Серафима Михеева: «Улонэз но чеберлыко литератураез яратэмен кема улӥсько, дыр»

Дышетӥсь — со данлыко ӧнер. Та нимлы тупамон луон — со бадӟым подвиг, шуыны луэ. Юн мылкыдо, чидась адями гинэ та ужлы сюлэмзэ сётыса, кулэезъя усто дышетыны быгатэ, дыр. Та понна дышетӥсь луыса вордӥськыны, гумыред ӵоже дышетӥсь луыса улыны кулэ. Сыӵе дышетӥсез аръёс ортчыса но тодэ вайиськом, весяк улонамы солы тау кариськом. 

Ципья гуртын улӥсь Серафима Михайловна Михеева ӵапак бадӟым букваен гожтымон. Дасо аръёс ортчыса но аслаз дышетскисьёсыз понна адӟем карымон луэ, Дышетӥсьлэсь нимзэ данэн нуллэ но аслэсьтыз 100 аресъем юбилейзэ мур гажамон адями луыса пумита. Гуртын ортчем коллективизацилэсь, бератаз Быдӟым Атыкай ож аръёслэсь секытъёссэ ас пельпумъёсаз ныпъям, со вакытъёслэсь вань шугадӟонъёссэс ас вылаз чидам кышномурт али но историысь та событиосты сюлэмыз пыр поттэ, аслэсьтыз пичи но егит дыръёссэ мӧзмыса тодаз вае.

Серафима Михайловна Марий-Элысь Ведерники (Ступята) гуртын 1924 арын 30 южтолэзе крестьян семьяын. Ложкинъёслэн со кыкетӥ нылпизы луэ. Анай-атаез ужез яратӥсь, куно карись, лякыт сямо но мур оскись адямиос луиллям. Бен, кыӵе гинэ секыт аръёс медаз луэ, нылпи дыр котькинлы дуно, отын эшъёс но, дунне но аспӧртэмлыко буёлъёсын адӟиське. Но Серафималэн та шудо дырез туж вакчи луэ, 1929 арын семьяезлэн улонэз чутрак воштӥське: семьялэн пыкетэз луись атайзы дырызлэсь вазь югыт дуннеен люкиське. Анайзылы куинь нылпиен сютэм аръёслэн эскеронъёсыз пыр ортчоно луэ. 

1932 арын Серафима покчиёзо школае дышетскыны пыре. 1936 арын дышетсконзэ Мари-Турек ёросысь Карлыган гуртын интыяськем школаын азинтэ. Школа но вордскем гуртэз куспын 12 иськем, секытэн ке но, дышетскисьёсты татын шуныт сиёнэн сюдо, интернатын улыны луонлык кылдыто. Нылаш пичи дырысеныз ик нодлыко, чырткем но тыршись луэменыз висъяське, соин сое шуг-секытъёс уг кышкато, котькуд ужын со валтӥсь луэ. Сюлмо луэмез но тодон-валан басьтонлы кыстӥськемез сое дышетӥсь луон малпанэн герӟало. 1939 арын, школаез йылпумъяса, Серафима 60 иськемын интыяськем педагогикая Арча училищее дышетскыны пыре. Одӥг комнатаын 25 кузя нылъёс улыса, тодон-валан басьто соку студентъёс. Дорысьтыз юрттэт витёно уг луы, но стипендия нылаш басьтэ, солы луыса нуналлы куинь пол пӧсь сиён сие.

Быдӟым Атыкай ожлэн курыт тӧлъёсыз Арча палъёсы но вуо. Пленэ басьтэм немецъёсты вайыны кутскем бере, соосты училищелэн юртаз интыяло. Нош вуоно дышетӥсьёсты дасясь дышетон юртэз Арчалэсь 20 иськемын палэнэ интыяськем «Урняк» совхозысь Лесхозлэн юртаз интыяло. Студентъёслэн тыршеменызы та выжонлэн секытъёсыз шӧдскымон ӧз луэ: совхозлэсь вал гидзэ сиськон инты каризы, мукет юртъёссэ но дышетскон-дышетон понна радъязы. Ваньмон дыръязы студентъёс матысь гуртъёсы концертъёсын потазы, гужем толэзьёсы колхоз ужъёсы мыло-кыдо пыриськизы.

1942 арын диплом басьтэм дышетӥсез Ципья ёросэ пырись Арбор гуртэ ужаны ысто. Арбор гуртысь калык, анай-атайёс егит дышетӥсез туж шуныт пумитало. Кузпалэз фронтын луись кык нылпиен Галия апай егит дышетӥсез ас бурд улаз басьтэ. Ог-огзылы пыкет луыса улыны кутско, юрт ужъёсты тыршыса лэсьтӥсь Серафима вакчи дыр куспын семьялэн матысь адямиез луэ. 

