Редакциын куноын

Лэзем квитанциосты жребий амалэн шудытыса, куинь вормисьёсты шараязы. Соос пӧлы мон но шеди. Мон туж шумпотӥ. Асме выль профессиын эскери. Тодӥ, кызьы ми доры вуэ газет.

Редакцие пыреме бере ик, туж каньыл пумитазы куинь удмурт нылъёс. Таос «Азьлане» газет поттӥсьёс вылэм. Соос тодматӥзы редакциын ужасьёсын, асьсэ уженызы. Журналист Наталья Жукова статьяос гожъя. Тӥ тодӥськоды, дыр, ини сое. Солэн статьяосыз туж тунсыкоесь. Гожъя со адӟем карымон адямиос, семьяос, пичи удмурт гуртъёс сярысь, тодматэ гуртысь адямиосын. «Азьлане» газет дубляж газет луэ бере, татын ужасьёс бигерысен удмурт кылэ но статьяосты берыкъяло. Со понна соослэн переводчиксы вань. Кылысь кылэ берыктӥсь Екатерина Салтыкова дистанционно ужа вылэм. Газет баме поттоно текстъёсты эскерыса, редактировать карыса, кулэ тупатъянъёс пыртыса, Ольга Плотникова, валтӥсь редакторлэн воштӥсез, сётэ соосты верстать карыны, мукет сямен вераса, газет кылдытыны. Ваньмыз та ужъёс компьютер пыр лэсьтӥсько. Верстальщик Ольга Аскарова дась текстъёслэсь но туспуктэмъёслэсь газет бамъёсты лэсьтэ но лыдӟон понна печатласа поттэ. Собере 8 нимаз-нимаз печатлам газет бамъёсты нылъёс лыдӟо но берпум тупатъянъёсты пырто, кылем янгышъёсты тупатъяло.

Самой тунсыкоез но кельшымонэз мон понна луиз ӵапак газет бам кылдытон, янгышъёсты тупатон. Со дыре ик туж секытэз но луиз, дыр. Монэ но Ольга компьютер сьӧры пуктӥз. Соин ӵош текстъёсын кылем янгышъёсты тупатъяй, газет бам лэсьтӥ. «Одӥг дышид ке, номыр но ӧвӧл», — шуэ верстальщик Ольга Аскарова.

Собере, вань газет бамъёс дась луэм бере, эшшо огпол рос-прос ньыльнамы эскеримы но дась газетэз компьютер пыр Казане келямы. Мукет нуналаз газет лыдӟисьёс доры вуиз. Тӥни озьы ортчиз мынам редакциын ужам одӥг нуналэ.

Ӟырдыт ужан вакытазы милемыз, куинь ӵошен конкурсын вормисьёсты, туж шумпотыса пумитаз «Хезмэт» газетлэн валтӥсь редакторез Вакиф Мансурович Закиев. Со милемлы кузьмаз Таукарон гожтэт но уксёен кузьым. Фотое но, видеое но уськытыны вуиз, ӝӧк сьӧрын куно кариз. Туж тунсыко вераськыса, ог-огмесын тодматскыса, чай но туж ческыт потӥз. Ӧм но шӧдэ вераськон куспетӥ дырлэсь ортчемзэ. Мон туж шумпотӥ редакциын ужаса утемелы. Кемалась потэ вал ини редакцилэн улонэныз улэме. Малы ке шуид мынам анае но азьло дыре татын ужам, 1970-тӥ аръёсы. Со корректор но, линотипен но ужам. Мон данъяськисько анаелэн татын ужаменыз.

Туж кельшизы «Азьланеын» ужасьёс. Каньылэсь, визьмоесь, пыр-поч ваньзэ валэктӥзы, ужаны дышетӥзы татын. Ваньдылы туж бадӟым тау! Азьланьын но шумпоттэ, тунсыко статьяос гожъялэ! Газетлы гожтӥськисьёсты трос мед луозы!

Татьяна Клеймёнова,

Вуж Кушкет гурт