Ожгарчи, агроном, мушкась

Войнае кошкизы 80 котыр воргоронъёс, ог дасо воргоронъёс ож тӥрлык поттон заводъёсын тыршизы, нылкышноос но быдэ вуымтэос, пиналъёс арлыдо воргоронъёсын артэ колхозын ужазы. Войнае кошкемъёс пӧлысь 50-эз ож лудэ кылизы. Соослы ведь 18-40 арес гинэ вал, самой позыртыса ужан, улон дырзы. 1940 арын похозяйственной книгая гуртамы 61 кузёлыкын 297 мурт лыдъяськем, соос пӧлысь 101-ез пиосмуртъёс, 196-ез нылкышноос. Война бере 1954 арын та лыдпусъёс таӵе: 58 коркан 278 улӥсез…

Войнае басьтӥзы Матвеев Серафим Матвеевичез но. Серапи агай (озьы шуиськом вал) ожмаське Нырысетӥ Прибалтийской фронтлэн 166 стрелковой дивизиезлэн 423 стрелковой полказ. Красноармеец Матвеевлы Харьков, Новгород, Воронеж, Витебск областьёсты трос иськеме ортчыны тупа. Серапи агайлэн верамез вань вал, кызьы сое, пулемётчикез, командирез ушъялляз. Берпуметӥ жугиськонъёсыз Витебск областьысь Шумилинской районын ортче. Татын ожъёс туж лекесь луо. Соос 6 октябрьысен Выль 1944 арозь кыстӥсько. Со Невелико-Городокской наступление шуыса нимаське. Трос ыштонъёс луо асьме солдатъёс пӧлын: 43351 — быремын, 125351 — сӧсырмемын, яке ваньмыз ог 3 толэзьлы 168902 ожгарчиос. Нуналлы быдэ 1941 адями (басьтэмын Интернет вотэсысь). 25 декабрьысен 30 декабрёзь секыт ожъёс мыно Шумилинской районысь Прадедово гуртэз мозмытонын. Та ожын рядовой Матвеев но секыт сӧсырмыны шеде. Татын Матвеевлэсь кышкатэк ожмаськемзэ «За боевые заслуги» медален пусъё. Вераны кулэ, та Шумилинской районысь тросэз гуртъёс копак быдтэмын луо, со сямен соосты куд-огъёссэ война бере ӧз ни ӝутэ. Прадедово гурт ӧвӧл ни. Рядовой Матвеев, сӧсырмыса госпитальын эмъяськемез бере, армие мыныны уг ни яра. Озьы тулыс 1944 арын вордскем гуртаз бертэ.

Серапи агай йыро-визё воргорон вал. Туж-туж чотаськыны яратылӥз. Сое колхозын агрономе интыяло, берлогес ю тысь амбарын завхоз луыса ужа. Толалтэ Ципьялась «Красной Октябрь» артельын котырысь гуртъёсысь доразы каб шуккисьёслы бун сётъянэн но, кабзэс люканэн но вырылӥз. Серапи агайлэн та ужез сярысь Ѓаны шоръёзо школаысь шаертодон музейысьтыз сьӧд кӧмо тетрадез но вера. Туж тунсыко тетрадь! Берло аръёсы пенсие потытозяз, Серапи агай Чапаев нимо (али ООО «Бурнак») колхозын мушкась луыса ужа. Муш семьяос сюлэсь трос, радэн-радэн пуктылэмын, узыр улмопу сад, беризь арама, тылобурдоос кырӟало! Чылкыт возё вал ужан интызэс. Санаторийын кадь вал. Серапи агай бадӟым пиеныз Педореныз (Педор агай) муш утизы. Педор агай Казаньын трос пол нимысьтыз муш вордонъя курсъёсын дышетскемын вал. Оценкаосыз «4» но «5» гинэ луылӥзы. Пӧрме вал муш вордонзы. Колхоз муш бакчаын чечы кыскизы ке, ми, пичиос, шорем нянь кутыса, чечыен чай юыны ветлылӥмы. Беризьёс улын ӝӧк, котырак ӟус, ӝӧк вылын ӵуж-ӵуж ческыт чечы. Куддыр мушъёс но лекаськылӥзы. Чечыез трос уд сиы, но куно каремзы бадӟым. Серапи агайёслэн асьсэ доразы но войналэсь азьло ик мушсы луэм. Мон тодэмъя, муш умортоосы бакча кузя улмопуос ултӥ нюкозь ик кыстӥсько вал. Мултэс чечызэс басьтылыны палэн гуртысен но вуылӥзы.

Серапи агай тӥр усточи но вал, гур но пуктылӥз. Мурт доры ужасьлы ёрмыса, сюлворыса ӧз ветлылы. Ваньмыз ас киыныз, визьмыныз лэсьтылӥз. Пиоссэ но ачиз кадь ужаны дышетылӥз. Серапи агай кузпалэныз Насьтаен (Серапи кенак) ньыль пи будэтӥзы. Нырысетӥез, кызьы верай ни, Педор, кыкетӥез — Валентин, куинетӥез — Петя, покчиез — Санька. Пиосыз пӧлысь Валентин гинэ улэп на, со ас семьяеныз Свердловск ёросысь одӥгаз городын улэ. Петя пиез Новосибирск областе интыяськыса, вазь кулӥз. Солэн Юрий пиез кылиз, Новосибирскын улэ. Сюлэмыз ялан татчы, пе, кыске. Педор агайлэн кык нылыз пӧлысь одӥгез гинэ вань на, Свердловск областьысь гуртын улэ. Нош гуртэ кылемын Санькалэн кузпалыз Владик но Юрий пиосыз. «Бурнак» ООО-ысь Бурнак фермаын муш кадь ужало: Владик Ирина кузпалэныз пудо сюдо, нош Юрийлы ветфельдшерлэсь ужзэ оскизы. Санькаос Киров улосысь бертыса, выль интые корка пуктӥзы, Санька но кулэмын ини. Серапи агай 1985 арын кулӥз. 73 арес сяна ӧй на вал. Жаль, Серапи агайлэн куке но дынгыр-дынгыр котырак юртаз улӥсез ӧвӧл ни. Куддыр кузпалъёслэн пизы вордскиз ке, юрт кузё вордскиз, шуо. Серапи агай но озьы ик малпаз вал, дыр. Туала дыре сыӵе малпанъёс ӧвӧл ни. Пиос кыльысалзы ик, дыр, атай юртазы, но кышнооссылэн чиньыоссы буямын.

Ортчо аръёс. Но войнае пыриськемъёслэсь нимъёссэс котьку тодамы возьыны кулэ. Тодамы возёно гуртын но заводъёсын тыршисьёсты, соос сярысь будӥсь пиналъёслы вералляно, соос, ас улонзэс жалятэк, асьмелы тупаса улон сётӥзы.

Василий Никитин

Карек-Серма гурт