Арбор школалэн коллективез ӟуч кылъя дышетӥсез усьтэм сюлмын ик пумита. Коллективысь эшлыко кусыпъёс школаысь кезьытэз но, кӧня ке дырлы бырем пу сярысь но вунэтыто. Дышетскисьёс но тодон-валанъёсты ӝуась синъёсын возьмало, зэмос ӟуч апаен ӟучен вераськы али тон... Соос Серафима апайлэсь ӟуч кыллы дышетско ке, дышетӥсь соослэсь — бигерен вераськыны. Гужем толэзьёсы нылпиос понна лагерь усьто, дышетӥсьёс валче кариськыса колхоз ужъёсы пырисько, амбарын ю тысь куасьто, картофка октонын тыршо, школалы тол потыны пу дасяло. Бадӟымез но пичиез огазеяськыса, нуналэз уен герӟаса, вормонэз матэктон понна тыршо, ӝоггес мед быроз ни ожмаськон шуыса мылкыдъёсын уло. 

Ож аръёсы лэсьтэм ӟеч ужъёсыз понна Серафима Михайловна «За доблестный труд в Великой Отечественной войне 1941-1945 г. г.» медален пусйиське, али ке но ветеран сое кадырласа возе. 

Ож йылпумъяськем бере Арбор школае фронтовик Василий Степанович Михеев вуэ. Кык егит сюлэмъёс куспын яратонлэн тылгизьыез ӝуатске, ӝоген соос семья кылдыто. Со дырысен кык егит дышетӥсьёс, асьсэлэсь дышетон ужпумзэс быдэстыса, улон кузя ваче ки кутӥськыса вамышъяны кутско. Дышетӥсьёсты школаысен школае выжто. Нырысь Михеевъёслэн семьязы Тюнтер гуртысь школаын ужа. 

— Арборысь кошконэз туж секытэн чидамы, — тодаз вае Серафима Михайловна. — Нырысь ик, гурт калыкен огкылысь ужамы, нылпиос но кылзӥськисесь вал, вордскем гуртамы но, шер ке но, бертыны луонлык кылдылӥз.

Выль школалы но ӝог дышизы. Серафима Михайловна ӟуч кылъя но литературая тодон-валан сётэ, нош Василий Степанович — ожгар ужъя, берлогес труд урокъя. Дасо аръёс пала дышетэмзы бере Тюнтер школа реорганизация улсы шеде но покчиёзо школа гинэ луыса кыле. Собере дышетӥсьёслэсь семьязэс Ципья черкогуртысь школае выжто, кытын соос кыкназы но дано шутэтсконэ потытозязы тыршыса ужало. Кыкназылы огъя 77 ар дышетон стажзы луыса дано шутэтсконэ потэм дышетӥсьёсты «Ветеран труда» медален но трос пӧртэм данъян грамотаосын пусъё, коллективын, дышетскисьёс пӧлын туж гажамон луо. 2002 арын Серафима Михайловналы Быдӟым Атыкай ожысь ветеранлэсь удостоверенизэ сёто. 

Аръёс ортчыса но, школаен, дышетӥсьёсын, дышетскисьёсын герӟет уг ышы, соос котьку кусып возё, егит дышетӥсьёслы тодон-валанъёссэс, кенешъёссэс сёто. Дышетӥсьёслэн семьяязы будэм Александр, Алевтина но Валентин нылпиоссы анай-атайзылэсь ӧнерзэ быръё, шоретӥ пизылы, Геннадийлы, инженерлэн ужез сюлэмъяз луэ. Жаляса верано, Быдӟым Атыкай ожысь ветеран — Михеев Василий Степанович — 1994 арын 68 аресэн улонысь кошке. 48 ар ӵошен улэм семьялэн бурдэз чиге кадь. Серафима Михайловналы улон эскеронъёсты ортчыса, быдӟым пизэ Александрез, покчи пизэ Валентинэз но эмеспизэ Равилез ыштон пыр потоно луэ. 

Алевтина нылэзлэн но Геннадий пиезлэн тодэ ваёнъёссыя, анай-атайзылэн туж узыр лыдӟиськоннизы луэм. Озьы ик соос туж яратӥллям доразы пӧртэм лыдӟиськон ӝытъёс радъяны, калык но ожгар кырӟанъёсты быдэсъяны. Йыртӥян шудонъёсын но шудылӥллям: шашки, домино, лото, шахмат. Юрт котырысь ужъёссы но куспазы люкемын, пе, вал: огазе ужаллям но шутэтскиллям.

— Яра али вӧзам Алевтина нылы, яратоно Рамиль внуке вань, Геннадий пие Римма кенэным бертыло, мукет внукъёсы но уг вунэто, 8 внуке, 12 правнуке, одӥг праправнуке вань мынам, — шумпотыса вера ветеран. — Трос улӥ, табере тани синмы но уг адӟы ни, но улонэз, чеберлыко литератураез яратӥ, соин улон гумыре кузь луиз, дыр, малпасько, — шуэ гажано дышетӥсь Серафима Михайловна.