Соослэсь адӟем карымон

Байманов Николай пичиысеныз ик ужез адӟыса, улыны тыршыса будэ. Малы ке шуоно атаез югыт дуннеен люкиськыку солы 1 арес гинэ луэ. Анаезлы, апайёсызлы котьку но пыкет луыны, котьмаин юрттыны тырше.
Школез йылпумъяса, армилэн радъёсаз служить каре. Отысь бертыса, улонзэ шулдыргес карыса, Елена нимо нылэн кузпалъяське. Соос адӟем карымон семья кылдыто. Семьязэс юнматыса, огез бӧрсьы огез куинь пиналзы вордско.
Николай но Елена кыкназы ик «Смаиль» обществоын ужало. Николай - азьмынӥсь механизтор, нош Елена адӟем карымон скал кыскись. Николай 1998-тӥ арысен ДТ тракторен тыршыса ужа. Тыршемзэ синйылтыса, солы кужмо, выль техника оско - К-744 трактор. Озьы, туннэ нуналэ со табере ДТ трактореныз но ужаны вутске, К-744 трактореныз но. Со сярысь котькин ялан ушъяса гинэ вера. «Ас ужезлы сётскем, сое яратыса, пумаз-йылаз вуттыса быдэсъясь мурт со», - шуо. Ужась муртъёсты обществолэн кивалтӥсез но адӟыны быгатэ. Соин ик 2012 арын колхоз Николайлы Бакировоысь санаторие мынон понна путёвка сётэ. Отын со шутэтске, кужым люка… выльысь уж борды басьтӥське.
Кузпалэз но котьку картэзлы дурбасьтыса улэ, кулэ вылэм, кенешсэ но сётэ. Лякыт, каньыл сямо Елена ачиз но ини та обществоын 14 ар ӵоже скал кыске. Азьло вуж фермаын ужано луэ, собере солы но районын тужгес тодмо луэм выль мегафермае выжыны шуд усе. Та фермаын ужаны капчи луоз ини табере шуыса малпан шонер уг луы. «Скалъёс вылын табере, аппаратъёсты киын тыриськомы, одӥг скал бӧрсьы мукетыз вуытозь ки воксё но жадьыса быдме вал, но табере дышимы ини, капчигес потэ, ваньмыз автоматэн радъямын, йӧл нуллоно ӧвӧл», - шуэ Елена. Зэм, ужзы сокем ик секыт ӧвӧл кадь ни… Но али доразы бертыса но гид тыр пудоосты сюдоно-люктано, вазь ӵукна ик султыса, дорысь скалзэ кыскыса, фермаысьсэ кыскыны кошконо. Табере эшшо раздойной группа радъямын, 3 пол кыскон тупатэмын. Озьы ке но, уг ӝотӥсько, ужзэс яратыса быдэсъяло.
Ужаны но, шутэтскыны но устоесь Баймановъёс. Гуртын кин ке но шулдыръяськон ортчытыку, Николай отчы одно ик мызганзэ кутыса мынэ. Кузпалэныз ӵош соос пӧртэм кырӟанъёсты усто быдэсъяло!
Нылпиоссы но «анай-атай» гинэ шуыса уло, юрт котыр ужзэс быдэсъяло. Бадӟым нылзы Йошкар-Ола городын медсестралэн ӧнерезлы дышетске, пизы 10-тӥ классын тодон-валан басьтэ, нош покчиез нылзы - 3-тӥ классын али.
Озьыен, котькуд анай-атай сямен ик, Еленаен Николай но нылпиоссэс умой вордон-будэтон понна вань сюлмысенызы тыршо. Нош тыршись муртъёслэн ужзы котьку дунъямын но данъямын луыны кулэ.