Ципьяысь самой узыр песянай

15-тӥ толсуре 90 арес тырмиз Ципья гуртын улӥсь Залкеева Наталия Павловналы. Песянай ёросысь куноосты пальпотыса пумитаз, сётэм кузьымъёссэс — Россиысь Президентлэсь Ӟечкылан открытказэ но ёрос главалэсь таукарон гожтэтсэ — шумпотыса басьтӥз но люкаськемъёсты куно кариз.

— Та юртын огназ пересьмон даурзэ ортчытэ анаймы, — пумитазы милемыз юбилярлэн нылъёсыз. — Юртэз вужмем ке но, огмы доры но улыны мыныны соглаш уг луы. Татын улэмез потэ.

— Мон Ципьяын вордски, Ципьяын будӥ но улӥ, Ципьяын ик куло ини. Та юртын кӧня аръёс ӵоже улӥ ук, сое мон уг кельты, — ответ сётэ нылъёсызлы но куноослы Наталия Павловна.

Песянай зэмзэ но аслэсьтыз пичи но вужмем юртсэ туж матын каре, угось татын солэн туж трос аръёсыз ортчиллям. Та юртэн герӟаськем солэн трос тодэ ваёнъёсыз но.

Наталия Павловна вордскемын 1931-тӥ арын Ципья гуртын огшоры семьяын. Атаез оже бырем. Кызьы тодазы вайизы юбилярлэн нылъёсыз, ӵужатайзылэсь берпуметӥ гожтэт 1943-тӥ арын Сталинградысь вуэм. Озьыен, нылпиос анаенызы улыны кылё.

— Жугиськон дыръя но, собере но ужамтэ ужмы но ӧз кыльы, — вера Наталия Павловна. — Ошъёсын ветлӥмы, скалъёсын ужамы, тӥни озьы тыршимы. Фермае но ужаны выжтӥзы берлогес, отын ужай. Валъёсты но ути. Зэмзэ верано ке, одӥг уж но ӧз кыльы, кудзэ мон ужаса ӧй утьы. Секыт пиосмурт ужъёс ми вылын вал ини. Нюлэскысь но бертыса ум вуиське вал… Монэным ӵош ужаса ветлэм нылъёс кулӥзы ини.

Вуоно кузпалэныз, Семён агаен, Наталия апай 1958-тӥ арын семья кылдытэм. Семён агай но Ципья гуртысь воргорон луэм. Кыкназы ик соос гумырзы ӵоже Ципьяын уло, гуртысь колхозын тыршо. Семён агай (кулэмезлы куамын сизьым ар луэм ини) пӧртэм ужъёсты быдэсъям, нош Наталия апай фермаын тыршем. Комбайнэн но, тракторен но тыршем. Ас дыраз песянай азьмынӥсьёс пӧлын но луэм, гурт поселенилэн депутатэз но луэм. Социалистической но коммунистической ужысь азьмынӥсьлэн гадьпусъёсыз но вань солэн. Тылысь ветеран но луэ Наталия апай.

— Анаймы — зэмзэ но адӟем карымон кышномурт. Гумырыз ӵоже ужаса, секыт улонэз адӟыса улэм адями со. Сое вордскем нуналэныз сюлмысь ӟечкыласькомы, сӥзиськомы юн тазалык. Али кема аръёс ӵоже мед улоз, — шуизы Наталия Павловнаез юбилееныз ӟечкыланы лыктэм Маргарита, Антонина, Ираида нылъёсыз. — Анаймы Ципьяысь самой узыр песяй. Вить нылпиоссэ пыд йылазы султытӥз, туннэ нуналэ туж трос внукъёсызлы но правнукъёсызлы шумпотыса улэ.

Вить нылпиосыз пӧлысь одӥгез, Юрий пиез, кулэмын ини. Та сярысь Наталия апай ачиз мадиз:

— Кузпалэ но кулӥз ини, али кемалась ӧвӧл пие но кулӥз… Кинлы ӝожтӥськом, кыӵе кылъёс вералом? Уг тодӥськы. Улон гинэ умой но каньыл мед луоз. Ож кинлы кулэ? Нокинлы кулэ ӧвӧл со. Мон ведь сое адӟем адями: ма верамме тодӥсько. Сисьмем картофка, турын-куар сиыса улӥмы. Пудо-животъёсын ужамы… Ошен кыӵе секыт вал ужаны. Огез кыске, кыкетӥез сое улля, куинетӥез сюдэ… Туж секыт вал. Ваньзэ тодам уськытэме но уг луы ни, вуныса мынэ ведь. Сыӵе секыт аръёсты туж ик малпам но уг поты… Яра али туннэ улонмы каньыл. Яра али нылъёсы вань, мынам утисьёсы.

Нылъёсыз Наталия апаез умой утё но учко, кадырлало шуыса, куноос но пусйизы. Юртэз, пичи но вуж ке но, чылкыт но утялтэмын. Огназ улэ ке но, песянай номырлы уг ёрмы. Шумпотымон, куке мӧйы муртъёс пересьмон дауразы сыӵе умой уло. Кызьы зэм пусйиз одӥгез куно, Наталия Павловна умой анай луыны быгатэм. Та сярысь солэн нылъёсызлэн анайзэс утемзы, вӧзазы луэмзы вера.