез, кызьы со вуэ асьмелэн ӝӧк выламы. Рафкат агай пиналъёсты яратэ вылэм, милемыз машинаяз но пуктыса ветлытӥз.

Та нунал милям но, анай-атайёсмылэн но кема тодазы улоз. Табере тодӥськом ини, кызьы будэ нянь. Со туж секыт уж вылэм. Нянез соин но яратыны но утьыны кулэ.

Кешишева Ангелина:
Дунне вылын котьмалэсь но дуно - нянь! Со туж секыт ужаса гинэ ӝӧк выламы вуэ. Нырысь ик нянез кизьыны музъемез дасяло, собере кизё. Гужембыт утялто, нош гудырикошкон толэзьлэн пумаз арало. Арам бере ю тысь амбаре бертэ, отысен вукое нуыса сое изо. Собере гинэ нянь пыжо но магазинъёсы вутто. Мыным вузкарись вераз няньлэсь дунзэ. Со 22 манетысен 25-26 манетозь сылэ вылэм, нош асьме палан самой ултӥез Балтасьлэн нянез. Нянез котьку возьмано, данъяно, уг яра куяны. Нянен гинэ кӧтэз тырыны луоз. Няньлэсь бадӟым номыр но ӧвӧл, дыр. Со асьмелы анай кадь ик котьку но кулэ. Калыкын юнме уг верало: «Нянь сиид ке - бадӟым будод!» Мынам ӝоггес бадӟым будэме потэ, школаез йылпумъям бере магазинын ужаны малпасько. Мон но ческыт пыжем нянь вузало!

Матвеев Максим:
Мон туж яратӥсько песянаез. Со яратэ пыжиськыны. Солэн пирогъёсыз, табанез, шаньгиосыз туж ческытэсь. Со дышетэ нянез утьыны но яратыны. Песянае мыным весь вера: «Нянез сиыса быдты - бадӟым будод, сое куштыны уг яра». Нош мон сӥзисько солы пичи кылбурме:

Вазь ӵукна ик султыса песянае
Берга ини гур котыраз.
Буй-буй пыжем нянез солэн
Туж ческыт потэ мыным.

Терентьев Никита:
Няньлэн сюресэз сярысь гожтэме потэ мынам.
Тани бусыысь лымы шуназ гинэ, нош тракторъёс гуретыса ю тысь кизьыны дырто ини. Нуналъёс шунытгес луизы ке, котырак вожектоз но будыны кутскоз. Тани ю-нянь будэ, гужем ортче. Гужем пумын комбайнёръёс шумпотыса ю-нянез октыны пото. Пеймытозь тыршо соос. Собере ю вуэ бадӟым амбаре. Отын сое куасьто но вукое келяло. Вукоын лымы кадь тӧдьы пызь изо. Со пызез пекарняосы нуо. Нош отын ческыт нянь, батон пыжо. Учке али, кыӵе кузь сюрес ортче нянь асьмелэн ӝӧк выламы вуытозяз. Нянь удысын ужасьёслы тау шуэме потэ!

Папаев Кирилл:
Мон улӥсько Ӟаны гуртын. Гужемлэн одӥг нуналаз ми анай-атайёсын мынӥмы бусые. Со бусы мынам гурт дорысен кыдёкын ӧвӧл. Пӧсь вал соку. Бусыын но «пӧсь» уж мынэ вал: машинаос гурето, тузон потто. Ю-нянез окто вылэм. Мон синйылтӥ Юрик агайлэсь ужамзэ. Со мынам бускеле. Юрик агай бадӟым комбайнэн ужа. Милемыз кабинаяз пуктӥз но валэктӥз кызьы ужано. Туж жаль - ӧз ветлыты, пичиослы отын ветлыны уг яра вылэм. Мон Юрик агайлы кылбур гожтӥ:

Бусыын тырше комбайнёр
Вазь ӵукнаысен уйшорозь.
Со асьмелы ӝӧк вылэ
Ческыт нянь вуттыны тырше!

Евдокимов Филипп:
Малы меда мон нуналысен нуналэ сыӵе бадӟым будӥсько? Мон нянь сиисько! Юнме уг верало ук мӧйыос: «Нянь сиид ке - бадӟым будод!» Монэ будэтыны туж тырше Галя песяе. Школаысь бертыку, урамысен ик ческыт пыжиськем зын вӧлъяське, Галя песяе табань яке перемеч пыжем, дыр! Бызьыса дорам пырисько но песяйме яратӥсько, нош со монэ чайен но пӧраменыз сюдэ.

Мон тодӥсько, туж кема но трос ужась киос пыр нянь ӝӧк вылэ вуэ шуыса. Та арын ми классэн экскурсиосы трос ветлӥм. Бусые, амбаре, вукое, магазинэ вуылӥм. Отын тодматским агроном Рафкат агаен, Юрик агаен но мукет комбайнёръёсын, шофёр Лёвик агаен, пожарной машинаен ветлӥсь Саша агаен, амбарын ужась Славик агаен но Витя агаен, вуко изӥсь Коля агаен но магазинын нянь вузась Оля апаен (со манам ӵужкенаке). Тани кӧня нянь удысын ужасьёс! Нош та ваньмыз ӧвӧл али. Ваньзылы соослы мон сӥзисько умойзэ гинэ. Вань калыкез нянез утьыны но гажаны курисько.

О.Н.Исаев нимо Шор Кушкет шоръёзо школаысь 2-тӥ классын дешетскисьёс кивалтӥсьсы Евдокимова Галина Борисовна