Рульлы но вордскем музъемлы оскымон луон

Ёросысь гурт предприятиос понна водитель – со огшоры профессия гинэ ӧвӧл, со инъет, кудӥз вылын возиське быдэс производство.

Автомобиль транспортын ужасьёслэн нуналзы азьын тодэ ваем потэ сыӵе адямиос сярысь, кинлэн ужез котьку уг адӟиськы, но соостэк гуртлэсь улонзэ син азе пуктыны но уг луы. Со гурт удысын ужась шофёръёс. Соослэн машинаоссы – со азьмынӥсь линия: соос фермаосы пудо сиён, бусыосы сиён, техникалы запчастьёс нуо. «Труд» возёсын сыӵе геройёсты нимын-тулын тодо. Туннэ ми кык водительёс сярысь вералом, кинлэн улон-вылонэз люконтэм герӟаськемын вордскем хозяйствоеныз.

Александр Германович Чернов: малпан улонэ пыӵаз

Александр Германовичлэн историез кутске Сырья гуртын. Вордскемын со 1961-тӥ арлэн гужемаз. Школаын ик, укмысэтӥ классын дышетскыкуз, «Кин луэме потэ?» шуыса нимаськем темая сочинение гожтыкуз, со шофёр луон малпанэз сярысь гожтэ. Со азьпалзэ тодыса веран луиз, вылды. Пичи дырысеныз, тракторист но комбайнёр луыса ужам атаез шоры учкыса, Александр пыӵатӥз техникаез яратон мылкыд. Дышетӥсьсылэн «техникаен эшъяське» шуыса верамез но солы сюрес возьматӥсь кизили луиз, дыр.

Профессие сюресэз шонер вал: Сырья гуртысь покчиёзо школаын дышетскон, собере Ципья шоръёзо школаын тодон-валан люкан (1978-тӥ арын йылпумъяз), военкомат лэземен 1979-тӥ арын шофёръёслэсь курсъёссэ ортчон, собере армиын служить карон.

– Армиын но мон шофёр луыса служить кари, службае Германиын ортчиз, – шуэ Александр Германович.

Кык ар служить каремез бере, 1981-тӥ арын, со вордскем «Труд» колхозаз берытскиз, отын ик солэн ужан биографиез кутскиз.

– Шонергес верано ке, мон колхозын 1979-тӥ арысен ик кутски ни ужаны, школаез быдтэм бере ик пыриськем вал, армиын луыку гинэ куспетӥ кароно луиз ужме, – валэктэ воргорон.

Нырысь кык ар пала Александр Чернов ужаз ГАЗ-52 бортовой машинаен, 1983-тӥ арысен ини бензовозэ выжиз. Со дырысен солэн улонэз люконтэм герӟаськем та секыт транспортэн. 42 ар бензовозлэсь баранказэ бергатӥз: нырысь ГАЗ-53 машинаен куать ар, собере выль ЗИЛ сётӥзы, соин пенсие потытозяз тырше. Со дыре ик кема аръёс ӵоже водительлэсь ужзэ колхоз заправкаын ужанэн огазеяз. 40 арлэсь кема одӥг интыын ужаса акыльтымтэ-а шуыса юанлы со пельпумъёссэ гинэ ӝутъя: «Чидаськем ни».

2021-тӥ арын, 60 ар тырмонэзлы, Александр Германовичлы «Татарстан Республикаысь сиё-дано водитель» ушъямон ним сётӥзы. Та солэсь хозяйствоез азинтонэ бадӟым ватсэтсэ лыдэ басьтон луэ. 61 аресэн со дано шутэтсконэ потӥз, но зэмос шофёр дораз пукоз шат? Али со нош ик руль сьӧрын. Табере со «Газель» машинаен ужа, нуназе но ӝытсэ бусые сиён нуллэ, нош арняяз одӥг пол графикъя Сырья гуртысь скал кыскисьёсты Вукогурт фермае вуттэ.

