Сайкатскыны дыр вуиз (фото).

Та суммаез котькуд хозяйство ачиз шедьтэ, ачиз ӝутэ, палэнысен юрттэтлы оскон ӧвӧл. Ини январь толэзьлэн ортчемезлы учкытэк, ремонтлы кулэ уксёлэн ӝыныез но кутӥськымтэ на.

Хозяйствоысен басьтэм даннойёсъя усыослэн - 79, культиваторъёслэн - 78, кизён машинаослэн - 59, катокъёслэн - 36 процентэз гинэ ремонт каремын. Машинно-тракторной паркъёсын опытэн механизаторъёслэсь кылдытэм 31 ремонтной бригада вань, отын 110 мурт ужа. Гурт хозяйствоя машинаосты ремонт каронэз 1-тӥ апрельлы йылпумъян понна котькыӵе луонлыкъёсты кылдытыны, ужан инструментъёсын но кулэ воштос ёзъёсын дыраз обеспечить карыны кулэ. «Уныш», «Бурнак», «Смаиль», «Маяк» хозяйствоосысь ремонт карисьёслэн быдэстоно ужъёссы шӧдскымон трос али.

Районысь 611 тракторлэсь 360-зэ тулыс бусы ужъёс дырозь тупатъяны кулэ. Нош та уже басьтӥськем одӥг гинэ хозяйство но ӧвӧл али. Тулыс бусые нырысетӥен потӥсь ДТ маркаё тракторъёс трос хозяйствоын паркын лымы улын сӥзьылысен пуктэм интыын сыло. Ремонт кароно таӵе тракторъёслэн лыдзы ӧжыт ӧвӧл ук, ваньмыз 107. Али та сяна ремонт кароно Т-150, МТЗ тракторъёс но вань.

Тулыс бусыын ужано вань техникаез эскерыса, нимаз ик кунгожсьӧр техникалы кулэ детальёс сярысь районысь гурт хозяйствоя управление даннойёс сётон сярысь верамын луэм. Заявкаос сётӥзы ке но, та понна уксё выжтэм хозяйство ӧвӧл на. Одӥг «Яна тормыш» хозяйство гинэ кулэ суммалэсь 30 процентсэ тырем. Хозяйствоослэн кивалтӥсьёссылэн но инженерно-технической ужасьёслэн та юрттэтлэсь пайдаяськыса, ултӥгес дунэн воштос ёзъёс басьтыса кыльыны дыртымтэзы паймымон.

Хозяйствоосысь техникалэсь тулыслы дасьлыксэ интыосы мыныса эскерыса уло. Али кылем арняе гинэ «Алга», «Игенче», «Бурбаш» но Тимирязев нимо хозяйствоосын луимы.

«Алгаын» ини сӥзьылысен 7 муртэн нимысьтыз бригада ужа. Культиваторъёсты, кизён машинаосты ремонт карыса быдтӥллям, усыослэн но 90 процентэз дась. Шуныт интыын ужало, ужан дӥсьёс, кулэ ужан инструментъёс сётӥллям, кышкыттэмлыкъя инструктаж ортчиллям.

«Игенчелэн» Арбашысь машинно-тракторной парказ но ужлэн дугдыса улэмез ӧвӧл. Ми мыныку катокъёсты ремонт карыса быдтӥллям вал ини. Асьсэос эстыса шунтоно мастерское культиваторъёсты пыртӥллям, огдыре ик кизён машинаосты но усыосты тупатъяло. Кык бригада кылдытэмын. Рашит Закиров, Фарит Саляхов, Раиф Нургалиев, Айрат Хафизов, Ильгиз Шакирзянов но мукетъёс куспазы кельшыса, ог-огзэс валаса ужало.

Бурбашын но ремонт карись бригада ужан интыяз вал. Усыосты, культиваторъёсты дасяса быдтӥллям. Хаернас Хакимов, Салим Хуснетдинов, Накип Даминов мастерскойлэн заведующиез Гафур Мифтахов кивалтэм улсын кизён машинаосты, катокъёсты ремонт каронэз 1-тӥ февральлы йылпумъянэз ужпум кариллям.

Тимирязев нимо хозяйстволэн Килиысь машинно-тракторной парказ октон-калтон вакытэ бусыын ужам механизаторъёслэсь ваньзэсыз ик шуымон нош ик пумитамы. Одӥгъёсыз гурт хозяйствоя машинаосты ремонт каро, мукетъёсыз тракторъёссэс сэрттыса тупатъяло. Тӥни, азьмынӥсь комбайнёръёс Ильфат Асхадуллин, Ясави Нугманов, Фаргат Гаязов, ремонт карисьёс Ранис Хабибуллин, Фирдавес Ильясов, Ранис Хайруллин, Фердинант Ильясов, Шамиль Закиров...

ваньзы ик тулыс бусые потоно техникаез дасянэн выро. Тани тазьы ужаны ӝутскем мылкыд котькуд хозяйствоын но мед луысал. Ремонт каронын вань хозяйствоослы но тупась одӥг тырмымтэ вань: ремонт карем техникаез акт гожтыса кутӥсь ӧвӧл. Ремонт карисьёс техникаез тупатъямзы бере, мастерскойысь поттыса нимысьтыз площадкае султыто но уж соин быре. Ремонт карем техника кулэезъя эскериськыса, акт гожтӥськыса, валтӥсь агроном но инженер пыриськем комиссиен кутӥськыны кулэ.