«Ойдолэ шошма удмуртъёслэсь кырӟанзэс кырӟалом!»

Фестиваль огазеяз Марий Эл но Татарстан элькунъёсысь но Киров улосвылысь удмуртъёсты

Асьме ёросысь но та ужрадэ трос фольклор ансамбльёс пыриськизы. Соос пӧлын вал Ципьяысь, Сырьяысь, Вуж Кушкетысь, Ӟаныысь, Вукогуртысь, Вуж Турьяысь, Карек-Сермаысь но Покчи Лӧзяысь коллективъёс но самодеятельной артистъёс.

Фестивальлэн валтӥсь ужпумез – удмурт калыклэсь фольклор сям-йылолъёссэ утён но азинтон, творческой коллективъёслэсь этнокультурной кусыпъёссэс юнматон но опытэн вошъяськон.

Удмурт йӧскалык ужрадлэн эшшо одӥгез валтӥсь ужпумез – нянез данъян. Фестивале пыриськем куноос но, кузёослы мур гажамзэс возьматыса, выль пыжем сукыри нянен лыктӥллям вал.

Выль нянь вылаз ик удалтонлыкез, узырлыкез, тыр улонэз возьматӥсь символ но луэ. Та удалтонлыкез адӟыны луэ вал «Бусы но гурт сиёнъёс» ним улсын радъям адӟытонын но. Фестивале пыриськисьёс «ческыт» адӟытонэз кылдытонэ асьсэлэсь люкетсэс пыртӥзы: ваньзы вайиллям вал выль урожайлэсь дасям удмурт калык пыжиськемъёсты, кудъёссэ жюри дунъяз но нимысьтыз дипломъёсын пусйиз.

Фестиваль лулысь-сюлмысь ортчиз, яркыт но шулдыр праздниклы пӧрмиз

Лулчеберетъя юртын кузёяськем шуныт мылкыдэз котькин шӧдыны быгатӥз: артистъёс но, учкисьёс но. Та ӝытэ чузъяськизы калык кырӟанъёс, залэз тырмытӥзы удмурт крезьгуръёс, нош учкисьёс котькуд выступать карисез сюлмысь чабыса пумитазы но келязы.

Ӟаны Починка (Карлыган) гуртэ та нуналэ Татарстан Элькунысь но Киров улосвылысь гинэ но огъя 15 творческой коллективъёс но самодеятельной артистъёс вуизы. Пусйыны кулэ: тросэз соос Балтась ёросысь вал.

Ӟаныысь фольклоръя «Шулдыр ӝыт» удмурт калык ансамбль, Покчи Лӧзяысь фольклоръя «Вуюись» ансамбль но солистка Любовь Конькина, Ципьяысь фольклоръя «Зангари» но эктонъя «Азвесь гырлы» ансамбльёс, Ципья школаысь нылъёслэн «Камали» ансамбльзы, Сырьяысь фольклоръя «Сырья зоутъёс» самодеятельной ансамбль, Вуж Турьяысь «Марӟан» коллектив, Вуж Кушкетысь «Чибори» ансамбль но Тамара Фоминалэн но Алина Филиповалэн дуэтсы, Вукогуртысь эктонъя «Меленка» нылпи коллектив, Карек-Сермаысь солистка Зоя Никитина – ваньзы соос учкисьёслы асьсэлэсь сюлэм шунытсэс кузьмазы, вордскем шаерзэс яратэмзэс но калык лулчеберетлэсь узырлыксэ возьматӥзы.

Балтасьёс сяна, фестивале пыриськизы Нырьяысь вуэм фольклоръя «Сактон» удмурт калык ансамбль, Вятской Полянаысь «Чипчирган» удмурт калык ансамбль, Поркитяк гурт клубысь «Шулдыр мылкыд» ансамбль но Порез гурт клубысь фольклоръя «Тюрагай» коллектив.

Шöдӥськиз, котькудӥз сценае потэм коллектив рос-прос дасяськыса лыктэм вал шуыса. Карлыганъёс ваньзэсты асьсэлэсь матысь адямиоссэс кадь пумитазы, кичабонъёссэс öз жалялэ.

Ваньзы ужрадэ пыриськем коллективъёс лауреатлэн дипломеныз но синпель кузьымен пусйиськизы. Соин но нокин куашкам мылкыдын фестивальысь öз кошкы шуыса малпасько. Концерт номеръёс йылпумъяськем бере ваньзы фойеын мызганэн юмшазы. Татын но асьмелэнъёс висъяськизы, шонергес верано ке, Кушкетысь мызганчи Алексей Павлов висъяськиз. Котьку сямен со калыкез шулдыртӥз, эктӥсьтэмзэ но эктытӥз!

