Шуг-секытъёс медаз куасалтэ

Календарьлэсь бамъёссэ берыкъяку, толэзез мукет толэзен воштӥськом, одӥг арня интые мукетыз лыктэ. 365 нунал ӵоже кыӵе гинэ ужъёсты быдэстыны уг луы шуыса малпаськод. Нош улон сокем ӝог ортче, берытскиськод но, тани 10, 20, 30 ар ортчемын. Озьы шӧдытэк ик кылиськод, тыныд 90 ини тырмиз. 

Таӵе дано арлыдэ вуэмъёсты пыд йылазы, сӧл тазаен адӟиськод ке, мылкыд ик бурдъяське. Нош соосын вераськон — нимысьтыз лул шутэтскон вакыт. Вань ке журналистлэн ужезлэн умой палыз — со арлыдоосын вераськон. Соос тыныд азьлозэ но, туннэзэ но, ӵуказезэ но кушаса сётозы, вылаз ик вешалозы но ай.

Ӟаны гуртын арлыдоос трос но, ӧжыт но шуыны уг луы. Котькудӥз калык пӧлын сӥлы карымон, семья пушказы яратымон адямиос. Ас дыразы соос гуртлэсь улонзэ азинтӥзы, будӥсь поколенилы оскымон инъет кылдытӥзы. Сыӵеос пӧлы туннэ статьялэн героиняез но пыре. Гумырыз ӵоже колхозын тыршыса, семьязэ утялтыса возем кышномурт туннэ аслэсьтыз пересьмонзэ матысьёсыз пӧлын ортчытэ.

— Монэ газетэ поттон понна лыктӥды-а ма? — пырыку ик юаз Вера Семёновна. — Куддыр созэ-тазэ вунэтӥсько но ини. Кылем арын тани инсульт шуккиз, али коркан гинэ ветлӥсько, ураме уг потӥськы, вольыт ук. Уси марай ке, утялтыны нош адями кулэ. Дорысьёслы баля луэме уг поты, — азинтӥз веранзэ песянай. 

Таӵе малпанъёсын вань арлыдоос уло. Вань ужъёсазы матысьёссылы юрттыны тыршо. Котькуд адямилэн улонэз кӧня ке вакытъёслы люкиське, пересьмон — со шундыпуксён кадь, сюлмыд чылкыт малпанъёсын гинэ тырме.
Вера апайлэн улонэз капчиен ортчиз шуыны уг луы, солэн улон сюресаз пӧртэмез луиз, ваньзэ ачиз гинэ тодэ, дыр, ини. Со 1935-тӥ арын кыкетӥ нылпи луыса Пор-Кутеш гуртын вордӥське. Семён но Матрёна нылпиоссэс яратыса, гажаса будэтӥзы. Кужымзыя, ваньзэ умойзэ нылпиоссылы сётыны тыршизы. Соин пичи дырзэ но Вера Семёновна шунытэн тодаз вае. 

— Шаб улӥмы. Жугиськон дыръя но шаб улӥмы. Песяймы вань вал ай. Поттурын бичаса ветлэ вал со. Мон солэсь арам поттурынзэ киям бичаса ветлӥ. Собере со бичам поттурынэз салкым интыын куасьтыса, кутэсэн кутса вал, солэсь пызь карылӥз. Соин тӥни нянь пыжиськом вал ини. Скал но ыж вордӥм... 

— Поттурынэн шаб улон луэ-а ма ини со? — вераськонамы итӥськиз Анатолий пиез. 

— Шаб уг луы ини поттурын но.., — серекъяса пумитаз вераз анаез, собере ватсаз:

— Атаймы одӥг ар пала Финляндиысь жугиськонэ пыриськиз. Кема ик ӧз улы, Быдӟым Атыкай ожысь жугиськонэ повестка вуиз. Бӧрдыса кошкиз соку, али гинэ бертӥ, нош ик отчы мынӥсько ук шуыса, туж сюлвориз атай. Ожлудысь ӧз берты ни, 1944 арын Латвиын кулӥз... 

Озьы ке но, со вакытысь арлыдоос котькуд шуг-секытъёсты дано ортчылӥзы. Ужаса, асьсэ кужымзылы гинэ оскыса, калык пӧлын нырысь ик сюлмо адями луыны тыршизы. Соку адямиос но котькуд праздникъёсы, ӝыт пумиськонъёсы огазе люкаськылӥзы, нокинэ ӧз курлалэ, ваньзы огазе шулдыръяськизы, кырӟазы-эктӥзы. Та палась удмуртъёс тужгес Семык возе ветлыны яратылӥзы.

— Туж трос калык люкаське вал. Пӧртэм гуртъёсысь мызганэн васько вал. Котькуд гуртлэн аслаз зоутъёсыз, кырӟанъёсыз луо вал. Люкаськем бере, огазе кырӟаськом, эктӥськом вал. Кушкетъёс шайвылысен лыкто вал. Ӟучарнябер нуналэ но лыктэ вал ай мылкыд карисез. Туж шулдыр луэ вал. Егитъёс но уно вал ай соку. 

— Нош школаын дышетскыны луонлык шедиз-а тӥледлы?

— 7 классозь дышетски. Азьло Вуж Кушкет школае ветлӥм. Отын но ожысен сӧсырмыса бертэмъёс дышетӥзы ини. Школаын кезьыт луэ вал, пыдъёс кынмыса-кынмыса дышетским. Ӟаныын но дышетскыса вуи. 7 классэз йылпумъям бере колхозэ ужаны интыяськи ини. Со дыре Починкаен колхоз огазе вал, уйин отчы но ужаны ветлоно луылӥз. Кышкаса мынӥсько вал. Соку номыр ветлон техника ӧй вал ук. Нимысьтыз бригадиръёс азьвыл ик мынонэз вераллязы. Колхозын кык бригадир но одӥг колхозэн кивалтӥсь вал ини. 

Азьло но туала гурт улонэз ӵошатӥд ке, туала улон трослы капчигес сётӥське. Пӧртэм техникалэн юрттэменыз тросэз ужъёс ки кужымез кулэ уг каро ини. Азьло кышномуртъёс воргоронъёсын огкадь секыт ужез быдэсъязы. Та али соослэн тазалыказы шӧдӥське ини.

— Колхозын кыӵе уж вань, ваньзэ ужано вал. Дас скалэз киын кыскисько вал ай, кыскем йӧлэз бидонэ люкаса, Тюнтерын йӧл-вӧй завод вань вал, отчы нуыса мынӥсько вал. Со бидонъёсты ӝутъяны туж секыт вал ини. Колхоз бере колхоз ини, ваньзэ ужай. Лаиш ёросэ но вуимы. Отын валежникъёсты (пограм писпуосты) сайкимы. Озьы тӥни нуналъёсмы ужаса ик ортчизы...

Статьяез быдэсэн «Азьлане» газетлэн 2025 арын потэм 6-тӥ номерысьтыз лыдӟыны быгатоды.