«Труд» возёс вылӥ урожаеныз ушъяськыны быгатэ (+фото)

 Али гинэ зарни тусо луэм бусыосмы бушазы, бусыосын комбайнъёслэн гужгетэм куараоссы но уг кылӥсько ини, шыпыт, каньыл кылиз… Та шыпыт одӥгез сярысь гинэ вера — бусыосын октон-калтон ужъёс быремын.  Но октон-калтон ужъёслэн берпуметӥ нуналъёсаз «Труд» возёслэн бусыосаз мыныса вуимы. Та возёслэн мынэм ужъёсынызы тӥледыз но тодматӥськомы.

Валтӥсь агроном Ильдар Гилазов, обществолэн люкам урожаеныз тодматыса, вераны кутскиз:

— «Труд» обществоын 2011-тӥ арысен агроном луыса ужасько ини, 12-тӥ сезонзэ. Со аръёс ӵоже рекордной урожай 2020-тӥ арын люканы быгатӥмы. Туэ 50 сюрс центнер урожай люкамы. Та, кылем арен ӵошатыса (23 сюрс центнер урожай гинэ вал), туж умой показатель.

Октон-калтон ужъёс «Трудын» туэ 31-тӥ пӧсьтолэзе кутскизы. Возёсэ выль комбайнъёсты ӧм басьтэ ке но (кылем арын «Акрос 550» комбайн басьтӥллям вал), ужасьёс октон-калтонлы 100 процентлы дась вал.

— Октон-калтон ужъёслы одӥг толэзьлэсь азьвыл дасяськыны кутскимы — комбайнъёсты дасямы. Ньыль комбайнъёсмы вань. Туннэ нуналозь но (вераськонмы «Труд» обществоысь октон-калтон ужъёслэн берпуметӥ нуналаз, 29-тӥ гудырикошконэ луиз — Н. Ж.) ваньзы ужазы но ужало, — азинтэ веранзэ валтӥсь агроном.  

Кылем арен ӵошатыса, «Трудын» но урожай туж умой, ушъяськымон луэм. Озимой чабей (одӥг гектарысь шорлыдын 37,4 центнер), йыды (44,5), валэс чабей (41,0), сезьы (45,1), ӟег (42,1), кӧжы (26,1) люканы быгатӥллям. Ужасьёссылы сётэмын ини 200 тонна ӟег, 200 тонна йыды, 200 тонна чабей.

Ньыль комбайнёръёс гужем ӵоже тыршизы

— Комбайнёръёсмылэн куинез обществоысьтымы ялан ужасьёсмы — Степанов Валерий (юрттӥсез Зубарев Андрей), Овчинников Эдуард (юрттӥсез Дмитриев Михаил), Абрамов Владислав (юрттӥсез Файзрахманов Эмиль). Ньылетӥез, Владислав Ураков (юрттӥсез Конькин Никита) — егит комбайнёрмы. Солы 20 арес. Нырысетӥ арзэ гинэ ужа али со. Юрттӥсез но 18 аресъем пияш гинэ, аслаз выныз. Комбайнёръёсмы ваньзы туж тыршисесь. Техниказы сӧриськыку, асьсэос уйинозь сое тупатъязы, мукет нуналаз ӵукна ик уж борды кутскыны мед луоз шуыса, — вера Ильдар Дамирович.

Тросэз соос пӧлысь азьмынӥсьёслэн радазы луись механизаторъёс но вылэм. Соосын матысенгес тодматскон понна, возёсысь бусые сюрес кутӥмы.

Степанов Валерий Васильевич «Труд» обществоысь самой усто но опытэн (татын со куамын ар ужа ини) механизаторъёслэн одӥгез. «Сибиряк», «Нива», «Дон»… — со пӧртэм комбайнъёсын ужаса утем ини, котькудӥныз вылӥ показательёсы вутскыны быгатэм. Али тани кылем арын выль басьтэм «Акрос 550» комбайнэз солы оскиллям. «Туж умой но вань каньыллыкъёсыз луэм комбайн сётыкузы, шумпотыса ужаськод ини, — шуэ механизатор. — Та ужын кема ужасько бере, асме мукет ужын уг но адӟиськы ини. Техникаез умой валасько. Юрттӥсе Андрей Зубарев тани Сырьяысь егит пияш. Али туэ гинэ ужаны кутскиз. Арлы быдэ выль егитъёс вуо, соосты ужлы дышетӥськомы. Милесьтым ужмес азьланяз азинтыны мед быгатозы шуыса тыршиськомы, — маде механизатор.

Мукетыз комбайнёр но, Овчинников Эдуард Васильевич, кема аръёс ӵоже, 2002-тӥ арысен «Трудын» ужа. Механизаторлэн ужез солы но матын, малы ке шуоно со егит дырысеныз комбайнёрлэн юрттӥсез луыса тыршем. Соин техникалэсь вань секретъёссэ со умой тодэ. Нырысетӥ техникаез «Сибиряк» луэм, собере — самоходной косилка, собере ини «Нива» комбайнэ пуксем.  Али мукет комбайнэн — «Палессеен» — ужа. Юрттӥсез Дмитриев Михаил но опытэн механизатор. 