Нялтас вераса, Алексей лулчеберетэн герӟаськем одӥг ужрадэ но пыриськытэк кыльыны уг тыршы. Тани, кылсярысь, кылем толэзе со Ижкарын ортчем «Арган ӝыт» ужрадэ вуылӥз, собере Вятской Полянаын калыкез шулдыртӥз, кемалась ӧвӧл Казаньын, удмурт егитъёслэн пумиськоназы пыриськыса но, аслэсьтыз усто мызганчи луэмзэ возьматӥз вал, табере тани Ӟаны Починкаын воректӥз.

Наталья Иванова, Карлыган лулчеберетъя юртлэн кивалтӥсез:

– Милям лулчеберетъя юртамы удмурт лулчеберетъя центр ужа. Озьы ик ми дорын ужа Россия Федерациысь Калык творчествоя дано коллектив – удмурт калык фольклор ансамбль – «Ӟардон». Со трос ветлэ, палэнэ пота, шошма удмуртъёслэн традиционной культураенызы тодматэ. Туэ ансамбль Японие вуылӥз, кылем арын со вал Китайын. Нош ӝоген ми ансамбльлэн покчи группаеныз Уйпал Осетие мыномы. Ансамбльлэн кивалтӥсьёсыз но лулчеберетъя юртысьтымы ужасьёс бадӟым саклык висъяло этнографической экспедициослы, соослы луыса ми шедьтӥм ни костюмъёслэсь кыӵе ке элементъёссэс но, озьы ик шедьтӥм, шошма удмуртъёслы тупась кырӟанъёсты.

Таӵе шедьтосъёслы, мазэ веранэз, ми туж шумпотӥськом но котькуд элементэз, кудзэ ми шедьтӥм – костюм-а со, яке кырӟан-а, кырӟанлэн кыӵе ке люкетэз-а – одно ик номерамы пыртӥськом, одно ик солы кыкетӥ улон сётӥськом. Шумпотымон, воргоронъёслэсь традиционной «Агай сямен» но нылкышноослэсь «Апай сямен» эктонъёссэс нематериальной лулчеберет мерасысь объектъёслэн реестразы пыртӥзы.

Мар вераме потэ фестивалья? Фестиваль милям ньылетӥзэ ортчытӥське ни, со нимысьтыз проектмы улсын радъяське. Туж умой, сыӵе фестиваль вань шуыса. Бен, фестивальёс али трос, пыриськылыны гинэ вуы. Милям фестивалямы пичи лулчеберетъя юртъёс но пыриськыны быгато, кудъёсыз, вождэс эн вае, балетмейстертэк но, аккомпаниатортэк но кылемын, озьы ке но улыны, мыло-кыдо ужаны тыршо. Со туж умой, ми ӵапак таӵе коллективъёслы сцена вылэ потыны луонлык сётӥськом шуыса, соос асьсэды кулэсэн уг шӧдо, ми ваньмы татын огкадесь.

Туэ фестивале дас вить коллективъёс пыриськизы. Мар вераме потэ? Мон Ципья школаысь «Камали» коллективез адӟыса, сыӵе шумпотӥ, отын нылпиос анай кылынызы кырӟало шуыса. Со туж зол! Та умой ӧвӧл шат? Со туж умой!

Кыкетӥез, мар сярысь мынам вераме потэ: туж потэ, тросгес коллективъёс традиционной материалэн мед ужалозы шуыса, со медаз вуны, чузъяськемысь медаз дугды вал. Угось котькуд интыын вань аслыз гинэ тупась кырӟанэз, эктон, кудзэ отын гинэ экто, озьы гинэ экто. Со медаз ышы вал, мед улоз вал. Со туж дуно. Малы ке шуоно вал коллективъёс, аккомпаниаторзы но вань, но малы со арганэн уг быдэсты, нош эстрадаысь фонограмма лэзе… Эктӥськом эстрада улсын, костюмъёсмы но туала сямен вуремын ни, ачиз костюм ыше кадь ни.

Нош тани «Ӟардон» котьку песянайёслэн сандыкъёсысьтызы поттэм дэремъёсын, ми соосты вуриськом, выльдӥськом, но ачиз басма котьку улэп. Вань нылпиосмы милям шошма удмуртъёслэн традиционной дэремъёсынызы. Пиосын, конечно, секытгес, соослы шедьтыны шуг луылэ. Соин ик пиослы ми вуриськом, но, вуриськом, конечно, вуж лекалаосъя.

Соин ик мынам вераме потэ, туж умой, коллективын аккомпаниатор вань шуыса. Но ойдолэ шошма кырӟанэз кырӟалом! Ойдолэ шошма удмуртъёслэсь кырӟанзэс кырӟалом, озьы, кызьы кырӟазы песянайёсты, кызьы кырӟазы тӥляд анай-атайёсты, выжыды. Сцена вылын со тросгес мед луоз кадь потэ. Бен, со секыт, мон уг споръяськиськы, туала эктонэз пуктыны капчигес, вужзэ улӟытон, солэсь манерзэ возьматон сярысь, но озьы ке но, туж потэ, со мед луоз, тани таӵе коллективъёсын мед улоз шуыса. Мон малпасько, оло, куке но со озьы ик луоз.