Покчи Лӧзя школаын удмурт блогеръёсын тодматскизы

«Нылпиосыз туала дыре номаин но уд паймыты, удмурт фильмъёс но возьматӥмы ини, пӧртэм сям-йылолъёс сярысь видеосюжетъёс но учкимы… Куинь ар ӵоже мар но ӧм малпалэ, тунсыко мед луоз шуыса. Нош туэ малпан кылдӥз, шор но бадӟым классъёсын дышетскись нылпиосты туала удмурт блогеръёсын но соослэн ужъёсынызы тодматыны», — ивортӥз Покчи Лӧзя шоръёзо школаысь удмурт кылъя но литературая дышетӥсь Наталия Антонова. Зэм но, тунсыко малпан, тужгес но туала дырлы, туала нылпиослы тупась. Озьы, ВКонтакте, Инстаграм но TikTok мерлыко вотэсъёсын утчалляськыса, Наталия Львовна удмурт блогеръёс сярысь информация люкам. «Кинъёс со блогеръёс, кыӵе тодмо блогеръёсты тодо пиналъёс, удмурт блогеръёсты тодо-а — та выллем юанъёсты эскерем бере, тодмо но али кутскись удмурт блогеръёсын тодматскимы. Пиналъёс тодӥзы, ВКонтакте мерлыко вотэсын «Школа удмуртских блогеров — Удмурт блогеръёслэн школазы» шуыса нимаськись огин вань шуыса. Та огин «Удмурт блогеръёслэн школазы» ӵектос (проект) улсын кылдытэмын вылэм. Со нылпиослэсь блогинг удысын тодон-валанъёссэс будэтонлы, быгатонлыкъёссэс волятонлы сӥземын. Ужрадэ пыриськыны быгато удмурт кылын вераськись нылъёс но пиос, школаын дышетскисьёс, кинлэн вань мылкыдыз мерлыко вотэсбамъёссэс анай кылынызы кылдытыны но нуыны. Малпасько, вотэсбамъёсазы удмурт кылын гожъяськыны мылкыд карем пиналъёс понна туж тунсыко шедьтос», — шуэ Наталия Львовна. Ачим но вотэсбамъёсме удмурт кылын нуыны тыршисько бере, тунсыко потӥз, утчаса шедьтӥ та огинэз. Зэмзэ но, та огинлэн вотэсбамъёсаз нылпиосын лэсьтэм пӧртэм видеосюжетъёс вань вылэм. Кылсярысь, одӥгез опыт каремзэ, мукетыз карантин сярысь, куинетӥез гуртэз сярысь, школаез сярысь видеосюжет лэсьтэм. И со ваньмыз удмурт кылын.

«Собере удмурт кылын блог нуисьёсын тодматскимы. Асьме ёросысь Александра Раимовалэсь, Удмуртиысь Виолетта Анисимовалэсь (pichirushechka нимыз мерлыко вотэсын) удмуртэн гожъям постъёссэс учкимы, Татарстанысь удмуртъёслэн НКА-зылэн огинъёсыныз тодматскимы. Собере TikTok мерлыко вотэсысь удмурт кылын видеороликъёсты учкимы. Нош покчи классъёсысь пиналъёсын, Удмурт кыллэн нуналэзлы сӥзьыса, интеллектуальной ӝӧквыл шудонъёсын шудӥмы», — вера ортчытэм ужрадъёссы сярысь Покчи Лӧзя школаысь дышетӥсь.