Туннэ Удмурт кыллэн нуналыз!

Покчи Лӧзя шоръёзо школаысь 7-тӥ классын дышетскись пиналъёслэн ужъёссы

Гажано пиналъёс, вань удмуртъёс! 
Мон ӟечкыласько тӥледыз Удмурт кыллэн дунневыл нуналэныз. Анай кылмес данъяса, тӥледлы Кузебай Гердлэсь кылбурзэ ӵектэме потэ:
«...Малы дуно
Та удмурт кыл?
Малы, малы
Кулэ сокем
Удмурт кылэз
Юн ӟеч тодэм?...
Оло мукет уно кыллэсь
Жингрес солэн жингреслыкез?
Оло мусо чеберлыкез?
Оло чебер куаралыкез?
Ӧвӧл, ӧвӧл,
Котькыӵе кыл
Ас интыяз
Чебер, жингрес.
Дырыз дыръя
Котькыӵе кыл
Луэ узыр но сэзь, жингрес.
Нош туннэзэ,
Зэмзэ ик, зэм
Удмурт кылэз
Туж ӟеч тодэм
Тужгес дуно, тужгес кулэ
Та улонэз ӝутын вылэ!..»
 

Филипова Катя

Гажано дышетӥсьёс но дышетскисьёс! 
Туннэ вераме потэ вордскем кыл сярысь. Котькудӥзлэн адямилэн вань аслаз вордскем кылыз, нош асьмелэн со — удмурт кыл. Удмурт кыл медаз быры шуыса, асьмелы нылпиосмес пичи дырысенызы ик вераськыны дышетыны кулэ. Али дыре туж трос нылпиос верасько ӟуч кылэн. Тазьы луиз ке, вордскем кылмы быроз! Кызьы анай-атайёсмес гажаськом, озьы ик удмурт кылэз но гажаны, азьланьтыны кулэ, малы ке шуоно пичиысен ик асьмеосыз дышетӥзы та кыллы. Та кыл герӟа асьмеосыз анай-атайёсын, озьы ик вордскем шаерен.

Борисова Лиза 

Эшъёс!
Удмурт кыл — ӵыжы-выжыосын герӟет возён кыл. Кылэз тодон луонлык сётэ калыклэсь лулчеберетсэ чакланы но утьыны. Анай кылэз тодон озьы ик юрттэ мукет кылъёсты валаны. Макем пичиысен сое тодӥськод, сокем капчигес соин вераськыны. Соин ик анай кылын пичиысен ик дорын но, калык пӧлын но вераськоно. Соку кылмы уз быры. Нош кылмы луиз ке, калыкмы но улоз.
 

Спиридонов Дима
 

Гажано удмурт эшъёс! 
Мынам туннэ вераме потэ удмурт кыл сярысь. Удмурт кылэз ноку но вунэтоно ӧвӧл. Со кылын вераськизы мынам песянае но песятае, анае но атае. Али дыре нылпиос уноез ӟуч кылын вазисько. Пинал анай-атайёс туж ик кулэ уг каро удмурт кылэз. Анай кылэз вунэтонтэм понна удмурт кылын книгаос лыдӟоно, пӧртэм удмурт шудонъёсын шудоно. Соин ик мон тӥледыз ваньдэсыз курисько удмурт кылэз тодыны, дышетыны но соин данъяськыны. Вордскем кылдэ ке вунэтӥд, вордэм анайдэ но вунэтод.
 

Петрова Кира

Удмурт эше! 
Аслэсьтыд вераськон кылдэ одно ик тодыны кулэ. Сотэк азьпалан кин луэмдэ но уд тоды. Калыкын таӵе веран вань: «Кин вордскем кылзэ уг тоды, со вордэм нэнэзэ но уг тоды». Удмурт кылын пичиысен ик, семьяын вераськыны дышетсконо. Ас кылыныд малпандэ но вераны-валэктыны капчигес но каньылгес. Соин ик удмурт кылын вераськоно но гожъяськоно.
 

