Туэез юбилейной вал

Та ужрадэ, котьку сямен, асьме ёрос но итӥськиз — 11-тӥ оштолэзе Покчи Лӧзя, Ӟаны но Ципья шоръёзо школаосын мылкыд карисьёс, удмурт кылын шонер гожъяськемзэс эскерыса, удмурт диктант гожтӥзы.

Огъя вераса, Балтась ёросын диктант гожтонэ пыриськиз 50 мурт, соос пӧлын вал кызьы дышетскисьёс но дышетӥсьёс, школаын ужасьёс, озьы ик дано шутэтсконын луэм адямиос но. Тужгес арлыдоез вал 64 аресъем Вылын Ушма гуртысь пенсиысь дышетӥсь Екатерина Иванова (нялтас вераса, со та ужрадэ котькуд аре пыриське), нош тужгес егитъёсыз — Ципья школаысь витетӥ классысь дышетскисьёс.

— Туэ ужрад юбилейной луиз, 15-тӥзэ ортчиз. Заявка сётӥмы вал 45 муртлы, нош диктантэз гожтонэ пыриськыны мылкыд каризы 50 мурт. Солы туж шумпотӥсько, — вера Покчи Лӧзя шоръёзо школаысь удмурт кылъя но литературая дышетӥсь, ёросысь удмурт дышетӥсьёслэн методической огазеяськонэнызы кивалтӥсь Наталия Антонова. 

Диктантлэсь текстсэ «Удмурт Кенеш» огазеяськонлэн ёзчиез, журналист, общественной ужась Наталья Михайлова дасяз. Текст пӧртэм калыкъёслэн куспазы эшъяськыса улэмзылы сӥземын. Соин но асьме трос йӧскалыкъем ёросмы понна со туж матын луиз.

— Диктант «Куинь полэс эшъяськон» шуыса нимаськиз. Солэн текстэз асьме ёросысь школаосысь нылпиос понна туж тупась, угось дышетскисьёсмы пӧлын вань бигерез но, удмуртэз но, ӟучез но, порез но, мукет калыкъёс но. Текст туж секыт ӧй вал, удмурт кылын шонер гожъяськонъя правилоосты тодӥсь адямиослы со шугъяськон ӧз кылдыты, дыр. Пуштросэз но туж тунсыко, валтӥсь малпанэз — эшъяськон. Учырен пайдаяськыса, таукылме верасько диктант гожтонэ пыриськемъёслы, шумпотӥсько, анай кылзэс гажась адямиосмы вань шуыса, — вера Наталия Львовна.

Нялтас вераса, тужгес трос пыриськемъёс луизы Покчи Лӧзя школаысь площадкаын: 19 мурт. Ӟаны школаын диктант гожтӥз 16 мурт. Соос пӧлын вал директорлэн визьнодан ужъёсъя кенешчиез Анна Смердова но.

— Удмурт диктант гожтонэ одӥг-ог пыриськисько. Малпасько, та тунсыко уж, нырысь ик, бадӟымъёс понна. Малы ке шуоно нылпиос школаын диктант котьку ик гожъяло, нош ми, школа быдтэмъёс, со ужлэсь палэнтӥським ини. Со йырвизьлы туж умой зарядка луэ. Собере аслэсьтыд тодон-валандэ эскерон паласен но тунсыко уж луэ: ӧд вунэты на-а удмурт кылын гожъяськонэз, правилоосты. Текстэз но секыт ӧй вал кадь, кылъёсыз но капчиесь кадь, но гожъяськыны кутскиськод но малпаськонэ усиськод: шонер-а мон гожтӥ? Соин ик, мон малпамъя, та ужрадэ пыриськоно котькинлы но, школаын ужасьёслы гинэ ӧвӧл. Анай-атайёс но уногес пыриськысалзы ке, нылпиослэн малпаськон радзы но воштӥськысал, дыр. Удмурт кыл шоры мукет сямен учкысалзы. «Школаын дышетскыны косо но пыроно ини уроке» — таӵе малпанэн уло пиналъёс. Нош анай-атайёссэс таӵе ужрадъёсысь адӟысалзы ке, кыллэн дунлыкез но соослэн малпаназы ӧжыт ке но будысал, — малпанъёссэ вера Анна Витальевна.

Ципья школаын 15 мурт «Бадӟым удмурт диктант» ужрадэ пыриськиз. Тани ма вера сяме пырем ужрадэ пыриськемез сярысь Ципья школаысь библиотекаен кивалтӥсь Мария Васильева.

— Котькуд аре, пиналъёсын ӵош парта сьӧры пуксьыса, пыриськыны тыршисько. Тунсыко потэ аслэсьтым тодэмме эскерыны: вунэтӥськымтэ-а правилоосты, быгатӥсько на-а диктант гожтыны. Шумпотӥсько, удмурт кылэз дышетэм дырысен трос аръёс ортчемын ке но, диктант гожтон пумысен шугъяськонъёсы ӧз луэ. Школаысь удмурт кылъя дышетӥсь Ираида Анатольевна Чернова текстэз лад-лад лыдӟиз. Текст секыт ӧй вал, капчи, валамон кылын гожтэмын. Пуштросэз но мур: текстын удмурт, ӟуч но бигер нылъёс пыр анай кылдэ тодон но яратон, мукет калыкъёсты, соослэсь кылзэс гажан мылкыд возьматэмын, — шуэ Мария Евгеньевна.

Тӥни озьы ортчиз асьме ёросын туэез «Бадӟым удмурт диктант». Вуоно арын та пайдаё ужрадэ пыриськыны мылкыд карись адямиос эшшо но тросгес луозы шуыса оскем потэ.

Туспуктэмъёс: НКА удмуртов Балтасинского района РТ