«Пинал видео Редактор»

«Пинал видео Редактор»

Паймымон маке та — Интернет! Быдэс дуннеез ватсам вотэс котькудмылы быгатонлыкъёсмес, тодон-валанъёсмес будэтыны пумтэм-йылтэм луонлыкъёс сётэ. Пукты аслыд ужпум, ватса вылаз тыршонлыктэ, ужаны-валаны юрттӥсь видеороликъёс аркаын, котькыӵе удысъя, котькыӵе наукаын, профессионал луод! Потэ ке луэмед усто пӧрась-пыжиськись — пожалуйста! Потэ вылэм суредаськись, дизайнер луэмед — пожалуйста! Потэ вылэм наукаосъя тодосчи луэмед — пожалуйста! 

Интернет, бергась ву сямен, ваньмес бордаз кыске — кӧкыысьсэ но пересьсэ но. Тодӥсько асэя. Асьмеос, Интернет вотэсысь «чонариос», Интернет ышыку, ваньмы но огкылысь луиськом: дунне быриз кожаськом. Огезлэсь огез чебересь суредъёс, тунсыко видеоос, йырез поромытӥсь крезьгуръёс — кужмоесь сиосыныз биня ас бордаз Интернет вотэс. Солы сётскисьтэмез одӥг-кык, дыр...

— «Тон понна мар со Интернет?», «Интернет — со шудыса дауртон маке гинэ-а?», «Кыӵе пайда поттӥськод аслыд Интернетысь?», «Кыӵе воштиськонъёс пыртэ тынад улонад Интернет?», «Интернет шудыны, дышетскыны, уксё ужаны юрттэ...» — таӵе юанъёс-малпанъёс бергазы кыл йылам я йырам Карлыган, Ӟаны, Ципья шоръёзо школаосын 7-11 классъёсысь дышетскисьёсын пумиськонамы. Пумиськонмы радъяськиз «Пушкинская карта» программая 19-21 феврале. Нылпиослэсь интернетын тик-токъёс учкылыса, пиф-паф ыбылиськыса юнме дырзэс быдтонлы пумит но интернетэз асьсэлы пайда пыртон сюрес вылэ выжтон муген радъямын вал видеомонтажъя «Пинал видео Редактор» нимо мастер-класс. 

Видеороликъёсты лэсьтон — со туж тунсыко, бордаз кыскись но туж пайдаё уж. Вылаз ик, мастер-классын учкимы-валамы: та ужлэн номыр но шуг-секытэз ӧвӧл! Видеоролик лэсьтыны быгатоз котькудӥз, кин ужаны йӧндыре мышкаен. Шумпотымон, дышетскисьёс пӧлын видеоролик лэсьтӥсьёс вань. Али соос туж ӧжыт. Куинь школаос пӧлысь, Карлыганъёсын пумиськонамы трогес шараяськиз, татын соос 4-5 кузя. Видеороликъёс лэсьтыны мылкыдды кенжытскиз ке, мар бордысен кутсконо?

— Тужгес кулэез — видеокамера но диктофонды ваньдылэн вань, соос телефон-смартфонады. Юалэ Яндекслэсь (мукет поисковикъёслэсь) видеофайлъёсын ужась кыӵе программаос — видеоредакторъёс вань. Соос туж трос, быръе асьтэлы кельшисьсэ. Дунтэм — бушын, ӟуч кылын программаос вань. Видеороликъёс лэсьтыны луэ онлайн форматын но. Валантэм вамышъёстэс лэсьтыны юрттозы дышетӥсь (обучающий) видеороликъёс. Эн кышкалэ кнопкаосы нюръяны! Соку ваньзэ вормоды! Тыршиды ке, Тӥлесьтыд, усто видеорежиссёр пӧрмоз! Бергатэ фантазидэс, пӧралэ паймытӥсь ужъёс, вӧлмытэ дуннее! ИИ — искусственный интеллект юрттӥсьты луоз! 

