Сырья гуртлэн ортчемысьтыз (пумыз).

Герман оже пыриське, пленэ шеде, Германиын, Австриын луэ, 6 ар ортчыса гинэ дораз бертэ. Герман оже пыриськемъёслэн куинез (нимъёссы тодмо ӧвӧл) Бельгие ватэмын шуыса кылэме вань. Соослэн семьяоссы Бельгие ватэмъёсты Семык дыръя Вуко гурезь бамалэ мыныса нюлэс дурысь возь вылын буре ваиллям. Со дырысен со интыез «Бельгы тэль» шуыны кутскиллям. Берлогес отын мукет палэнын быремъёсты но буре ваиллям. Огдыре отчы быдэс гурт калык ветлоз вал, кулэмъёсты буре ваем сяна, отын шулдыръяськизы но.

Октябрь революция бере граждан ож пуроме. Отчы Сырья гуртысь 4 мурт пыриське. Малмыж котырын ожъёс мыныку пушкаослэн ыбылэм куараоссы Сырья гуртын но умой кылӥськем. Горд армилэн отрядъёсыз Сырья пыр но ортчиллям.

1930-тӥ аръёслэн кутсконаз колхозъёс кылдо. Сырьяын но нырысетӥ колхоз 1930-тӥ арын кылдэ. Нырысь отын 7 гинэ хозяйство луэ, ваньзы соос куанер улӥсьёс луо. Мукет хозяйствоос колхозэ пырыны юн пумитъясько. Малы ке шуид колхозэ пырисьёс колхозлы юртъерзылэсь одӥг люкетсэ (гид, куала, кенос, обинь но мукет), валзэс, ветылзэс, скалзэс яке мукет пудозэс сётыны кулэ вал. Нош куанеръёслэн куалазы но, кеноссы но, валзы но луымтэ, соин ик соос колхозэ пырыны пумит луымтэзы.

Колхозлэсь нырысетӥ вал гидзэ колхозэ пыремъёслэн коргид, куала, кенос коръёссылэсь лэсьто. Сое Керемет нюк сопала, Бечейлэн но Максим Копейлэн бакчаоссы бере гурезь бамалэ лэсьто. Сибире келям Калякаослэн вань юртъерзы колхозлы кылиз. Бадӟым кладовойзэс клуб каризы, излэсь сарайзэс - дуриськон куала, кирпич но пу коркаосазы школа но колхозлэн контораез интыяськизы.

Сырья гуртэз 4 бригадалы люко. Колхозлы 4 кизён машина, 3 валэн аран агрегат («лобогрейка»), 4 итыме 4 кутсаськон машина (соосты 2 вал кыскем приводэн ужатӥзы), итымлы быдэ ю тысь шертон машина (соосты ки кужымен ужатӥзы) басьто.

1940-тӥ арын коркаосы радиорепродукторъёс пыртыны кутско. Репродукторъёс Ципьяысь радиоузел пыр ужазы. Со дыре колхозэн «Алдыр» кушем нимо (Вуж Турьяысь Алдыров луэм, дыр) воргорон кивалтэ. Колхозлы «полуторатонка» машина басьтыны чаклало. Председатель талы пумит луэ, со интые етӥн сэстон но мертчан лэсьтон машинаос басьто. Со агрегатъёсты ужатон понна кужмоесь двигательёс кулэ вал. Нош сыӵе двигательёс колхозын ӧй вал. Соин ик мертчан лэсьтон агрегатэз 4-тӥ бригадалэн итымаз куроен шобыртыса ватыса поно. Етӥн сэстон агрегатэз «Шайтан нюк» дуре интыяны малпало вал. 1941-тӥ арын Быдӟым ож кутскиз, вань кадь воргоронъёсты оже басьтӥзы, азьпаллы тодмоям ужъёс «кысӥзы», етӥн сэстон но мертчан лэсьтон агрегатъёсты кытчы вуиз отчы таркаса быдтӥзы.

Жугиськон кутскемен, вань секыт ужъёс нылкышноос, пересьёс но быдэ вуымтэос вылэ кылизы. 10-11 аресъем пиос нуназе валъёсты возьмазы, бадӟымъёсыз вал кӧлытыны ветлӥзы. 14 арессы тырмем нылъёс но пиос бусы ужъёсы пыриськизы - гыризы, усыязы, сюрлоен аразы, культо керттӥзы. Нош ужамзы понна «кӧс» трудодень гожъязы. Калык сютэм сямен улӥз. Поттурын кидысэз куасьтыса изӥзы, сое кӧня ке пызен сураса нянь пыжизы. Сисьмем картофкалэн крахмалэзлэсь пыжем кӧмеч но ческыт потэ вал. Бусыын будэтэм вань кадь ю-нянез государстволы келязы, пудоослы нокыӵе фураж ӧз кельтылэ. Тодэмея, жугиськон аръёсы колхозысь 40 мында валъёс сютэмен кулӥзы.