Михайлов Дима

Гажано удмурт эшъёс! 
Мон тӥледлы ӝож мылкыдын вазиськисько. Туннэ нуналлы асьмелэн удмурт кылмы туж шер кылӥське. Асьмеос тросэз ӟуч кылын вераськиськом, удмурт кылмес вунэтыса. Тодады вае али, кызьы тӥледыз анайды будэтӥз, небыт удмурт кылъёс вераса. Асьмеос, удмуртъёс, ноку но вунэтыны кулэ ӧвӧл анай кылмес. Удмурт кылэз медам вунэтэ шуыса, тросгес удмурт книгаос лыдӟоно, эшъёсынымы анай кылын вераськоно, шудоно, кырӟано-эктоно. Яратэ но гажалэ асьтэлэсь вордскем кылдэс, ноку но эн вунэтэ сое!
 

Ишмурзина Ника

Пиналъёс! 
Асьмелэн вераськон кылмы удмурт кыл луэ. Вераськон кыл бадӟым инты басьтэ удмурт лулчеберетын. Со юрттэ крезьгур но театр удысъёсты азинтыны. Ас кылыныд калык визез но ӟечгес валаськод, сое пыраклы сюлмад кельтӥськод.
 

Кузьмин Стас

Гажано эшъёс! 
Мынам тӥледлы ивортэме потэ удмурт кыллэн кулэлыкез сярысь. Удмурт кылмы — со асьмелэн анай кылмы. Сое гажано. Туала арын пиналъёс анай кылзэс вунэто. Анай кылэз вунэтонтэм вылысь, куспамы удмурт кылын вераськоно. Эн вунэтэ анай кылдэс.
 

Никифоров Данил

Гажано удмуртъёс! 
Удмурт кыл — со асьмелэн вордскем кылмы, анаен вераськон кылмы. Удмурт кылэз дышетыны кулэ, малы ке шуоно та кылын вераськизы асьмелэн вашкала ӵыжы-выжыосмы. Та кыл юрттэ удмурт калыклэн лулчеберетэныз тодматскыны. Удмурт кылын трос кылбуръёс, выжыкылъёс, кырӟанъёс гожтэмын. Соосты лыдӟон но валан понна, удмурт кылэз тодыны кулэ. Удмурт кыл медаз быры шуыса, сое дышетоно, удмурт кылын вераськоно, гожъяськоно, лыдӟиськоно.
 

Никитин Рома

Гажано эшъёс! 
Туала удмуртъёслэн ужпумзы — анай кылмес утён. Шумпотымон, али Ижкарын Вылӥ кивалтэтъёслэн юрттэменызы, городын улӥсь удмуртъёслы но нимысьтыз удмурт кылэз дышетонъя курсъёс усьтэмын, пе. Гуртъёслэн, вузкаронниослэн, кун ужъюртъёслэн, транспорт дугдылонниослэн нимъёссы удмурт кылэ берыктыны кутскемын. Азьланяз но таӵе ужъёс нуиськизы ке, кылмы азинскоз.
 

Антонова Даша

Эшъёс!
Асьмеос туннэ нуналлы шумпотыса вераны быгатӥськом, анай кылмы улэ на али шуыса. Удмурт кылэз Татарстанын улыса но, асьмеос сое дышетӥськом, та кылын кырӟаськом но эктӥськом, вожвылъяськонъёсы пыриськиськом. Али гинэ ортчем лыдӟисьёслэн конкурсазы мон призёр луи, апае удмурт кылъя но литературая олимпиадаын вормисе потӥз. Дышетэ удмурт кылмес но данъяське удмурт луэменыды!
 

Ишмурзина София 

Пиналъёслэсь гожтэмъёссэс газетэ поттыны дасяз дышетӥсьсы Наталия Антонова