Шудбурен жингыртэ улонэз

Куке но малпам меда Люба апай улон но ужан сюресэз Вукогуртэн герӟаськоз шуыса. Тани 42 ар ортчем ини Вукогуртысь Павел Трофимович Фёдоровен семья кылдытыса ӵош улыны кутскемзы дырысен. Ӵапак соку ик, 1974-тӥ арын, Люба апай ужан сюрессэ но мытэ, Вукогуртысь фермаын скал кыскись луыса ужаны кутске. Та ужезлы со 2008-тӥ арозь, дано шутэтсконэ потытозяз, оскымон кыле. Дано шутэтсконэ потон куд-ог адямиос понна бадӟым эскерон луэ шуысал. Угось огдышем ужысь кошкон, эшъёсыдлэсь люкиськон котькин понна капчиен уг сётскы. Куд-огез ассэ обществолы кулэтэм адямиен но лыдъяны кутске. Но Люба апай сярысь озьы ӧй верасал. Со али ке но гуртлэн общественной но культурной улоназ мылысь-кыдысь пыриське.

- Завклубмы концерт дасяны ӧтиз ке, одно мынӥсько,- шуэ Люба апай. Озьыен, гурт концертъёс сотэк уг ортчо. Зэм но, Люба апай сярысь, кырӟаны но эктыны усто шуыса, кылэме вань ик. Нош тани кылбур лыдӟонъя но усточи шуыса уг тодӥськы вал. Утёд ке, со ветеранъёслэн «Канатлар куйдын сэхнэ» шуыса нимаськись район конкурсазы чеберлыко лыдӟонъя лауреат но луэм ини. Тросгес мед луозы вылэм гуртъёсамы Люба апай кадь мылкыдзэ но дырзэ жалятэк пӧртэм тунсыко ужрадъёсы пыриськисьёсмы.

Со сяна, Любовь Ивановна пӧртэм калык шулдыръяськонъёсты радъяны-ортчытыны кичӧлтон сётӥсь но луэ. Кӧня ке ар талэсь азьло Вукогурт, Турья но Сизнер гуртъёс шулдыръяськыса ог-огзы доры куное ветлон вашкала удмурт сям-йылолэз - «Бадӟым юонэз» - улӟытӥллям вал. Отын но Люба апайлэн люкетэз бадӟым луиз. Но, жаляса верано, малы ке но, та сям азинскон ӧз басьты.
Туала егитъёс удмурт калык дӥсен уг тунсыкъясько, солэн кулэлыкез, дунъетэз сярысь но туж ик уг малпасько, дыр. Люба апай егитъёслы удмурт калык дӥсь сярысь но трос вераны быгатоз, сое дӥсян радлыкен но тодматоз.

Анай муртлэн самой бадӟым, дуно ваньбурез - нылпиос. Та ласянь Любовь Ивановна ассэ туж узыр кышномуртэн лыдъяны быгатэ. Солэн нылпиосыз куать кузя: куинь пи но куинь ныл. Соин валче Люба апаез «Анайлык медален» но пусъё.

Нылпиосыз ваньзы но быдэ вуэмын, улонын асьсэ интызэс шедьтӥллям. Лена но Римма нылъёсыз асьсэ гуртазы ик карт дорын, кыкназы ик быдэн 3 нылпи будэто. Анайзы кадь ик фермаын скал кыскись луыса ужало. Ирина нылыз но гурт удысэз матын карем. Турья гуртэ картлы кошкыса, «Бурнак» обществоын зоотехник луыса тырше. Кузпалэныз озьы ик куинь нылпи будэто. Нялтас вераса, пусъем потэ, та семьялэн примерез вылын Вукогурт но Турья гуртъёслэн выжы нюжазы юнма шуыса. Люба апай ачиз Турьяысь, Ирина нылыз но Турья гуртэз матын карем, эшшо ке Алина кензы но, «Труд» колхозын тракторист луыса ужась Лёня пиезлэн кузпалэз, Турьяысь вылэм ук!

Кык пиосыз - Александр но Николай - кузпалъяськемын ӧвӧл на. Сашаез Коми улосын лэсьтӥськон удысын тракторист луыса тырше, нош Коля пиез Казаньысь одӥгаз школаын физкультурая дышетэ, туж чебер кырӟа. Ма, бен, мукет пиналъёсызлы но анайзылэн кырӟаны-эктыны быгатонлыкез выжем шуыны кулэ. Нылъёсыз но концертъёсы мылысь-кыдысь пырисько.
- Туннэ нуналэ асьтэсыз шудоен лыдъяны быгатӥськоды-а?- юасько Люба апайлэсь.

- Бен, мон шудо,- юн оскыса вера выль тодмое.- Матысьёсы ваньзы сӧл-таза. Ёрмыса ум улӥське. Улон сьӧры уйиськыны тыршиськом. Нылпиос ужало. Со ӧвӧл шат шуд?!»
Зэм но, улонлэсь кадырзэ валась муртлэн шуд сярысь малпанэз ӵапак сыӵе луыны кулэ, дыр: огшоры но котькудмылы валамон.

«Анайлык медален» данъям оскымон кузпал, яратоно анай, муспотон ӵужанай но песянай, ТР-ысь гурт хозяйство удысысь сӥё-дано ужась, Данъян книгае пыртэм, Ушъян грамотаосын пусъем ужысь ветеран - та ваньмыз но одӥг адями - Вукогуртын улӥсь Любовь Ивановна Фёдорова сярысь.