«Пиналъёсын ӵош будӥсько»

Туала дышетӥсь азьын туж бадӟымесь куронъёс пуктэмын. Та дышетон удысэн гинэ герӟаськемын ӧвӧл. Туала дышетӥсь — со тодон-валан сётӥсь адями гинэ ӧвӧл, со визьнодась но, наставник но, эш но, психолог но, нырысетӥ ӝог эмъюрттэт сётӥсь но, сиён пӧрась но, огъя вераса, дышетӥсь — со трос палъем адями. 

Туннэ тӥледыз тодматэммы потэ егит воргорон-дышетӥсен — Александр Чириковен. Ачиз егит ке но, тодон-валанъёсыз трос, дышетон амалъёсыз но тунсыкоесь.

Александр Геннадьевич Чириков быдэ вуиз Сала Кушкет (Кисаль) гуртын. Пичи дыръяз ик солы туж кельшизы инкуазен герӟаськем пӧртэм явлениос. Соин Ӟаны шоръёзо школаез йылпумъяса, дышетсконзэ азинтыны малпа Казаньысь педагогикая кун университетын. Татын со басьтэ география но биология предметъёсъя дышетӥсьлэсь ӧнерзэ. 2017 арын Субаш валтӥсь школаын биологиен дышетӥсь луыса ужаны кутске. 2018 арын солы аслэсьтыз учконъёссэ но тодон-валанъёссэ ӧжытак воштоно луэ: Ӟаны шоръёзо школаын егит ӧнерчиез история но обществознание предметъёсъя дышетӥсе юнмато. Татын но егит дышетӥсь ассэ уг ышты. Переквалификаци ортчыса, со нылпиосты историяя но обществознаниея дышетыны кутске. Солэн трос лыдӟиськемез но материал пушкын эркын уямез нылпиосты синмаськытэ, нош небыт куараез буйгатэ. 2019 арын Александр Геннадьевичез Ципья шоръёзо школае ужаны ӧтё. Татын ини со география предметэн дышетыны кутске.

— Александр Геннадьевич, мар тӥ понна дышетонын валтӥсез луэ?

— Мон асме усто дышетӥсь шуыны уг быгатӥськы, опытэ куать ар гинэ на. Дышетыны кутскыны кышкыт ӧй вал, кышкамез нылпиос соку ик валало. Мынам малпамея, дышетӥсь нырысь ик материалэз ас примерез вылын валэктыны быгатыны кулэ. Котькуд дышетскись понна нимысьтыз подходъёсты утчано, дышетон амалъёсты быръёно, ватсаса материал утчано. Туала дышетскись — со воксё мукет даурысь пинал. Соослы огшоры лыдӟыса сётэм материал уг ни тупа, соосты ялан тунсыкъяськытоно, туала улонлы матын кароно. Бен, куддыр ваньмыз уг пӧрмы, соин ӵемысь трос опытэн дышетӥсь-коллегаослы вазиськоно луэ. Шумпотымон, соос мыным котьку юрттэт кизэс сёто.

— Дышетон сяна, тӥ классэн кивалтӥсь но луиськоды. Вералэ вал, кыӵеесь нылпиосты, анай-атайёсын но кусыпъёсты сярысь кӧня ке тодэммы потэ вал.

— Классэн кивалтӥсь луыны мыным соку директор Сайдаш Талгатович ӵектӥз вал. Туннэ нуналэ мынам классам 23 дышетскись, 8А класслэн кивалтӥсез луисько. Пӧртэм пиналъёс вань, сотэк уг луы. Но огкылысь луыны тыршиськом, соосын ӵош мон но малы ке дышетскисько, соос но мынэсьтым умойзэ басьто, дыр, шуыса малпасько. Та мынам нырысетӥ классэ ук, пиналъёсын ӵош будӥськом. Анай-атайёс но мыным пыкет сёто, кылдэм юанъёсын огкылэ вуыны тыршиськом.

— Школаын нылпиосын сяна, мукет дышетӥсьёсын, кивалтӥсьёсын, ужасьёсын но кусып возёно на. Та пумысен, Ципья шоръёзо школаысь коллектив сярысь мар верасалды?

— Коллективмы умой, бадӟымесь споръяськонъёсмы уг кылдо шуысал. Директормы, Раниф Рифатович, одӥг ужасьсэ но кылзытэк уз кельты, юрттэт кулэ луиз ке, одно ик юрттэ. Кивалтэт рос-прос ужъёссэ быдэсъя ке, коллектив но со кужымез шӧдэ, со сьӧры кыстӥське. Огъя вераса, таӵе коллективын ужаны умой. 

— Азьло дышетӥсьёс сокем кагазъёс пушкы выемын ӧй вал, та пумысен кыӵе малпанъёсты?

— Туала улон аслэсьтыз куронъёссэ пуктэ. Талэсь пегӟыны уг луы. Макем трос тон солы пумит луиськод, сокем аслыд ик азьланяз секытгес луоз. Урокын но, мукет занятиосын но нылпиез тунсыкъяськытон понна выль амалъёслы дышетсконо. Йыразы пичияк материал мед кылёз шуыса, куддыр уйбыт но малпаськоно луэ, пӧртэм литератураез лыдӟоно, ваньзэ сэрттоно-пертчоно. Бен, кагазъёс туж трос, эшшо информационной технологиос но интыязы уг сыло, ваньмызлы дыраз дышетскыса вуттоно. Огъя вераса, туала дышетон сӧзнэт (система) — со бадӟым дунне, кудаз нуналлы быдэ малы ке вылезлы дышетсконо. Тазьы гинэ пиналъёсты улонысь воштӥськонъёслы ӟеч дасяны луэ.

— Тау вераськемды понна, Александр Геннадьевич! Дышетон удысады азинсконъёс но выль вормонъёс сӥзиськом.

Гажано дышетӥсьёс, удысысь ветеранъёс, педагогъёс! Шумпотыса ӟечкыласьком тӥледыз удыс праздникеныды. Сӥзиськом тӥледлы юн тазалык, нуналлы быдэ вылезлы дышетскон, кылзӥськись пиналъёс, вормонъёс, шумпотон но вунонтэм шулдыр нуналъёс. Тӥляд ужды зэмзэ но мерлык понна дунъянтэм, тае тӥ асьтэос но туж умой валаськоды. Соин ужады котьку шундыё нуналъёс гинэ мед луозы. 

Вераськиз Юлия Щербакова

Туспуктэмъёс И. Камаловлэн