Секыт но дано ужын

- Яра али та нунал вань. Сотэк милемлы шутэтскон-праздникъёс туж шер йӧто. Сабантуй выллем массовой праздникъёслэн одӥгаз но семьяосынызы потыса каньылэн шутэтскыны уг быгато. Ялан уж соослы. Мукетъёслэсь каньыл, кышкыттэм шутэтсконзэс утё шуыса, вера районысь внутренней ужъёсъя отделлэн кивалтӥсез Равиль Асхатдинович Тазетдинов.

- Озьы ке но, полицейскойёслэсь ужзэс туж капчи шуыса лыдъясьёс но трос, - шуыса вера Равиль Асхатдинович. - Асьсэлэн улоназы кыӵе ке но шуг-секыт кылдыку, соку ик ми доры лыкто. Куспазы огъя кыл шедьтыны быгатымтэ кык бускельёслэсь кусыпсэс тупатон но полицейскойёс вылэ кыле. Ыштэм, лушкам арбериосты, жугыса кельтӥсьёсты, лушкаськисьёсты утчаны косӥсьёс сярысь вераса но уг улӥськы ини. Асьсэлы юрттэм бере гинэ полицейскойёслэсь ужзэс валасьёс, соосты гажасьёс трос луо. Милям ужмы часэн уг лыдъяськы. Авария, тылпу яке мукет шудтэм учыр луиз ке но, суткалэн кыӵе дырезлы учкытэк, ми дыраз лыктыса вуиськомы. Школаосын, культура юртъёсын ортчытӥськись ужрадъёс но полицейскойёслэн саклык висъян улсазы. Туала улонын контролез туж кужмоятыны кулэ. Террорлы, экстремизмлы, наркоманилы пумит ужрадъёс сярысь одӥг гинэ люкаськонын, совещаниын, заседаниын но вераськытэк кылеммы ӧвӧл. Куд-ог люкаськонъёсы лыктэм ветеранъёсмы паймо. Ми вакытэ кунгожсьӧр киноосын гинэ пумиськем терминъёс табере татын но огшоры макелы пӧрмемын вылэм шуо. Али нош коррупция но вань ук. Вань кивалтӥсьёс но коррупционеръёс, кутэ но пытсалэ асьсэсыз шуыса малпась калыкен солы пумит нюръяськыса утьы тон. Ужез понна чыры-пыры кузьым басьтэм ӵош ужась эшсэ чагыны дась луиз ке но, бадӟым суммаосын ужасьёсты одӥгез но уг адӟы, адӟиз ке но, уг вазьы. Калыклэн юрттэмез сяна, полицейской ачиз гинэ коррупция удысысь зэмлыкез нокызьы но шараяса быдтыны уг быгаты. Татын аслаз верамезлы оскем, кышкасьтэм адӟисьёс кулэ.

- Ми дорын ялан дышетсконъёс луыло. Офицеръёсмы Казаньын курсъёсын тодон-валанзэс будэтыса берто, аттестациос ортчытӥсько. Со яке та закон кужыме пырем нуналысен ик отделын сое дышетсконъя но быдэсъянъя уж кутске. Тужгес но законъёсты калыклы валэктонъя трос ужрадъёс ортчытӥсько. Та ужын полицейскойёс интыын ортчытӥськем пӧртэм ужрадъёслэсь пайдаясько, отчы пыриськыса, калыкен вераськонъёс ортчытъяло.

- Асьме районысь полицейскойёслэсь асьсэ удысысьтызы пӧртэм спортъя ӵошатсконъёсы, туж мылысь-кыдысь пыриськемзэс, бадӟымесь вормонъёсы вутскемзэс тодӥсько.

- Туэ но республикаысь районъёс пӧлын сётӥськеммы ӧвӧл. Ар ӵоже милям отделлэн командаез таӵе ӵошатсконъёсысь ялан призо интыос басьтыса бертэ. Ужлэн йылпумъянъёсызъя но Балтасьлэсь данзэ ум саптаське. Укмыс толэзьлы йылпумъянъёсъя республикаысь Внутренней ужъёсъя министерстволэсь таукаронзэ басьтӥмы. Профессиональной праздникенымы валче вань коллегаослы бадӟым тау каремме вуттӥсько, соосты но ми дорын ужаса потэм вань ветеранъёсты праздникен ӟечкыласько, секыт но ответственной ужазы азинсконъёс, шудбуро, каньыл улон мылкыд карисько.