ИИ — ӵуказе нуналлэн ӧсэз. Пиналъёслы одно ик шедьтоно солы усьтон! Видео творчествое сюрес лёгисьёсылы верано кылы: уськытъялэ фото, видео камераяды котыр улостэс, гожъялэ диктофонады пумитады шедись тунсыко адямиосты! Али уськытъям тусъёс, аудио-, видеофайлъёс 30-50 арскын учкыны кылзыны, зарни дунъем, тунсыкоесь луозы! 

Куинь школаосын пумиськонмы сӥземын вал Анай кыллэн калыккуспо нуналэзлы. Соин ик «Лучший видеоролик» шараям конкурслэн валтӥсь темаез таӵе: «Малы сокем кулэ Анай кылэз тодон?» (2 тема: Мынам вордскем шаере; 3 тема: Ми — шошма удмуртъёс/ Ми — Балтач бигеръёс...) Та темая ик вал 7 юанъёсын дышетскисьёслы ӵектэм тест. Пумиськонъёсамы пыриськем ог 100 мында дышетскисьёс пӧлысь 47 нылпи юанъёсылы валэктонъёс лэзиз. Тау со понна ваньзылы! 

Юанъёслы йылсан: 47 нылпиос пӧлысь 39-эз — удмуртъёс, 6-ез — пор, 2-ез бигер нылпиос. Дас сизьымез 3 кыл тодэ: ӟуч, удмурт, пор я бигерзэ, вань азербайджан кылэз тодӥсь удмурт пинал но. Таос пӧлы ик ватсаны луэ ньылетӥзэ — школаын дышетскем кунгожсьӧр кылзэс. Тросэзлэн со англи кыл. Кык кылэз тодо ваньзы. Вань на вить кылэз тодӥсь кык мурт! Пиналъёс валало кудпала тӧллэсь пеллямзэ: кыл тодон со мукет калыкъёс доры, мукет шаеръёсы нуись ӧсъёслэн усьтонъёссы. Дышетскемзы потэ англи, испан, китай, корей, немец, француз, япон кылъёсты. 20 муртлэн (удмуртъёс) дышетскемзы потэ бигер кылэз, вань дышетскыны мылкыд карисьёс пор, удмурт кылъёсты. 

Конкурс сярысь. Конкурсэ кутӥсько Карлыган, Ӟаны, Лӧзя, Ципья школаосысь дышетисьёслэн но 7-11 классъёсын дышетскисьёслэн ужъёссы асьсэлэн куриськонзыя. Конкурсэ видеоролик лэсьтыны быгатэ одӥг яке кӧня ке мурт огазе люкаськыса (семья, класс, эшъёс, коллегаос). Видеоролик учкисьёслэсь анай кылзэс тодыны-азинтыны мылкыдзэс кенжытӥсь луыны кулэ! Конкурсэ пыриськемъёс диплом басьто, вормись — приз: 5000 манет. Куриськонъёсты но видеороликъёсты лэзёно та адресъя: aludm1@mail.ru 18 апрелёзь 22:00 часозь. Вожвылъяськонъя куарасётон мыноз шара онлайн-режимын 19-22 апреле ВК-ын: https://vk. com/id245270780 — пыр-поч пуштросэз отын.

PS: пумиськонмы ортчыса, вамыштӥсько машинаям. Киям телевизор, кык киын кутыны сузёнтэм коробка пушкын. Юрттыны мылкыд кариз Саша (нимыз воштэмын) нимо ӟеч пияш. Тодматскимы. Сашалэн анаез но атаез но удмуртъёс. Нош пизы — ӟуч, асьме сямен пал кыл но уг тоды! Мар шуысалды тӥ, гажано лыдзисьёс, Сашалэн анай-атаезлы? Мар шуиськоды асьтэлы асьтэос Анай кылыныды вераськыкуды, удмурт кылъёс интые ӟуч кылъёс пыртыса вераськыкуды??? 

Леонид Сапожников, Сырья гурт клублэн кивалтӥсез