Тупаса ӵошен

Вуж Кушкет гуртын уло уно Эсай выжыос. Соос пӧлысь одӥгез Степан но Матрёна Исаевъёслэн выжы нюжазы.

Жугиськон кутскемен нялтас Степанэз басьто оже. Со секыт дыре Матрёна огезлэсь пичи мукетыз Илья, Николай но Михаил пиосыныз огназ кыле. Туж секыт луэ солы, озьы ке но со уг сётскы. Пичи гинэ мугоро кышномурт, ужаны но, пиналъёссэ утьыны но вуэ. Кузпалыз Степан ож бусые бырыны шеде, озьы ке но Матрёна уг чигиськы, огназ ӵабъяськыса-ӵабъяськыса 3 пиоссэ пыд йылаз султытэ. Туж уно луо сютэм улон но дӥсьсы ӧвӧлэн школае мынытэк кылён дыръёссы. Трос кайгу адӟыны тупа ке но, Матрёна 90 аресозь улэ. Дораз Николай пизэ юрт кутыны кельтэ, соослэсь нылпиоссэ но уте али со.

Николай туж визьмо пияш луэ. Дӥсез ӧвӧлэн одӥг классын кык ар но пуке, дораз ас понназ но дышетскыны тырше - уг сётскы. Дышетсконзэ йылпумъямез бере, 3 ар служить каре. Отын но ассэ туж умоен возьматэ. Армиысь бертэмез бере кошке Илья агаез доры Новокузнецке шахтае ужаны. Гуртын будэм егит пилы город нылъёс уг кельшо, анаез доры куное бертыкуз малпа гурт нылэн паръяськыны.

Со дыре Починка гуртын туж данлы, узыр, чурыт Пётр агай улэм. Солэн огезлэсь огез чебересь 4 нылъёсыз будӥллям. Визьмо егит пияш Николай «ӵужанай» гуртаз - Починкае - мыныкуз ӵапак со Пётр агайлэн Вера нимо нылызлы синмаське. Кема ик дыр уг ортчы, соос огазе но луо. Ӵошен кошко Новокузнецк городэ ужаны. Отын вордске Юрий нимо пизы. 3 ар городын улэмзы бере, анаезлэн тазалыкез лябӟыны кутскемысь, соос берто Николайлэн вордскем гуртаз, вордскем юртаз.

Николай ужаны интыяське колхозэ. Уно аръёс ӵоже гуртысь фермаын зоотехник луыса тырше. Отын но ассэ устоен возьматэ. Вера но колхозын ик тырше. Огез бӧрсьы мукетыз 5 нылпизы вордске. Нунал бӧрсьы нунал ортче, соос бӧрсьы ортчо аръёс. Озьы, колхозын ик тыршыса, пенсие потон дырзы но вуэ, нылпиоссы но, пыд йылазы султыса, улонын асьсэлэсь сюрессэс быръё.

Юрий пизы, ветеринарияя институтэз йылпумъяса, Удмуртиын Каракулинской районын аслаз басьтэм ӧнерезъя тырше. Кузпалэныз кык пи будэто, али дыре кык внучказы вань ни.

Олег пизы, военно-воздушной институтэз йылпумъяса, самолётэн Афганистанын, Чечняын жугиськон мыныку, туж уно лоба. 1996 арын Чечня жугиськонын бырыны шеде. Солы Россилэн Героез дано ним сёто. Олеглэн одӥг гинэ Дима нимо пиез кыле. Али кылем сентябрь толэзе гинэ со кузпалъяськиз. Николай Степановичлы но Вера Петровналы шуд усиз Воронеж городэ внуксылэн сюаназ ветлыны.

Света нылзы, пединститутэз йылпумъяса, аслаз быръем ӧнерезъя Киров улосын география предметэн дышетэ. Соослэн но 2 пизы будэ.

Николай пизы гуртаз анай-атаезлы пыкет луыса кыле. Сырья гуртысь Нина нимо нылэн улонзэс азьланьто, 4 нылпи будэто. Али дыре Николай пизы вахтаен Москвае ужаны ветлэ, нош кензы гуртысь фермаын тырше.

Николай Степановичлэн но Вера Петровналэн туннэ нуналэ семьязы бадӟым. Нылпи куараос корказэс шулдыртыса уло. Семья бадӟымен корка шулдыр луэ, соос семья куспазы туж тупаса, огкылысь кенешыса уло.

Алевтина нылзы Гондыргуртэ картлы бызе. Но анай-атаезлэсь кыдёке кошкыны уг малпа, аслаз гуртаз ик юрт лэсьтыса улонзэ татын азьланьтэ. Али дыре соос кузпалэныз 3 нылпи будэто.

Туннэ нуналлы Николай Степановичлэн но Вера Петровналэн 12 внукъёссы но 2 правнучказы вань. Соос 9 полэс песяй-бабай но 5 полэс ӵужанай-ӵужатай ини. 6 внуксы, умоен школаез йылпумъяса, вылӥ тодон-валан басьтӥзы ини. Вань на меда дунне вылын талэсь но бадӟым шумпотон.

9 ноябре Николай Степанович но Вера Петровна асьсэлэсь 55 ар ӵоже ӵош улэм изумруд сюанзэс пусъё. Соосыз та бадӟым, шумпотон нуналэн ӟечкыласькомы. Сӥзиськомы соослы тыпы выллем тазалык, шудо-буро улон, кузь гумыр. Котьку но куспазы тупаса, ог-огзэсыз валаса улонзэс мед азьланьтозы. Трос шуг-секыт пыр ортчыны тупаз ке но, ортчем нуналъёс мед кельтозы ӟеч малпанъёс гинэ, нош вуись нунал мед шумпоттоз ӟеч иворъёсын.

Азьпалан, инмар юрттэмен, 2018 арын мед кылдоз вань нылпиоссэ, внукъёссэ люкаса соослэсь 80 аресъем юбилейзэс пусйыны.

Ӟечкыланме азьланьтыса гожтэме потэ Василий Петрович Никитинлэсь малпаса гожтэм акро-кылбурзэ.