Комбайнёр Абрамов Владислав Юрьевич «Труд» возёсын ужан сюрессэ слесарьлэн ӧнерысеныз кутскем. Механизатор луыса 20 арлы матэ тырше вылэм ини. Али со «Дон-1500» комбайнэн ужа. Солэн юрттӥсез но ӧвӧл ини — студент Эмиль Файзрахманов дышетскыны кошкем, соин Владислав Юрьевич огназ тырше.

— Милемлы, опытэн механизаторъёслы, егитъёсты дышетыны туж тунсыко, куддыръя дырмы уг тырмы ке но. Но куке соослэсь тыршемзэс адӟиськод, эшшо но мылкыд ӝутске, — шуыса, палэнын сылӥсь кык егит пиос шоры возьматэ Владислав Абрамов.

Со кык пиос луизы комбайнёр Владислав Ураков но солэн юрттӥсез Никита Конькин. Кызь аресъем комбайнёр Владислав Ураков кык ар ӵоже юрттӥсь луыса ужам ке, туэ октон-калтон ужъёсын ачиз комбайнёрлэсь ужзэ быдэсъям ини. Атаезлэсь, комбайнёр Олег Дмитриевич Ураковлэсь, опытсэ уже кутыса, егит пияш ужзэ рос-прос быдэстэ.  Юрттӥсез эшшо но егитгес — Никиталы 18 арес гинэ али. Бусыын пияшъёс СК-5 комбайнэн ужазы. Мукет техникаен но ужаны усто вылэм соос.

— Та егит комбайнёръёсмы агаен вынъёс но луо. Ог-огзылы юртто, кенеш сётыса уло. Владиславлэн атаез но «Трудын» кема аръёс ӵоже ужась механизатормы, пизэ ужезлэн секретъёсызлы дышетӥз. Ачиз Олег Ураков «Амкадорен» но Ҡ-700-эн ужа.  Зэмзэ верано ке, семьяен ужасьёсмы ӧжыт ӧвӧл. Ураковъёс сяна, пусйыны кулэ Овчинников Василиез (КамАЗ-эн ужа) но солэсь пизэ Эдуардэз (комбайнёр). Туж тыршись Леонтьевъёслэн семьязы. Зуфар Леонтьев МТЗ-1221 тракторен но, «Дон-680» кормоуборочной комбайнэн но ужа. Нылыз Розалия столовойын тырше. Нош пиез Ильшат амбарын ужа. Ильшат Леонтьев — универсальной ужась. Со тракторен но ужаны быгатэ, «Амкадор» погрузчикен но, КамАЗ-эн но. Сыӵе адямиос, котькуд ужез быдэстыны быгатӥсь воргоронъёс, трос ӧвӧл. Ильшат сыӵеос пӧлысь, — шуэ агроном.

Ципьяысь амбарын дас кузя адямиос ужало

Ильшат Леонтьевен тодматскон понна Ципьяын интыяськем амбаре вамыштӥмы. Амбарен Виталий Копаров кивалтэ.

— Амбарын 1994 арысен ужасько. 2015 арозь огшоры ужась, машинист вал. Со дырысен амбарен кивалтӥсько. Уж капчи ӧвӧл ке но, тужгес гужем, куке вазь ӵукнаысен бер ӝытозь ужано луэ. Туннэ нуналэ амбарамы 10 адями ужа. Ваньзы кылкутӥсь ужасьёс. Огъя луыса ужаськомы, — шуэ амбарен кивалтӥсь Виталий Копаров. — Но тужгес пусъеме потэ егит ужасьмес Ильшат Леонтьевез. 

Котьма карыны усто воргорон вылэм со Ильшат Леонтьев. Котькыӵе техникаен  но ужаны дась, тупатъяны но быгатэ, котькинлы юрттыны но дась. Ильшат Зуфарович амбарын 2015 арысен шофёр луыса ужа. Валтӥсь ужез Газ-53 машинаен герӟаське. Егит луэмез шоры учкытэк, со трос нылпиё атай но ини – Ильшат кузпалэныз вить нылпиосты будэто.

— Ужмы капчи ӧвӧл ке но, уг ӝожтӥськиськы, кулэезъя быдэстыны тыршисько,  — шуэ трос вераськисьтэм Ильшат Зуфарович. Коллективен но кусыпъёсмы туж умой, ялан юрттыны дась. Туж шумпотӥсько.

«Труд» обществолэн бусыосаз но, амбараз но ужзэс яратӥсь, кулэлыксэ валась ужасьёс тыршо вылэм — сыӵе малпанъёсын дорамы вамыштӥмы. Ас возёссэс, валче ужано адямиоссэс, кивалтӥсьёссэс гажаса тыршись ужасьёссы вань дыръя, возёслэн вуоноез умой луоз шуыса оскисько.

Вазь тулысысен жадёнэз, шутэтсконэз тодытэк, пӧсь куазьлэсь кышкатэк тыршем котькуд ужасьёслы — механизаторъёслы но, амбарын тыршисьёслы но, ӧнерчиослы но — тау кареммес вуттӥськомы. «Труд» обществоысь ужасьёслы но, мукет возёсын тыршисьёслы но басьтэм вылӥ урожаен ӟечен пайдаяськыны мед кылдоз.