Шудо-буро мед ӧръяськоз улонмы

Со луэ Акашка бере 50-тӥ нуналаз. Соин Семыкез шуо на «Пятидесятница» но. Та празднике данъяло Святой Духлэсь апостолъёс вадьсы васькемзэ, кызьы Инмар вераз вал инме ӝутскыкуз ик. Святой Дух возьматӥз Инмарлэсь триединствозэ: «Бог Отец творит мир,

Бог Сын искупает людей от рабства дьяволу, Бог Дух Святой освящает мир через устроение Церкви».

Семык азьын, субботае, черкъёсын ортчо бадӟым заупокойной богослужениос. Кулэмъёслэсь нимъёссэс гожтыса, запискаос сётоно, та нуналэ соосты лыдӟозы алтарьын.

Асьме палан Семык арнялэн субботаяз дасяло кулэмъёсты буре ваён сиён: табань, курегпуз, пӧртэм пыжиськемъёс. Кулэм ӵыжы-выжыоссэс (та нуналэ тужгес но зол) вӧсяськыса буре вайыны ветло шайвылэ. Соослэсь благословение куро, улон-вылон, юрт котыр ужъёс умой мед мынозы, ю-нянь мед удалтоз, пудо-живот таза мед луоз шуыса. Молитваос лыдӟо.

(Нялтас вераса: шайвылэ нуэм сиёнъёсты ӝӧк вылэ вӧлдоно, гу вылэ тырыны уг яра. Кулэмъёсты буре вайыса, пичияк сиён веръяно, трос сиськоно ӧвӧл, кулэмъёслы кулэ ӧвӧл со. Соос вӧсяськеммес возьмало. Ӝуатоно сюсьтыл. Пичи пиналъёстылы азьвыл ик вералэ, асьсэды зӥбыт мед возёзы шуыса, медаз алякъяське. Шайвылын гольтыръяськыны-серекъяны, кудӟем йырын ветлыны, тамак кыскыны, шуш кылъёсын вераськыны, даллашыны, ӵаш поттыны уг яра, озьы ӵыжы-выжыосмылэн лулъёссы буйганы уз быгатэ. Эн ветлэ кулэм муртлэн шайгу вылтӥз, отчы жуг-жаг эн куялэ).

Семык нуналэ сяськаосын но кызьпу вайёсын чеберъям православной храмъёсын туж сӥё-дано но чебер служба ортчытӥське.

Воскресение калык шулдыръяське, ӟечыраны пото, кызьпу вайёсты лентаосын пуныса чеберъяло. Семык нуналэ, коркаез, азбарез, урамез но кызьпу вайёсын, сяськаосын чеберъяса, калык Инмарлы тау каремзэ возьматэ крещение пыр выль улон сётэмезлы. Вож ненег писпу куаръёс но сяськаос возьмато выль улонэз. Та нуналозь уг яра шурын пыласькыны, веник дасяны, турын турнаны. Озьы тӥни паймымон герӟаськемын православие но язычество.

Инмарлы, Пиезлы но Святой Духлы оскыса мед уломы. Котькуд корка та праздник мед пыртоз чебер сяська, ческыт вож турын-куар зынъёс. Кызьпу котырын ортчись шулдыр хоровод сямен шудо-буро мед ӧръяськоз улонмы.

Вера Лобанова
(«Азьлане», 4 инвожо, 2014 ар, №40)