Толэз келязы (фото)

Ильнур, 16 март 2016 - 10:49

1375

Кылем арняе Вӧй арня луиз. Та праздникез тодо но ярато тросэз, нош табань сиыны яратӥсьёс тужгес но.

Вӧйлэн берпуметӥ нуналаз табань сиён ортчиз Покчи Лӧзя гуртын но. Культура юрт котырын ӵукна ик, мылкыдэз бурдъяса, крезьгур чузъяськыны кутскиз. Шулдыръяськонэ пыриськизы удмуртъёс но, ӟучъёс но, бигеръёс но. Ог-огенызы нюръяськыса, шудыса, эктыса люкаськем адямиос лымыё но кезьыт толэз келязы. Ортчытӥськизы пӧртэм конкурсъёс, шудонъёс, ваньзы кузьымъёсын пусйиськизы. Лыктэм куноос ческыт табанен пӧсь чай юизы. Бератаз Вӧйлэсь символзэ - куро мунёез - ӝуатыса тулысэз пумитазы. Огъя вераса, праздник пӧрмиз, шулдыр ортчиз.