Жугиськон кутскон азьын «Труд» колхозын (Сырья гурт) 239 вал луэм, соос чиньыосын гинэ лыдъямон кылем бере, олошо карем ошъёсты вордыны кутскизы, соосты уробое кыткыны, гырыны дышетӥзы. Нюлэскысь коръёсты но соосын кысказы. Со ошъёсын 1952-тӥ арозь ужазы, собере соосты вандӥзы. 1948-тӥ арын колхоз нырысетӥ «полуторатонка» машина басьтӥз, соин Пильып Микаля ужаз. 1952-тӥ арын ГАЗ-51 машина бертӥз.

1949-тӥ арын пичи колхозъёсты огазеян политика кутскиз, пичи гуртъёсты кужмысь одӥг колхозэ огазеязы. Районэн кивалтӥсьёс Сырья, Ципья, Вукогурт, Тагашур, Вуж Ципья, Янгурчи гуртъёсты одӥг колхозэ огазеян пумысен собрание ортчыто. Сырьяос отын таӵе огазеяськонлы пумит луэмзэс верало, соос Кургем, Кускем, Ямбурово гуртъёсын огазе луыны мылкыд каремзэс верало. Малы ке шуид соослэн музъем межаоссы Сырья гуртлы матын луо. Нош собраниын калыклэсь мылкыд каремзэ лыдэ уг басьто, азьвыл ик вераськем кӧня ке коммунистъёслэн огазеяськон понна кизэс ӝутэмзы ваньзэ решать каре. Районэн, сельсоветэн кивалтӥсьёс, калыкез пыр-поч кылзытэк, «единогласно» шуэм решение куто. Озьы Ципьяез, Вуж Ципьяез, Вукогуртэз, Сырьяез, Тагашурез но Янгурчиез одӥг колхозэ огазеяло, солы «Труд» (Сырья) колхозлэсь нимзэ кельто. Колхозлы председателе но Сырьяысь Егор Шапошниковез (Микаля Лёгор) быръё.

Гуртъёсты одӥг колхозэ огазеян пумысен собраниын кужмысь кутытэм решение калыклы ӧз кельшы. Соин валче Ципья шор ёзо школаын дышетскись Роман Гурьянов (Пома Роман) «Комсомольская правда» газетэ гожтэт ыстэ, югдурез валэктэ. Нош отысен гожтэтлэсь пуштроссэ «Красная Татария» газетлэн редакцияз но Татарстанысь Вылӥ Советэ лэзё. Кӧня ке дыр ортчыса, луэм учырез Ципья районэн кивалтӥсьёслы эскерыны косо. Районэн кивалтӥсьёс вылӥ кивалтӥсьёсты пӧям ответэн «кӧяло-вӧяло». Уж соин йылпумъяське.

1955-тӥ арын «Труд» колхоз аслыз электростанция лэсьтэ. Электрогенераторъёсты 3 трактор двигателен ужатӥзы. Озьы Ципья, Сырья, Вуж Ципья, Тагашур, Вукогурт, Янгурчи гуртъёсы, фермаосы, итымъёсы электротыл вуиз. Собере колхоз электроен ужась агрегатъёс басьтӥз: пилорама, куинь ю тысь куасьтон, куинь ю тысь шертон, етӥн кутсан, етӥн сэстон, мертчан лэсьтон машинаос. Кык ар бусыосы етӥн кизизы, сое ишкизы, утялтӥзы, нош солэн пайдаез ӧз луы. Собере та ужлэсь куштӥськизы.

1964-тӥ арын Арборысь «Татарстанлэн 30 арез» колхозэз «Труд» колхозэн огазеяло. Солы кивалтӥсе Салих Хакимовез быръё. Со дыре ини колхозлэн 15 грузовой машинаез, 15 комбайнэз, 23 тракторез луэ. Огазеям колхозлэн гыроно музъемъёсыз 7400 гектарлы вуэ.

1998-2000-тӥ аръёсы колхозысь Сырья парсь вордон ферма (заведующиез Юрий Копаров, кулэмын ини) быдэс республикая тодмо луэ.