Александр Германович профессиезлы оскымон кылиз. Туннэ со огъя 47 аръем стажен водитель луэ. Ортчемзэ но туалазэ ӵошатыса, адӟем карымон шофёр ӟеч пала воштӥськонъёсты пусъе:

– Азьвыл машинаез паяльной лампаен шунтоно, мунчоын ву пӧсятоно вал. Нош али машинаосты шуныт гараже пырто. Али запчастьёс но вань, сервис но, ужан условиос но каньылгес луизы.

Александр Германовичлэн семья улонэз но адӟем карымон. Лариса кузпалыныз соос кык нылпиосты быдэ вуттӥзы. Людмила нылзы

«Труд» обществоын бухгалтер луыса ужа, бускель Ципья гуртэ быземын, кык пиез вань. Михаил пизы но семьяен ини, соос Казаньын уло. Дано шутэтскон шоры учкытэк, Александр Чернов ялан тырше, зэмос шофёр понна арлыд – документысь лыдпус гинэ.

Фёдор Хатамович Пашкеев: ужлы оскымон луон

Александр Германович кадь аксакалъёсын артэ «Труд» колхозын водительёслэн мукет поколенизы но ужа. Соос пӧлы Фёдор Хатамович Пашкеевез но пыртыны луоно. Вордӥськиз со 1978-тӥ арын Вукогуртын. Ципья шоръёзо школаын дышетскемез бере военкомат сое Урняке шофёрлы дышетскыны келяз. Со дырысен ик кутскиз солэн «Труд» колхозын ужан сюресэз, кытын со туннэ нуналозь тырше. 1996-тӥ арысен, 30 арлэсь кема ини, Фёдор Хатамович руль сьӧрын.

– Мон котьку ГАЗ-53 машинаен ужай, али со мынам куинетӥез сыӵе машина ни, – вера со. – Тросгес амбар котырын ужало таӵе машинаос. Мон но амбарын ужасько, фермаосы фураж нуллӥсько, ю нуллӥсько. Октон-калтон дыръя вазь ӵукна ик ужаны кутскиськом, уй сменае но потӥськом, бер уйинозь тыршиськом. Азьвыл Казане пудо-животлы ватсэтъёс басьтыны ветлылӥмы, запчастьёс нуллӥмы. Табере ваньзэ асьсэос вайыса сёто ни.

– Азьло дырысен ужасьёс тыршо ни, нош егитъёслэн колхозын ужамзы туж уг поты, ужаны пыризы ке но, опыт люкан понна гинэ, собере кошко, — малпанъёссэ вера Фёдор Хатамович.

– Кызьы тӥ та профессие вуиды? – юасько.

– Озьы пӧрмиз: военкомат монэ водительлы дышетскыны лэзиз. Мон право басьтӥ. Собере кӧня ке дыр ӵоже колхозын разнорабочий луыса ужай но машина сётӥзы, — тодаз вае со. Озьыен, та учырын улон ваньзэ ачиз радъям.

– Кыӵе луыны кулэ водитель луыса ужан понна? – тунсыкъяськисько.

– Водительын ужан понна кудӟытӥсь юонъёсын эшъяськыны уг яра. Кылсярысь, милемыз та ласянь нуналлы быдэ эскеро, – вакчияк пусъе со.

Фёдор Хатамовичлэн кык нылъёсыз. Огез быземын ни, пиез вань, мукетыз Казаньын медсестралы дышетске. Кузпалыз Элиана Ципьяысь «Наз» ёзэтын медсестра луыса ужа.

Ӟечкыласа

Та праздник нуналэ Александр Германович но Фёдор Хатамович вань ужъюлтошъёссэс удыс праздникенызы ӟечкылало, нош Фёдор вылаз ик эшсэ – «Труд» обществоын КамАЗ машинаен ужась Владислав Юрьевич Троцианскиез ӟечкыла. Солы та нуналъёсы 50 арес тырме вылэм.

Праздникен, руль сьӧрын ветлӥсьёс! Гурт удысысь шофёръёс – со нимысьтыз группа. Соослэн пельпум вылазы – грузъёсты дыраз вуттон, фермаослэн но бусыослэн дугдылытэк ужамзы понна кылкутон.