Ожгарчиосмы понна сюлэммес сётӥськом! (1-тӥ люкет)

Пиосмы понна тыршиськом

Гуманитарной юрттэт сярысь вераськом ке, туннэ котькуд адямилэн со нырысь ик нимысьтыз ожгар операциен герӟаськемын. Пиосмы туж секыт условиосын нюръясько, кӧняез ини пыраклы ышемын, кӧня пиосмес гуртъёсысь шайвылъёс пумитазы, кӧня нылпи атайтэк кылиз, кӧня нылкышно синкылиоссэ кисьтӥз... Ваньзэ лыдъяны кутскид ке, быдэс зарезь тырмымон луоз, дыр. Нош шимес иворъёс ялан вуо но вуо.

2022 арысен калыкмы ӧжыт ке но огазеяськыны кутскиз кадь. Шимес вакытъёс котькуд адямиез ассэ коллектив пушкын одӥг механизм кадь ужаны дышетӥз. «Шапыкысь зарезь кылдэ» шуэм визькыл табере огшоры кылъёс гинэ ӧвӧл, соос улонысь примеръёсын юнматэмын. 

Кема малпаськид ке но, шедьтыны уз луы сыӵе адямиез, кудӥз пумит луоз юрттыны. Пиналэз но, шоро-куспоез но, арлыдоез но ас кужымезъя вормонэз матэ карыны тырше. Ваньзы валало: макем зол юрттэт, сокем пиосмылэн лул кужымзы но йылэ, соос понна тыршисьёсыз но сюлмаськисьёсыз вань, соос быдэс шаерлы кулэ адямиос.

Инмарлэн косэмезтэк чибинь но уг лоба, шуиськом. Оло, Инмарлы кулэ луэм калыкез огазеяны но валэктыны: котькуд адями дуно, котькуд адями аслэсьтыз миссизэ нуэ. Асьмеос одӥг бадӟым машиналэн детальёсыз кадь, одӥгез ке сӧриське, со тыпак интыяз дугдэ, яке берлань чигна. Соин дэмен уж гинэ мерлыкез азьлань нуыны быгатэ.

Туннэ нуналэ пиосмы, куд-ог нылъёсмы но туж кышкыт югдурын — шаермылэсь быдэслыксэ но тынӥсьлыксэ утён гожын. Соослэн ӧвӧл шутэтсконзы, соос уг быгато киынызы шонтыны но ужзэс ӵуказелы кельтыны. Соос уг тодо, мар луоз азьпалан, вань туннэ, но ӧвӧл ӵуказе.

Покчи Лӧзя палась юрттӥсьёс сярысь юалляськыку, тросэз Наталия Михайловна Артемьева сярысь веразы. Нимысьтыз ожгар операци кутсконысен ик со кужымезъя пӧртэм юрттӥськон ужъёсы пыриське но мукетъёс понна адӟем карымон пример луэ. Соин герӟаськыса, юрттон мылкыдъёсыз сярысь тунсыкъяськыны малпай. Наталия Михайловна пумит ӧз луы, ваньзэ лад-лад валэктыса вераз:

— 25 куарусёнэ 2023 арын Айдар Хисматуллин жингыртӥз. Соку туж юрттэт кулэ вал. Медикаментъёсты но нырысь ик кулэ луись арбериосты фасовать карыны адямиос ӧжыт вылэм. Кема малпаськытэк, соглаш кариськи. Вылын Ушмаысь Валентина Ивановна Манашева но та уже мыло-кыдо пыриськиз, Вылын Ушма школаысь ужасьёс но юрттӥзы. Мынам Сизнер гуртысь вынъёсы но мобилизовать каремын вал, племяннике но нырысетӥ нуналъёсысеныз ик нимысьтыз ожгар операцие пыриськиз. Покчи Лӧзя гурт поселениысь но пиосты шаермес утьыны басьтӥзы. Соос понна сюлэм вӧсь луиз. Кызьы ке но юрттыны уз луы медам шуыса, гуртысь калыклы вазиськи. Со бордысен уж кутскиз. Маскировочной сетьёс но школаын керттылӥм, блиндажной свечаос но лэсьтылӥм. Шумпотымон, та уже школаын ужасьёс гинэ ӧвӧл, нылпиос но пыриськизы. Дырзэс пайдаё ортчытон муген соос но зэмос юрттӥськисьёс луизы.

Та сяна, школаысь волонтёръёс мобилизацие шедем семьяосысь нылпиосты Выль арен ӟечкылало, юртъер котырзэс лымылэсь сузяны но юртто. Нылпиослы кузьымъёсты но Наталия Михайловна ачиз басьтэм.
Малпасько, таӵе усьтэм но бадӟым сюлэмо адямиос ик шаермылэн азинсконаз шӧдскымон люкет пырто, нош азьпал радын ожмаськись пиосмы понна оскымон пыкет луо. Соос понна номыр жаль ӧвӧл, мед гинэ сӧл-таза бертозы но семьяязы шумпотыса улозы!

Азьланьтонэз вань на.

Туспуктэмъёс: Н. Артемьева