Шулдыр ӝыт кузьмасьёс

Ӟаны гуртысь «Шулдыр ӝыт» ансамбль сярысь ёросамы тодӥсьтэмез ӧвӧл, дыр. Мазэ веранэз, ансамбльлэн данэз ёросамы гинэ ӧвӧл, солэн палэназ но вӧлмемын: «Шулдыр ӝыт» пӧртэм элькун, ёроскуспо но улоскуспо творческой конкурсъёсы, фестивальёсы котьку туж мыло-кыдо пыриське. Вылаз ик, Ӟаны лулчеберетъя юртысь удмурт фольклоръя ансамбль ёросысьтымы удмурт творческой коллективъёс пӧлысь одӥг гинэ ансамбль луэ, кудӥз дано «народный» нимез нуллэ.

2016-тӥ арысен «Шулдыр ӝыт» ансамблен кивалтэ Иванова Алефтина Васильевна (туспуктэмын паллянысен нырысетӥез), нош солэн валтӥсь но воштонтэм юрттӥсез луэ балетмейстер Михайлова Татьяна Ивановна (паллянысен куинетӥез). Тани дас ар ӵоже ини соос эшъяськыса, ог-огзылы юрттыса ужало, гурт калыклэсь лулчеберет улонзэ тунсыкогес, шулдыргес карыны тыршо.

— Кызьы тӥ лулчеберет удысэ вуиды, — тунсыкъяськисько мон.

Алефтина: — Шонер, 2016-тӥ арысен Таняен ӵош ужаны кутскимы. Шумпотӥсько, эшлыко, тупаса ужаськом шуыса. Ачим мон Ярак-Чурма гуртысь луисько. 2006 арын Покчи Лӧзя школаез йылпумъяса, Казане дышетскыны пыри, «ТИСБИ»-ын менеджерлы дышетски. Сое горд дипломен йылпумъяй. Но со удысын уж ӧй шедьты: Казаньын кебитьын ужай. 2015-тӥ арын Ӟаны клубын балетмейстер луыса ужаны ӵектӥзы, соку Таня декретын вал. Озьы июль толэзьысен ужаны кутски со должностьын. Нош 2016-тӥ арын декабрь толэзе заведующий луыса ужме мытӥ. 2017-тӥ арын Елабуга колледжын «социально-культурная деятельность» специальностья переподготовка ортчи. Тӥни со дырысен ужасько клубын, ялан сямен квалификациме будэтон понна дышетсконъёсты ортчылӥсько.

Татьяна: — «Лулчеберетын асме шедьтӥ» шуыса веран — со чылкак мон сярысь, шуысал. Малы ке шуоно школаез йылпумъям дырысен ини та удысын «пӧзисько» мон. Школаез йылпумъяй 2003-тӥ арын. Со вакытэ Ӟаны лулчеберъя юртэн Кунаева Ольга Николаевна кивалтӥз. Со мыным «Шулдыр ӝыт» удмурт калык ансамбльын балетмейстер луыса ужаны ӵектӥз. Мон соку ик соглаш луи, малы ке шуоно туж яратӥсько вал кырӟаны но эктыны. Али вакытэ но отын ик ужасько. Озьы ик Елабугаысь лулчеберетъя но искусствоосъя училищеын «социально-культурная деятельность и народное художественное творчество» ӧнеръя тодон-валан басьтӥ.

Ачим сярысь вакчияк верано ке, вордски мон Ӟаны гуртын, али но семьяеным отын ик улӥсько. 2005-тӥ арын Ципья черкогуртэ Руслан Эрнстович Михайловлы бызи. Тупаса, ог-огмес гажаса улӥськом, ӵошен яратыса чебер нылмес но муспотон пимес будэтӥськом.

Пусйыны кулэ, Татьяна нылызлы но лулчеберетэз, калык кырӟанъёсты но эктонъёсты яратон, калык сямъёсты но йылолъёсты гажан мылкыд пыӵатыны быгатэм. Нылыз анаезлэн пытьытӥз кошкем: туннэ со Казаньысь лулчеберетъя кун институтын куинетӥ курсын дышетске, «йӧскалык лулчеберетъя центрен, фольклор коллективен кивалтӥсь, педагог» ӧнеръя тодон-валан басьтэ. Тросэз али валазы, луоз, кин сярысь мон верасько — со Дина Михайлова — 2023-тӥ арын Татарстанысь удмуртъёслэн Кукмор ёросын ортчем «Гырон быдтон» праздниказы валтӥсь чебериналэсь нимзэ басьтэм но элькунамы но солэн палэназ тодмо луэм усто нылаш. Кызьы вераз вал интервьюын ачиз Дина, со пичи дырысеныз ини кырӟаны-эктыны яратэм, нош сцена вылэ нырысьсэ вить аресэн потэм, «Валенки» эктонэз быдэстэм. Школаын дышетскыкуз ветлэм ёросысь эктонъя кружоке. Озьы ик крезьгуръя школаын баян специальностья тодон-валан басьтэм но горд дипломен сое йылпумъям. Со сяна, «Инвожо» но «Шулдыр ӝыт» фольклор ансамбльёсын выступать карем.

«Шулдыр ӝыт» калык ансамбль Балтась ёросысь удмурт йылолъёсты утёнэ но улӟытонэ, сое туала улонын вӧлмытонэ, историез, удмуртъёслэн улонзылэсь йӧскалык тодметъёссэ, соослэсь сям-йылолъёссэс пыр-поч валаны луонлык кылдытонэ аслэсьтыз люкетсэ пыртэ. Ансамбльлэн репертуарез ялан паськыта лирической, эктон, шудон, календарной, ритуал кырӟанъёсын. Тужгес бадӟым инты басьто но ансамбльлэн валтӥсь тодметэз сярысь верало «Сюан», «Армие келян», «Акашка шудонъёс» (нылпиослы программа), «Семык возь», «Корка пырон», «Вӧй сиён» но «Аллак корка» удмурт калык йылолъёслы сӥзем постановкаоссы. 

Ансамбльлэн коллективаз туннэ нуналэ 27 адями лыдъяське. Отчы пыро пиналъёс, егитъёс, арлыдоос, пӧртэм ӧнеръёсъя представительёс. Соос ваньзы калык творчествоез яратӥсь, сям-йылолъёсты гажась адямиос. 

Нимысьтыз пусйыса вераны кулэ хормейстер Виталий Фёдоров (туспуктэмын — арганэн сылӥсь воргорон) но концертмейстер Михаил Камаев (пиос пӧлысь паллянысен ньылетӥез) сярысь. 

— Туж мыло кыдо воргоронъёс. Удмурт Лӧзя гуртын улӥсь Виталий Валентинович баянэн, мызганэн шудэ, ачиз удмурт но ӟуч кылын кырӟанъёсты но гожъя, сцена вылын соосты быдэсъя. Сала-Кушкетысь Михаил Викторович но котькуд ласянь ушъямон: чебер кырӟа, эктэ, калык сям-йылолъёсты тодэменыз но гажаменыз висъяське. Вераны кулэ, Камаевъёс клубмылэн, ансамбльлэн ужаз быдэс семьяенызы пырисько шуыса. Нылпиоссы но сцена вылын, Виктор Павлович но ялан юрттэ. Михаиллэн Ирина кузпалэз но Лилия апаез озьы ик выступлениосамы пырисько. Огъя вераса, ансамбленымы туж данъяськисько но, учырен пайдаяськыса, вань коллективелы тау каремме верасько, азинсконъёс но выль вормонъёс сӥзисько, — шуэ Алефтина Иванова.

Туспуктэмъёс: ансамбльлэн архивез